LIVE TV
പുതിയൊരു കാര്‍ വാങ്ങാന്‍ തീരുമാനിച്ചാല്‍ അതിന്റെ ഡ്രൈവിങ് സൗകര്യവും ബ്രേക്കും സ്റ്റിയറിങ്ങും മറ്റ് ഫീച്ചറുകളുമെല്ലാം നേരിട്ട് മനസ്സിലാക്കാന്‍ പലരും ടെസ്റ്റ് ഡ്രൈവ് നടത്താറുണ്ട്. എന്നാല്‍ വാഹനം ഓടിക്കുന്നതിനിടെ അപ്രതീക്ഷിതമായി അപകടമുണ്ടായാലോ?. ഷോറൂമിലെ കാറിന് കേടുപാടുകള്‍ സംഭവിച്ചാല്‍ അതിന്റെ നഷ്ടം നികത്തേണ്ടത് ആരാണ്? ഉപഭോക്താവാണോ അതോ കാര്‍ ഷോറൂമാണോ? അതോ ഇന്‍ഷുറന്‍സ് കമ്പനിയാണോ?
ഷോറൂമുകള്‍ ടെസ്റ്റ് ഡ്രൈവിനായി നല്‍കുന്ന വാഹനങ്ങള്‍ക്ക് സാധാരണയായി ഇന്‍ഷുറന്‍സ് പരിരക്ഷ ഉണ്ടായിരിക്കും. എന്നാല്‍ വാഹനത്തിന് ഇന്‍ഷുറന്‍സ് ഉണ്ടെന്നതുകൊണ്ട് അപകടത്തിലുണ്ടാകുന്ന എല്ലാ നഷ്ടങ്ങളും ഇന്‍ഷുറന്‍സ് കമ്പനി തന്നെ വഹിക്കുമെന്ന് ഉറപ്പിക്കാനാവില്ല. വാഹനത്തിന് സംഭവിക്കുന്ന കേടുപാടുകള്‍ക്കുള്ള പരിരക്ഷയും അപകടത്തില്‍ മറ്റൊരു വാഹനത്തിനോ വ്യക്തിക്കോ സ്വത്തിനോ ഉണ്ടാകുന്ന നാശനഷ്ടങ്ങള്‍ക്കുള്ള പരിരക്ഷയും വ്യത്യസ്തമാണ്. ഇന്‍ഷുറന്‍സ് പോളിസിയുടെ വ്യവസ്ഥകള്‍, പരിരക്ഷയുടെ പരിധി, അപകടത്തിന്റെ സാഹചര്യം എന്നിവ അനുസരിച്ചായിരിക്കും നഷ്ടപരിഹാരം ലഭിക്കുക.
ടെസ്റ്റ് ഡ്രൈവിനിടെ അപകടമുണ്ടായാല്‍ എല്ലാ സാഹചര്യങ്ങളിലും ഉപഭോക്താവ് പണം നല്‍കണമെന്നോ ഉപഭോക്താവിന് യാതൊരു ബാധ്യതയുമില്ലെന്നോ പൊതുവായി പറയാനാവില്ല. അപകടം എങ്ങനെ സംഭവിച്ചു, ആരുടെ ഭാഗത്താണ് വീഴ്ച, ഇന്‍ഷുറന്‍സ് പോളിസിയില്‍ എന്തെല്ലാം പരിരക്ഷകളുണ്ട് തുടങ്ങിയ കാര്യങ്ങള്‍ പരിശോധിച്ചാണ് ഉത്തരവാദിത്തം തീരുമാനിക്കുക.
അമിതവേഗത്തില്‍ വാഹനമോടിക്കുക, ട്രാഫിക് നിയമങ്ങള്‍ ലംഘിക്കുക, അശ്രദ്ധമായി വാഹനം കൈകാര്യം ചെയ്യുക തുടങ്ങിയ കാര്യങ്ങള്‍ അപകടത്തിന് കാരണമായാല്‍ അത് ഉത്തരവാദിത്തം നിര്‍ണയിക്കുന്നതില്‍ പ്രധാനമാകും. എന്നാല്‍ മറ്റൊരു വാഹനത്തിന്റെ അശ്രദ്ധ മൂലമുണ്ടാകുന്ന അപകടത്തില്‍ സ്ഥിതി വ്യത്യസ്തമായിരിക്കാം.
ഇന്‍ഷുറന്‍സ് പരിരക്ഷയില്‍ ഉള്‍പ്പെടാത്ത ചില ചെലവുകള്‍ ഉണ്ടെങ്കില്‍ അവ ആര് വഹിക്കണം എന്നതും പരിശോധിക്കേണ്ടിവരും. അതിനാല്‍ മുഴുവന്‍ ചെലവും ഉപഭോക്താവ് തന്നെ നല്‍കണം എന്ന നിഗമനത്തിലെത്തുന്നതിന് മുമ്പ് ഇന്‍ഷുറന്‍സ് രേഖകളും മറ്റ് നിബന്ധനകളും പരിശോധിക്കണം.
ടെസ്റ്റ് ഡ്രൈവ് ആരംഭിക്കുന്നതിന് മുമ്പ് ചില ഷോറൂമുകള്‍ ഉപഭോക്താക്കളോട് പ്രത്യേക ഫോമുകളില്‍ ഒപ്പിടാന്‍ ആവശ്യപ്പെടാറുണ്ട്. അപകടമുണ്ടായാല്‍ നഷ്ടത്തിന്റെ ഉത്തരവാദിത്തം ആര്‍ക്കായിരിക്കുമെന്നതുമായി ബന്ധപ്പെട്ട വ്യവസ്ഥകള്‍ ഇത്തരം രേഖകളില്‍ ഉള്‍പ്പെട്ടേക്കാം. അതുകൊണ്ട് ഫോം വായിച്ചുനോക്കാതെ ഒപ്പിടരുത്. അപകടമുണ്ടായാല്‍ പണം നല്‍കേണ്ടിവരുമോ, ഇന്‍ഷുറന്‍സ് പരിരക്ഷയില്‍ ഉള്‍പ്പെടാത്ത ചെലവുകള്‍ ആരാണ് വഹിക്കുക തുടങ്ങിയ കാര്യങ്ങള്‍ ഷോറൂം അധികൃതരോട് വ്യക്തമായി ചോദിച്ചറിയണം. സാധ്യമെങ്കില്‍ ഒപ്പിട്ട രേഖയുടെ പകര്‍പ്പും സൂക്ഷിക്കുക.
Content Highlights : It is common practice to take a test drive before purchasing a new car. But if the vehicle meets with an accident during this time, will the customer have to bear the repair costs? Let’s look at the insurance coverage and the showroom's terms and conditions
