LIVE TV
തിരുവനന്തപുരം: മുഖ്യമന്ത്രിയുടെയും മന്ത്രിമാരുടെയും സ്‌പോണ്‍സര്‍ വിവാദത്തില്‍ യുഡിഎഫ് സര്‍ക്കാരിനെ വിമര്‍ശിച്ച് സിപിഐ സംസ്ഥാന സെക്രട്ടറി ബിനോയ് വിശ്വം. പുറത്ത് പേര് പറയാന്‍ കൊള്ളാതെ ഏതോ അതിസമ്പന്നന്മാരുടെ കയ്യില്‍ മുഖ്യമന്ത്രിയും സര്‍ക്കാരും അമര്‍ന്ന് പോയിരിക്കുന്നുവെന്ന് പറഞ്ഞാണ് അദ്ദേഹം പ്രതികരിച്ചത്. 'താന്‍ പോകുന്ന വഴിയേ പോകാന്‍ മറ്റു മന്ത്രിമാര്‍ക്ക് മുഖ്യമന്ത്രി സമ്മതം കൊടുത്തിരിക്കുകയാണ്. പണക്കാരെ കാണുമ്പോള്‍ കവാത്ത് മറക്കണം. അവര്‍ കൊടുക്കുന്ന വിമാനത്തിലോ കാറിലോ സഞ്ചരിക്കാം', എന്നും ബിനോയ് വിശ്വം പറഞ്ഞു.
സിപിഐ നേതാക്കള്‍ ആരില്‍ നിന്നും അവിഹിതമായി പണം വാങ്ങിയിട്ടുണ്ടാകില്ലെന്നും പാര്‍ട്ടി ഫണ്ടിലേക്ക് സമ്മേളനങ്ങളിലേക്കുമല്ലാതെ സിപിഐ നേതാക്കള്‍ ഫണ്ട് വാങ്ങില്ലെന്നും ബിനോയ് വിശ്വം വ്യക്തമാക്കി. എന്‍ ശശിധരരന്‍ കര്‍ത്തയുടെ ഡയറിയില്‍ സി കെ ചന്ദ്രപ്പന്റെയും പന്ന്യന്‍ രവീന്ദ്രന്റെയും പേരുണ്ടല്ലോ എന്ന് ചോദ്യത്തിന് മറുപടിയായാണ് അദ്ദേഹം പ്രതികരിച്ചത്. അതേസമയം, സിപിഐഎമ്മിനെ രാഷ്ട്രീയമായി കടന്നാക്രമിക്കാന്‍ വന്നാല്‍ സിപിഐ പ്രതിരോധിക്കുമെന്നും ബിനോയ് വിശ്വം പറഞ്ഞു. പിണറായി വിജയനെതിരായ എസ്‌ഐടി അന്വേഷണത്തില്‍ നോക്കട്ടെ എന്ന് മാത്രം ബിനോയ് വിശ്വത്തിന്റെ മറുപടി.
കഴിഞ്ഞ ദിവസം മുഖ്യമന്ത്രി നടത്തിയ ചാര്‍ട്ടേഡ് ഫ്‌ളൈറ്റ് യാത്രയാണ് രാഷ്ട്രിയ വിവാദങ്ങൾക്ക് വഴിവെച്ചത്.
ചാര്‍ട്ടേഡ് ഫ്‌ളൈറ്റ് യാത്ര അധിക ചെലവാണെന്നുള്ള ആക്ഷേപം ഉയര്‍ന്നതോടെ വിശദീകരണവുമായി മുഖ്യമന്ത്രിയുടെ ഓഫീസ് രംഗത്തെത്തിയിരുന്നു. ചാര്‍ട്ടേഡ് ഫ്‌ളൈറ്റിന്റെ ചെലവ് വഹിക്കുന്നത് സ്‌പോണ്‍സറാണെന്നായിരുന്നു ഓഫീസ് വിശദീകരണം. സംസ്ഥാനത്തിന് ഒരു രൂപയുടെ പോലും അധിക ചെലവുണ്ടായിട്ടില്ല. കരിപ്പൂരിലേക്കുള്ള യാത്രാവിമാനങ്ങള്‍ ലഭ്യമല്ലാത്തതിനാലാണ് മുഖ്യമന്ത്രി ചാര്‍ട്ടേഡ് വിമാനത്തെ ആശ്രയിച്ചതെന്നും മുഖ്യമന്ത്രിയുടെ ഓഫീസ് വിശദീകരിച്ചിരുന്നു. മുഖ്യമന്ത്രിയുടെ ഓഫീസിന്റെ വീശദീകരണം വന്നതോടെ ആ സ്‌പോണ്‍സര്‍ ആരാണെന്നുള്ള ചോദ്യം ഉയര്‍ന്നു. തുടർന്ന് വിഷയം പ്രതിപക്ഷം ഏറ്റെടുക്കുകയായിരുന്നു. സ്പോൺസർ ആരാണെന്ന് പറയാനാകില്ലെന്നായിരുന്നു മുഖ്യമന്ത്രി ഇന്നലെ വാർത്താസമ്മേളനത്തിലും ആവർത്തിച്ചത്. താൻ ഇനിയും ഇത്തരത്തിൽ യാത്ര ചെയ്യുമെന്നും മുഖ്യമന്ത്രി പറഞ്ഞിരുന്നു.
അതിനിടെയാണ്, ശശിധരൻ കർത്തയുടെ ഡയറിയിൽ മുഖ്യമന്ത്രി വി ഡി സതീശൻ ഉൾപ്പെടെയുള്ള പ്രമുഖ രാഷ്ട്രീയ നേതാക്കളുടെ പേര് ഉണ്ടെന്ന വിവരങ്ങൾ ബിജെപി നേതാവ് ഷോൺ ജോർജ് പുറത്തുവിട്ടത്. ഇതിൽ മുഖ്യമന്ത്രി വി ഡി സതീശൻ്റെ പേരിന് നേർക്ക് അഞ്ചു ലക്ഷം രൂപയെന്നാണ് രേഖപ്പെടുത്തിയിരുന്നത്. വിവിധ നേതാക്കളുടെ പേരുകള്‍ക്കൊപ്പമാണ് വി ഡി സതീശന്റെ പേരുമുള്ളത്.
Content Highlights: CPI state secretary Binoy Viswam criticised the UDF government over the controversy surrounding sponsors for the Chief Minister and ministers.
