LIVE TV
കോഴിക്കോട്: ഇവിടുത്തെ വലതുപക്ഷം എന്തെങ്കിലും അബദ്ധങ്ങൾ കാണിച്ച് ജനവിരുദ്ധ പ്രവർത്തനങ്ങൾ നടത്തി അതിൻ്റെ ഫലമായിട്ട് ഉണ്ടാകുന്ന നേട്ടത്തിൽ വളരാനല്ല സിപിഐഎമ്മും ഇടതുപക്ഷ ജനാധിപത്യ മുന്നണിയും ഉദ്ദേശിക്കുന്നതെന്ന് സിപിഐഎം അഖിലേന്ത്യാ ജനറൽ സെക്രട്ടറി എം എ ബേബി. കോഴിക്കോട് നടക്കുന്ന സിപിഐഎം വിപുലീകൃത സംസ്ഥാന സമിതിയോഗം ഉദ്ഘാടനം ചെയ്ത് സംസാരിക്കുകയായിരുന്നു എം എ ബേബി. 'തെളിമയുള്ള തൊഴിലാളി വർഗ്ഗ വിപ്ലവ പ്രസ്ഥാനമായി ഞങ്ങൾ പ്രവർത്തിച്ച് മുന്നേറിക്കൊണ്ടിരിക്കുന്നു. ഇതിനിടയിൽ കുറവുകളോ പോരായ്മകളോ ശ്രദ്ധക്കുറവകളോ ഞങ്ങൾക്ക് ഉണ്ടാകുന്നുണ്ടെങ്കിൽ അത് ഞങ്ങൾ തന്നെ ചർച്ച ചെയ്യും. ജനങ്ങൾക്ക് അത് ചൂണ്ടിക്കാണിക്കാം മാധ്യമങ്ങൾക്ക് ചൂണ്ടിക്കാണിക്കാം. അങ്ങന ചൂണ്ടിക്കാണിക്കുമ്പോൾ പോരായ്മ തിരിച്ചറിഞ്ഞാൽ അത് തിരുത്തും അങ്ങനെയാണ് തെളിമയുള്ള കമ്യൂണിസ്റ്റ് പ്രസ്ഥാനമായി പാർട്ടി മാറുന്ന'തെന്നും എം എ ബേബി പറഞ്ഞു.
മറ്റു പാർട്ടികളോട് താരതമ്യം ചെയ്യുമ്പോൾ കമ്യൂണിസ്റ്റുകാർ ഭേദമാണെന്ന് പറഞ്ഞാൽ പോരെന്നും വാക്കിലും പ്രവൃത്തിയിലും മറ്റുള്ളവരോടുള്ള പെരുമാറ്റത്തിലും കമ്യൂണിസ്റ്റുകാർ വ്യത്യസ്തരായിരിക്കണമെന്നും എം എ ബേബി പറഞ്ഞു. കേരളം കൈവരിച്ച നേട്ടങ്ങള്‍ക്ക് പിന്നില്‍ കമ്മ്യൂണിസ്റ്റ് പാര്‍ട്ടിയുടെ ഇടപെടലുകള്‍ ആണെന്ന് എം എ ബേബി. പാര്‍ട്ടി തിരിച്ചടികളിലൂടെയാണ് കടന്നുപോകുന്നതെങ്കിലും ഉജ്ജ്വലമായ ചരിത്രമാണ് തങ്ങള്‍ക്കുള്ളതെന്നും എംഎ ബേബി പറഞ്ഞു. 'ചില തിരിച്ചടിയുടെ പശ്ചാത്തലത്തിലാണ് ഇത്തരത്തിൽ യോഗം സംഘടിപ്പിക്കുന്നതെങ്കിലും ഉജ്ജ്വലമായ ചരിത്രമാണ് പാര്‍ട്ടിക്കുള്ളത്. സമ്പൂര്‍ണ്ണ സാക്ഷരത, സമ്പൂര്‍ണ്ണ വൈദ്യുതീകരണം, ജനകീയാസൂത്രണം, കഴിഞ്ഞ പത്ത് വര്‍ഷത്തെ മഹത്തായ നേട്ടങ്ങള്‍. ഇതിനെല്ലാം പിന്നില്‍ കമ്മ്യൂണിസ്റ്റ് പാര്‍ട്ടിയുടെ ഇടപെടലുകളാണ്', എം എ ബേബി പറഞ്ഞു.
