Get the latest news at
your fingertips!
Download our app now
LIVE TV
Search
കൊൽക്കത്ത: പശ്ചിമബംഗാളിലെ നാദിയ ജില്ലയിലെ കാളിഗഞ്ച് നിയമസഭാ മണ്ഡലത്തിലേയ്ക്കുള്ള ഉപതിരഞ്ഞെടുപ്പിൽ കോൺഗ്രസിനെ പിന്തുണയ്ക്കാൻ ഇടതുമുന്നണി തീരുമാനം. ജൂൺ 19നാണ് കാളിഗഞ്ചിൽ ഉപതിരഞ്ഞെടുപ്പ്. കബിൽ ഉദിൻ ഷെയ്ഖിനെ സ്ഥാനാർത്ഥിയായി വെള്ളിയാഴ്ച കോൺഗ്രസ് നേതൃത്വം പ്രഖ്യാപിച്ചിരുന്നു. കോൺഗ്രസിൻ്റെ സ്ഥാനാർത്ഥി പ്രഖ്യാപനം വന്നതിന് പിന്നാലെ ഇടതുമുന്നണി യോഗം ചേർന്ന് കോൺഗ്രസ് സ്ഥാനാർത്ഥിയെ പിന്തുണയ്ക്കാൻ ഐക്യകണ്ഠേന തീരുമാനിക്കുകയായിരുന്നു എന്നാണ് പ്രാദേശിക മാധ്യമങ്ങൾ റിപ്പോർട്ട് ചെയ്യുന്നത്.
ഇടതുമുന്നണി സഖ്യകക്ഷിയായ ആർഎസ്പി ഇവിടെ മത്സരിക്കാനുള്ള താൽപ്പര്യം അറിയിച്ചെങ്കിലും ഇടതുമുന്നണി ചെയർമാനും സിപിഐഎമ്മിൻ്റെ മുതിർന്ന നേതാവുമായ ബിമൻ ബോസ് കോൺഗ്രസിനെ പിന്തുണയ്ക്കുന്ന വിഷയത്തിൽ ആർഎസ്പി പ്രതിനിധിയെ അനുനയിപ്പിക്കുകയായിരുന്നു എന്നാണ് റിപ്പോർട്ട്.
നേരത്തെ മെയ് 27ന് തൃണമൂൽ കോൺഗ്രസ് ഇവിടെ ആലിഫ അഹമ്മദിനെ സ്ഥാനാർത്ഥിയായി പ്രഖ്യാപിച്ചിരുന്നു. കാളിഗഞ്ചിലെ എംഎൽഎയായിരുന്ന തൃണമൂൽ കോൺഗ്രസ് നേതാവ് നസിറുദ്ദീൻ അഹമ്മദിൻ്റെ മകളാണ് 38കാരിയായ ആലിഫ് അഹമ്മദ്. ഫെബ്രുവരി മാസത്തിൽ നസിറുദ്ദീൻ അഹമ്മദിൻ്റെ ആകസ്മിക നിര്യാണത്തെ തുടർന്നാണ് ഇവിടെ ഉപതിരഞ്ഞെടുപ്പ് വേണ്ടി വന്നത്. ഇടതുമുന്നണിയുടെ പിന്തുണയോടെ 2016 ൽ കോൺഗ്രസ് കാളിഗഞ്ചിൽ വിജയം നേടിയിരുന്നു. ഇടതുപക്ഷം അധികാരത്തിലിരിക്കെ സഖ്യകക്ഷിയായ ആർഎസ്പി നാല് തവണ ഇവിടെ നാല് തവണ വിജയിച്ചിരുന്നു. 2011 ൽ ടി‌എം‌സിയുടെ നസിറുദ്ദീൻ അഹമ്മദ് ഇവിടെ വിജയിക്കുകയായിരുന്നു. 2016ൽ കോൺഗ്രസ് സ്ഥാനാർത്ഥി ഹസനുസ്മാൻ എസ് കെ ആയരുന്നു ഇവിടെ വിജയിച്ചത്. എന്നാൽ 2021 നസിറുദ്ദീൻ അഹമ്മദ് സീറ്റ് തിരിച്ച് പിടിച്ചു. മുസ്ലിം വിഭാഗത്തിന് സ്വാധീനമുള്ള മണ്ഡലമാണ് കാളിഗഞ്ച്.
ജൂൺ 19ന് നാലു സംസ്ഥാനങ്ങളിലായി ഉപതിരഞ്ഞെടുപ്പ് നടക്കുന്ന അഞ്ച് നിയമസഭാ മണ്ഡലങ്ങളിലൊന്നാണ് കാളിഗഞ്ച്. കേരളത്തിെ നിലമ്പൂ‍ർ, പഞ്ചാബിലെ ലുധിയാന വെസ്റ്റ്, ഗുജറാത്തിലെ കാദി, വിസാവദാർ എന്നിവിടങ്ങളിലാണ് ഉപതെരഞ്ഞെടുപ്പ് നടക്കുന്നത്. . ജൂൺ രണ്ടിനാണ് നോമിനേഷൻ സമർപ്പിക്കേണ്ട അവസാന തിയതി. നോമിനേഷൻ പിൻവലിക്കാനുള്ള അവസാന തീയതി ജൂൺ അഞ്ചാണ്.
Content Highlights: West Bengal bypoll Left Front backs Congress candidate in Kaliganj Assembly Constituency
