LIVE TV
അനിശ്ചിത സാമ്പത്തിക സാഹചര്യങ്ങളിൽ ഘട്ടംഘട്ടമായുള്ള എസ്ഐപി നിക്ഷേപങ്ങൾക്ക് വീണ്ടും പ്രാധാന്യമേറുന്നു; ഏപ്രിൽ മാസത്തിലെ എസ്ഐപി നിക്ഷേപം ₹31,115 കോടി രൂപയായി. കഴിഞ്ഞ കുറെ മാസങ്ങളായി ഓഹരി വിപണിയിലെ കനത്ത ചാഞ്ചാട്ടങ്ങളെത്തുടർന്ന് ചെറിയ തുകകളായി സ്ഥിരമായി നിക്ഷേപിക്കുന്ന (എസ്ഐപി) രീതിയിൽ നിന്ന് നിക്ഷേപകർ പിൻവലിഞ്ഞിരുന്നു. വിപണി ഉയരുകയോ ഇടിയുകയോ ചെയ്താലും ദീർഘകാല സമ്പത്ത് സൃഷ്ടിക്കാനുള്ള സുരക്ഷിതവും നിയന്ത്രിതവുമായ മാർഗമായി എസ്ഐപി മാറുന്നു എന്നതാണ് പ്രത്യേകത. ഏപ്രിൽ മാസത്തിൽ മ്യൂച്വൽ ഫണ്ടുകളിലെ എസ്ഐപി നിക്ഷേപം ₹31,115 കോടി രൂപയായി. മാർച്ചിൽ ഇത് ₹32,087 കോടി രൂപയായിരുന്നു. മാർച്ചിനെ അപേക്ഷിച്ച് മൂന്ന് ശതമാനത്തിന്റെ കുറവുണ്ടായെങ്കിലും കഴിഞ്ഞ വർഷം ഇതേ കാലയളവിനെ അപേക്ഷിച്ച് എസ്ഐപി നിക്ഷേപത്തിൽ 18 ശതമാനത്തിന്റെ വളർച്ച രേഖപ്പെടുത്തി. 2025 ഏപ്രിലിൽ എസ്ഐപി വഴി ₹26,400 കോടി രൂപയായിരുന്നു നിക്ഷേപം.
എസ്ഐപി അക്കൗണ്ടുകൾ കൈകാര്യം ചെയ്യുന്ന മൊത്തം ആസ്തി ₹16.85 ലക്ഷം കോടി രൂപയായി ഉയർന്നു. മ്യൂച്വൽ ഫണ്ട് വ്യവസായത്തിന്റെ മൊത്തം ആസ്തിയായ ₹82.03 ലക്ഷം കോടിയുടെ 20.6 ശതമാനമാണിത്. രാജ്യത്ത് നിലവിൽ 9.65 കോടി എസ്ഐപി അക്കൗണ്ടുകളുണ്ട്. മൊത്തം മ്യൂച്വൽ ഫണ്ട് റീട്ടെയിൽ അക്കൗണ്ടുകളുടെ എണ്ണം 21 കോടിയിലേറെയാണ്.
എന്തുകൊണ്ട് എസ്ഐപി കൂടുതൽ പ്രസക്തമാകുന്നു?
വിപണി അനിശ്ചിതമായിരിക്കുമ്പോൾ ഒരുമിച്ച് വലിയ തുക നിക്ഷേപിക്കുന്നത് ആശങ്കയാണ്. എന്നാൽ എസ്ഐപിയിൽ ഓരോ മാസവും ചെറിയ തുകകളായി നിക്ഷേപിക്കുന്നതിനാൽ വിപണിയിലെ ഉയർച്ച-താഴ്ചകളുടെ ആഘാതം കുറയ്ക്കാൻ സാധിക്കും. വിപണി താഴുമ്പോൾ കൂടുതൽ യൂണിറ്റുകൾ വാങ്ങാനും ഉയരുമ്പോൾ നിക്ഷേപത്തിന്റെ മൂല്യം വർധിക്കാനും ഇത് സഹായിക്കുന്നു. “റുപ്പി കോസ്റ്റ് അവറേജിംഗ്” എന്ന ഈ രീതിയാണ് എസ്ഐപിയുടെ പ്രധാന ശക്തി.
പോസ്റ്റ് ഓഫീസ് റെക്കറിംഗ് ഡെപ്പോസിറ്റുകളിലോ ബാങ്ക് ആർഡിയിലോ നിശ്ചിത തീയതിയിൽ നിശ്ചിത തുക നിക്ഷേപിക്കുന്ന പോലെയാണ് എസ്ഐപി പ്രോത്സാഹിപ്പിക്കുന്നത്. ചെറിയ വരുമാനക്കാർക്കും ഇത് അനുയോജ്യമായ നിക്ഷേപരീതിയാണ്.
ഏത് നിക്ഷേപങ്ങളിലാണ് എസ്ഐപി അനുയോജ്യം?
എസ്ഐപി മ്യൂച്വൽ ഫണ്ടുകളിൽ മാത്രമല്ല, വിവിധ നിക്ഷേപ മാർഗങ്ങളിലേക്കും ഉപയോഗിക്കാവുന്ന രീതിയായി മാറിക്കൊണ്ടിരിക്കുകയാണ്.
ദീർഘകാല ലക്ഷ്യങ്ങൾക്ക് മികച്ച മാർഗം
കുട്ടികളുടെ വിദ്യാഭ്യാസം, വീട് വാങ്ങൽ, വിരമിക്കൽ സമ്പാദ്യം തുടങ്ങിയ ദീർഘകാല സാമ്പത്തിക ലക്ഷ്യങ്ങൾ നേടാൻ എസ്ഐപി ഏറ്റവും ഫലപ്രദമായ മാർഗങ്ങളിലൊന്നായി കണക്കാക്കപ്പെടുന്നു. നിക്ഷേപത്തിൽ സമയക്രമവും നിയന്ത്രണവും കൊണ്ടുവരുന്നതിനാൽ സമ്പത്ത് ക്രമാതീതമായി വർധിപ്പിക്കാനാകും.
Content Highlight : Systematic Investment Plans (SIPs) are regaining investor confidence amid uncertain market conditions, with April 2026 SIP inflows reaching ₹31,115 crore.