കുറേ ശരികള്‍ക്കിടയിലാണ് സിപിഐഎമ്മിന് തെറ്റ് സംഭവിക്കുന്നത്. തെറ്റ് തിരുത്താന്‍ തയ്യാറാകുമ്പോള്‍ തെറ്റ് പറ്റിയേ എന്ന് പരിഹസിക്കുകയാണ്. ചരിത്രം ഓര്‍ക്കണം, കേരളത്തിലെ സാമൂഹിക പരിഷ്‌കരണത്തില്‍ സിപിഐഎം നിര്‍ണായക പങ്കുവഹിച്ചു. വലതുപക്ഷ ധ്രുവീകരണം 2026ല്‍ സംഭവിച്ചു. ചേലക്കാടന്‍ ആയിഷയെ പോലുള്ളവര്‍ സമ്പൂര്‍ണ്ണ സാക്ഷരതയുടെ ഭാഗമായി പൊതുരംഗത്ത് വന്നത് ഇടതുഭരണത്തിന്റെ ഫലമാണ്. സ്ത്രീ സുരക്ഷാ പദ്ധതി വി ഡി സതീശന്‍ സര്‍ക്കാര്‍ പിന്‍വലിച്ചുവെന്നും എം എ ബേബി കുറ്റപ്പെടുത്തി. 'തിരിച്ചുവരവില്ലെന്ന് വിധിയെഴുതിയപ്പോഴെല്ലാം ഇടതുപക്ഷം ശക്തമായി തിരിച്ചുവന്നിട്ടുണ്ട്. തെറ്റുകള്‍ മനുഷ്യസഹജമാണ്. തിരുത്തി മുന്നോട്ട് പോകും. പാര്‍ട്ടി നിലനില്‍ക്കണമെന്നാഗ്രഹിച്ചുകൊണ്ടുള്ള വിമര്‍ശനം സ്വാഗതം ചെയ്യുമെന്നും എം എ ബേബി വ്യക്തമാക്കി.
തെറ്റുകൾ ഉണ്ടായിട്ടുണ്ടെങ്കിൽ അത് തിരുത്താൻ കഴിയണമെന്നും എം ൺ ബേബി ചൂണ്ടിക്കാണിച്ചു. ഇഎംഎസും ലെനിനും ഉൾപ്പെടെയുള്ള നേതാക്കൾ തെറ്റുകൾ പറ്റിയിട്ടുണ്ടെന്നും അത് തിരുത്തുമെന്നും പറഞ്ഞവരാണ്. തെറ്റ് പറ്റിയാൽ ആ തെറ്റ് തിരിച്ചറിയണം, തെറ്റുകൾ തിരുത്താൻ ആവശ്യമായ ഇടപെടൽ വേണം. ജനങ്ങൾ പറയുന്നതിൽനിന്ന് എന്തെങ്കിലും സ്വീകരിക്കാനുണ്ടെങ്കിൽ അത് ഉൾക്കൊണ്ട് സിപിഎം മുന്നോട്ടുപോകുമെന്നും സിപിഐഎം ജനറൽ സെക്രട്ടറി വ്യക്തമാക്കി. സഖാക്കളായ ബി ടി രണദിവെ, ഇഎംഎസ്, നായനാർ, വി എസ്, പിണറായി തുടങ്ങി അടക്കം ഈ പാർട്ടിയുടെ ഓരോ ഘടകത്തിൽ ഉള്ളവരും ചർച്ചയുടെ ഭാഗമായി തിരുത്തൽ നടപടികൾക്ക് വിധേയരായവരാണ്. അത് പാർട്ടിക്ക് ആകെ ബാധകമായ തത്വമാണ് എന്നും എം എ ബേബി വ്യക്തമാക്കി.
