LIVE TV
കൊച്ചി: ഡല്ഹിയില് കോക്രോച്ച് ജനതാപാർട്ടിയുടെ നേതൃത്വത്തില് നടക്കുന്ന വിദ്യാര്ത്ഥി സമരത്തിന് ഐക്യദാര്ഢ്യം പ്രഖ്യാപിച്ച് റാപ്പർ വേടന്റെ ആസാദി യാത്ര ഞായറാഴ്ച കൊച്ചിയില് നടക്കും. വൈകിട്ട് 3 ന് ഭരണഘടന ഉയര്ത്തിപ്പിടിച്ചായിരിക്കും പദയാത്ര സംഘടിപ്പിക്കുന്നത്. ഡല്ഹി പ്രക്ഷോഭത്തെ അനുകൂലിച്ച് കഴിഞ്ഞ ദിവസം പനമ്പള്ളി നഗറിൽ സംഘടിപ്പിച്ച വേടൻ പങ്കെടുത്ത പരിപാടിക്കെതിരെ പൊലീസ് കേസെടുത്തിരുന്നു.
വേടന്റെ മാനേജറായ വിഗ്നേഷിനും കണ്ടാലറിയാവുന്ന 99 പേര്ക്കെതിരെയുമായിരുന്നു എറണാകുളം ടൗണ് സൗത്ത് പൊലീസ് കേസെടുത്തത്. പൊലീസിന്റെ അനുമതിയില്ലാതെ പരിപാടി നടത്തിയെന്നായിരുന്നു ആരോപണം. ഇതിന് പിന്നാലെയാണ് നാളത്തെ ആസാദി യാത്ര.
വേടന്റെ പരിപാടിക്കെതിരെ കേസെടുത്തതിൽ രൂക്ഷവിമർശനവുമായി സിപിഐഎം രംഗത്തെത്തിയിരുന്നു. ഡല്ഹിയില് രാഹുല്ഗാന്ധിക്കൊപ്പം സമരം, കേരളത്തില് സമരക്കാര്ക്കെതിരെ കേസ് എന്നതാണ് മുഖ്യമന്ത്രി വി ഡി സതീശന്റെ ലൈന് എന്നാണ് സിപിഐഎം സംസ്ഥാന സെക്രട്ടറി എം വി ഗോവിന്ദൻ പറഞ്ഞത്. വേടനെതിരെ എടുത്ത കേസ് പിന്വലിക്കണമെന്നും അദ്ദേഹം ആവശ്യപ്പെട്ടു.
Content Highlights: Vedans Azadi Yatra to Take Place in Kochi on Sunday
