LIVE TV
ചെന്നൈ:വേദിയിൽ നിന്ന് പുറത്തിറങ്ങി സദസ്സിലിരിക്കുന്ന ഡിഎംകെ മന്ത്രിയ്ക്ക് മുന്നിലെത്തി നര്‍ത്തകിമാര്‍ നൃത്തം ചെയ്യുന്ന വീഡിയോ സമൂഹമാധ്യമങ്ങളില്‍ വൈറല്‍. ഡിഎംകെ മന്ത്രി എസ് പെരിയകറുപ്പന്‍ തനിക്ക് മുന്നില്‍ നൃത്തം ചെയ്യുന്ന യുവതികളെ നോക്കിയിരിക്കുന്നതും കയ്യടിക്കുന്നതുമായ വീഡിയോയാണ് വൈറലായിരിക്കുന്നത്. ശിവഗിരി ജില്ലയില്‍ ഉപമുഖ്യമന്ത്രി ഉദയനിധി സ്റ്റാലിന്റെ പിറന്നാളുമായി ബന്ധപ്പെട്ട് സംഘടിപ്പിച്ച ആഘോഷപരിപാടിക്കിടെയായിരുന്നു സംഭവം. വേദിയില്‍ നൃത്തം ചെയ്യുകയായിരുന്ന യുവതികളെ മന്ത്രി തന്റെ ഇരിപ്പിടത്തിനരികിലേക്ക് വിളിക്കുകയും മുന്നില്‍ നിര്‍ത്തി നൃത്തം ചെയ്യിക്കുകയും ചെയ്തുവെന്നാണ് ഉയരുന്ന ആരോപണം.
സംഭവത്തില്‍ മന്ത്രിക്കെതിരെ രൂക്ഷ വിമര്‍ശവുമായി ബിജെപി രംഗത്തെത്തി. സ്ത്രീകളെ അര്‍ധനഗ്ന വേഷത്തില്‍ വിളിച്ചുവരുത്തി നൃത്തം ചെയ്യിച്ച് അത് ആസ്വദിച്ച് കയ്യടിക്കുന്ന നേതാക്കളെ എങ്ങനെയാണ് തമിഴ്‌നാട്ടിലെ സ്ത്രീകള്‍ക്ക് ആശ്രയിക്കാന്‍ കഴിയുക എന്നാണ് ബിജെപി ചോദിക്കുന്നത്. ക്രമസമാധാന പ്രശ്‌നങ്ങള്‍, ആരോഗ്യ മേഖലയിലെ പ്രശ്‌നങ്ങള്‍, അഴിമതി തുടങ്ങി തമിഴ്‌നാട്ടിലെ സര്‍ക്കാര്‍ സംവിധാനം ഇതിനകം തകര്‍ന്നിരിക്കുകയാണെന്നും മുഖ്യമന്ത്രി മുതല്‍ മുതിര്‍ന്ന മന്ത്രിമാര്‍ വരെ എല്ലാവരും ഇത്തരം വിനോദങ്ങളില്‍ മാത്രം ശ്രദ്ധ കേന്ദ്രീകരിച്ചിരിക്കുകയാണെന്നും ബിജെപി ആരോപിച്ചു.
ഇതാദ്യമായല്ല പെരിയകറുപ്പന്‍ ഇത്തരം വിവാദങ്ങളില്‍ പെടുന്നത്. പത്തുവര്‍ഷം മുന്‍പ് തെരഞ്ഞെടുപ്പ് സമയത്ത് പെരിയറുപ്പനും ഒരു യുവതിയുമൊത്തുളള അശ്ലീല വീഡിയോ പുറത്തുവന്നിരുന്നു. ഡിഎംകെ നേതാക്കളുടെ മനോഭാവമാണ് ഇത്തരം സംഭവങ്ങളിലൂടെ പുറത്തുവരുന്നതെന്ന് എഐഎഡിഎംകെ വക്താവ് കോവൈ സത്യന്‍ പറഞ്ഞു.
അതേസമയം, സംഭവത്തില്‍ പ്രതികരണവുമായി ഡിഎംകെ നേതാക്കള്‍ രംഗത്തെത്തി. മന്ത്രി സ്ത്രീകളോട് വേദിയില്‍ നിന്നിറങ്ങി അടുത്തുവന്ന് നൃത്തം ചെയ്യാന്‍ ആവശ്യപ്പെട്ടു എന്ന ആരോപണം തെറ്റാണെന്നും സ്ത്രീകള്‍ സ്വയം വേദിയില്‍ നിന്ന് ഇറങ്ങിവരികയായിരുന്നു എന്നുമാണ് ഡിഎംകെ വൃത്തങ്ങള്‍ പറയുന്നത്. എഐഎഡിഎംകെയും ഇത്തരം നൃത്തപരിപാടികള്‍ നടത്തിയിട്ടുണ്ടെന്നും ഡിഎംകെ ആരോപിച്ചു.
Content Highlights: DMK minister criticized for clapping and enjoying obscene dance at public place