ഇപ്പോൾ പാർട്ടിക്ക് സംഭവിച്ചിരിക്കുന്ന ക്ഷീണം നമ്മൾ സത്യസന്ധമായി തിരിച്ചറിയണമെന്നും എം എം ബേബി ചൂണ്ടിക്കാണിച്ചു. പാർട്ടിക്ക് ഉണ്ടായ ക്ഷീണത്തിൽ വ്യാജപ്രതീതി നിർമാണം വലിയ പങ്ക് വഹിച്ചിട്ടുണ്ട്. ഈ വ്യാജപ്രതീതി നിർമാണം നടക്കുന്നുണ്ടെന്ന് തിരിച്ചറിയാനും അത് തുറന്നുകാട്ടാനും പരാജയപ്പെടുത്താനും നമ്മൾ ജാഗ്രത പാലിച്ചില്ലെന്നും തെറ്റായ പ്രചാരണം നടക്കുമ്പോൾ അത് ജനങ്ങൾ മനസ്സിലാക്കി കൊള്ളും എന്ന് കരുതാതെ ശരിയായ വിശദീകരണം നൽകേണ്ടതുണ്ടെന്നും സിപിഐഎം ജനറൽ സെക്രട്ടറി വ്യക്തമാക്കി. സിപിഐഎമ്മിന് ആർഎസ്എസുമായി ബന്ധമുണ്ടെന്ന വ്യാജപ്രതീതി സൃഷ്ടിച്ചുവെന്നും എം എ ബേബി പറഞ്ഞു. ആർഎസ്എസുകാർ കൊലപ്പെടുത്തിയ കെ വി സുധീഷും ഭാസ്കര കുമ്പഴയും അടക്കമുള്ള സിപിഐഎം പ്രവർത്തകരുടെ പേര് പറഞ്ഞായിരുന്നു എം എ ബേബി സിപിഐഎമ്മിനെ ഇല്ലാതാക്കാൻ ആർഎസ്എസ് നടത്തിയ ശ്രമങ്ങളെക്കുറിച്ച് പറഞ്ഞത്. ആർഎസ്എസ് ആക്രമണത്തിൽ മൃതപ്രായനായ പി ജയരാജൻ ഈ യോഗത്തിൽ പങ്കെടുക്കുന്നുണ്ടെന്നും എം എ ബേബി ചൂണ്ടിക്കാണിച്ചു.
സിപിഐഎമ്മിനെ വിമർശിക്കുന്നവർ നാല് കൂട്ടരാണെന്നും എം എ ബേബി ചൂണ്ടിക്കാണിച്ചു. പാർട്ടിക്ക് ഒരു ദോഷം സംഭവിക്കരുതെന്നും പാർട്ടി ഇവിടെ വേണമെന്നും ആഗ്രഹിച്ച് വിമർശിക്കുന്നവരാണ് ഒരു കൂട്ടർ. അവരുടെ വിമർശനങ്ങൾ ഉൾക്കൊള്ളുകയും തിരുത്തുകയും വേണമെന്നും എം എ ബേബി പറഞ്ഞു. മറ്റ് ചിലർ വ്യാജ പ്രതീതി നിർമ്മാണത്തിൽ വിശ്വസിച്ച് വൈകാരികമായി വിമർശിക്കും. അവരെ ക്ഷമയോടെ കേട്ട് ശരി ബോധ്യപ്പെടുത്താമെന്നും സിപിഐഎം ജനറൽ സെക്രട്ടറി ചൂണ്ടിക്കാണിച്ചു. മറ്റൊരു കൂട്ടർ പ്രസ്ഥാനത്തെ തകർക്കാൻ വേണ്ടി വിമർശിക്കുന്നവരാണ്. നാലാമത്തെ കൂട്ടർ വിവിധ ഘടകങ്ങളിൽ പ്രവർത്തിക്കുന്ന പാർട്ടി അംഗങ്ങളാണ് എന്നും എം എ ബേബി പറഞ്ഞു. പാർട്ടിയുടെ സംഘടനാ ചുമതലകൾ നിർവ്വഹിക്കുന്നതിനൊപ്പം വിമർശനവും സ്വയം വിമർശനവും നടത്തേണ്ട ഉത്തരവാദിത്വം പാർട്ടി അംഗങ്ങൾക്കുണ്ടെന്നും എം എ ബേബി പറഞ്ഞു. പാർട്ടിയിൽ പറയേണ്ട വിമർശനങ്ങളും സ്വയം വിമർശനവും പാർട്ടിയിൽ പറയണമെന്നും സ്വതന്ത്രമായും നിര്‍ഭയമായും സത്യസന്ധമായും വിമര്‍ശനവും സ്വയം വിമര്‍ശനവും നടത്തണമെന്നും എം എ ബേബി പറഞ്ഞു. അത് മാധ്യമങ്ങൾക്ക് ചോർത്തരുതെന്നും എം എ ബേബി നിർദേശിച്ചു.
ബിജെപിയെ അധികാരത്തിലെത്തിയ മറ്റൊരു രാഷ്ട്രീയ പാർട്ടിയെന്ന നിലയിൽ കാണുന്നത് അപകടമാണെന്നും എം എ ബേബി ചൂണ്ടിക്കാണിച്ചു. ബിജെപി ഭരണത്തിൽ ഇന്ത്യൻ ഭരണകൂടത്തിന്റെ മർമ്മപ്രധാന സ്ഥാനങ്ങളിലെല്ലാം ആർഎസ്എസ് അതിൻ്റെ സ്വാധീനം ഉറപ്പിച്ച് കൊണ്ടിരിക്കുകയാണെന്നും എം എ ബേബി വിമർശിച്ചു. കോടതികളിൽ വരെ വലിയ തോതിലുള്ള സ്വാധീനമായി എന്നും പല കോടതി വിധികളും ഇതിന് ഉദാഹരണമാണെന്നും എം എ ബേബി പറഞ്ഞു. ഇത് പറയുന്നതിൻ്റെ പേരിൽ കേടതി അലക്ഷ്യമാണെന്ന നിലയിൽ സുപ്രീം കോടതി ഏത്തമിടീക്കാൻ വിളിച്ച് കോടതിയിൽ പോയും ഇത് പറയുമെന്നും സിപിഐഎം ജനറൽ സെക്രട്ടറി വ്യക്തമാക്കി. രാജ്യത്തിൻ്റെ അന്വേഷണ ഏജൻസികളിലും ആർഎസ്എസ് നുഴഞ്ഞ് കയറുകയാണെന്ന് എം എ ബേബി കുറ്റപ്പെടുത്തി. അന്വേഷണ ഏജൻസികളിൽ RSS നുഴഞ്ഞ് കയറുന്നതിൻ്റെ പ്രത്വാഘാതം കേരളത്തിൽ ഇപ്പോൾ നമ്മുടെ പാർട്ടി നേതൃത്വം നേരിട്ട് കൊണ്ടിരിക്കുകയാണ്. അധികം വിശദീകരണങ്ങൾ ഒന്നും നൽകേണ്ട കാര്യമില്ല എന്നായിരുന്നു പിണറായി വിജയനെതിരായ ഇ ഡി നീക്കം പരോക്ഷമായി പരമാർശിച്ച് എം എ ബേബിയുടെ വിമർശനം.
ആഗോള രാഷ്ട്രീയ സാഹചര്യങ്ങളും പ്രസംഗത്തിൽ എം എ ബേബി വിശദീകരിച്ചു. അമേരിക്കൻ പ്രസിഡൻ്റ് ഡോണൾഡ് ട്രംപ് ലോകത്തിൻ്റെ മൊത്തം പ്രസിഡൻ്റ് ചമയുകമയാണെന്ന വിമർശനവും പ്രസംഗത്തിൽ എം എ ബേബി ഉയർത്തി. വെനിസ്വേലൻ പ്രസിഡൻ്റിനെയും ഭാര്യയെയും അവിടെയെത്തി പിടികൂടി അമേരിക്കയിൽ തടവിൽ പാർപ്പിച്ചിരിക്കുന്നതിനെ വിമർശിച്ച എം എ ബേബി ട്രംപിൻ്റെ കണ്ണ് വെനസ്വേലയുടെ എണ്ണ സമ്പത്തിലാണെന്നും കുറ്റപ്പെടുത്തി. തട്ടിപ്പറിക്കാരനായ ഒരു തെമ്മാടിയെ പോലെ ഡോണൾഡ് ട്രംപ് പെരുമാറുന്നതിൻ്റെ പ്രത്യാഘാതങ്ങൾ ലോകത്ത് ഉണ്ടെന്നും സിപിഐഎം ജനറൽ സെക്രട്ടറി ചൂണ്ടിക്കാണിച്ചു. പുതിയ മംദാനിമാർ അമേരിക്കയിൽ ഉണ്ടായിക്കൊണ്ട് ഇരിക്കുകയാണെന്ന് ചൂണ്ടിക്കാണിച്ച എം എ ബേബി സോഷ്യലിസ്റ്റ് ബോധത്തിലേയ്ക്ക് ഡമോക്രാറ്റിക് പാർട്ടിക്കുള്ളിൽ ചില വിഭാഗങ്ങൾ രൂപപ്പെട്ടു വരുന്നുണ്ടെന്നും വ്യക്തമാക്കി. ലോകത്തിൻ്റെ വിവിധ ഭാഗങ്ങളിൽ ഉണ്ടാകുന്ന ഇടത് മുന്നേറ്റങ്ങൾ മാധ്യമങ്ങൾ അടക്കം അർഹിക്കുന്ന പ്രധാന്യത്തോടെ ജനങ്ങളെ അറിയിക്കുന്നില്ലെന്ന വിമർശനവും എം എ ബേബി ഉന്നയിച്ചു. ഡൽഹിയിൽ നടക്കുന്ന ബ്രിക്സ് ഉച്ചകോടിയുടെ പ്രധാന്യത്തെക്കുറിച്ചും എം എ ബേബി പ്രസംഗത്തിൽ വ്യക്തമാക്കി.
Content Highlights: CPIM General Secretary M A Baby said the interventions of the Communist Party played a key role in the achievements Kerala has attained
