LIVE TV
കണ്ണൂര്: സമസ്ത നേതാവ് സത്താര് പന്തല്ലൂരിന്റെ പ്രസ്താവനയ്ക്ക് എതിരെ സിപിഐഎം നേതാവ് പി ജയരാജന്. മതവിശ്വാസികള് കമ്മ്യൂണിസ്റ്റ് പാര്ട്ടിയില് അംഗത്വമെടുക്കാന് പാടില്ലെന്ന സത്താര് പന്തല്ലൂരിന്റെ പ്രസ്താവന കേരളത്തിലെ പ്രബുദ്ധമായ രാഷ്ട്രീയ മണ്ഡലത്തില് വിലപ്പോകുന്നതല്ലെന്ന് പി ജയരാജന് ഫേസ്ബുക്കില് കുറിച്ചു. വിശ്വാസികളെ ഇടതുപക്ഷത്ത് നിന്ന് അകറ്റാന് നോക്കുന്നവര് തങ്ങളുടെ സ്വന്തം രാഷ്ട്രീയ സഖ്യങ്ങളിലെയും നിലപാടുകളിലെയും ഇരട്ടത്താപ്പുകളാണ് ആദ്യം പരിശോധിക്കേണ്ടതെന്ന് അദ്ദേഹം പറഞ്ഞു.
'ഒരു യഥാര്ത്ഥ വിശ്വാസിക്ക് കമ്മ്യൂണിസ്റ്റ് പാര്ട്ടിയില് പ്രവര്ത്തിക്കാന് യാതൊരു തടസ്സവുമില്ലെന്ന് മാത്രമല്ല, വിശ്വാസികളുടെ അവകാശങ്ങള് സംരക്ഷിക്കുന്നത് ഇടതുപക്ഷമാണെന്ന് തെളിയിക്കാന് കൃത്യമായ കാരണങ്ങളുണ്ട്. ഇസ്ലാമിക പ്രമാണങ്ങള് പ്രകാരം ഏറ്റവും വലിയ വന്പാപങ്ങളില് ഒന്നാണ് പലിശ (രിബ). പലിശ ബാങ്ക് നടത്തുന്ന ലീഗുകാരനാകാമെങ്കില്, ചൂഷണത്തിനെതിരെ പോരാടുന്ന കമ്മ്യൂണിസ്റ്റുകാരനാകാന് ഒരു വിശ്വാസിക്ക് നൂറുവട്ടം യോഗ്യതയുണ്ട്', പി ജയരാജന് പറഞ്ഞു.
അധികാരത്തിന് വേണ്ടി സ്വന്തം മതനിയമങ്ങളില് ലീഗ് വിട്ടുവീഴ്ച ചെയ്യുമ്പോള് സത്താര് മൗനം പാലിക്കുന്നത് അദ്ദേഹത്തിന്റെ രാഷ്ട്രീയ പാപ്പരത്തമാണ് കാണിക്കുന്നതെന്ന് പി ജയരാജന് കൂട്ടിച്ചേര്ത്തു. ഒരു വിശ്വാസിയുടെയും ആരാധനാ സ്വാതന്ത്ര്യത്തില് പാര്ട്ടി ഇടപെടാറില്ല. കെ ടി ജലീലിനെപ്പോലെയോ, അദ്ദേഹത്തിന്റെ ഭാര്യ ഫാത്തിമ കുട്ടിയെപ്പോലെയോ ഉള്ള ആയിരക്കണക്കിന് പ്രായോഗിക വിശ്വാസികള് ഇന്ന് കമ്മ്യൂണിസ്റ്റ് പാര്ട്ടിയില് മെമ്പര്ഷിപ്പെടുത്ത് അന്തസ്സോടെ ജീവിക്കുന്നുണ്ടെന്നും അദ്ദേഹം പറഞ്ഞു.
'ഭരണഘടന ഉറപ്പുനല്കുന്ന മതസ്വാതന്ത്ര്യം സംരക്ഷിക്കാന് കമ്മ്യൂണിസ്റ്റുകാര് നടത്തുന്ന പോരാട്ടങ്ങളാണ് ഇന്ത്യയിലെ ന്യൂനപക്ഷങ്ങള്ക്ക് ഇന്ന് ഏക ആശ്വാസം. പൗരത്വ ഭേദഗതി നിയമത്തിനെതിരെയും ഫാസിസത്തിനെതിരെയും ഇടതുപക്ഷം കാണിച്ച ആര്ജ്ജവം ലീഗിനോ സത്താറിനോ അവകാശപ്പെടാനില്ല. വിശക്കുന്നവന് ഭരണഘടനയും അവകാശങ്ങളും ഉറപ്പാക്കുന്ന പാര്ട്ടിയാണ് കമ്മ്യൂണിസ്റ്റ് പാര്ട്ടി. അതുകൊണ്ട് തന്നെ, ചൂഷകര്ക്കും ഫാസിസത്തിനുമെതിരെ പോരാടുന്ന ഒരു കമ്മ്യൂണിസ്റ്റുകാരനാകാന് യഥാര്ത്ഥ മതവിശ്വാസിക്ക് യാതൊരു തടസ്സവുമില്ല. മതാചാരം അനുഷ്ഠിച്ചു ജീവിക്കുന്ന ഒരാള്ക്ക് പാര്ട്ടി അംഗത്വം പറ്റില്ലെന്ന ഒരു വ്യവസ്ഥയും സിപിഐഎം ഭരണഘടനയില് ഇല്ല', പി ജയരാജന് പറഞ്ഞു.
ഫേസ്ബുക്ക് പോസ്റ്റിന്റെ പൂര്ണരൂപം
മതവിശ്വാസികള് കമ്മ്യൂണിസ്റ്റ് പാര്ട്ടിയില് അംഗത്വമെടുക്കാന് പാടില്ലെന്ന സത്താര് പന്തല്ലൂരിന്റെ പ്രസ്താവന കേരളത്തിലെ പ്രബുദ്ധമായ രാഷ്ട്രീയ മണ്ഡലത്തില് വിലപ്പോകുന്നതല്ല. കമ്മ്യൂണിസം ഭൗതികവാദത്തില് അധിഷ്ഠിതമാണെന്ന സ്ഥിരം പല്ലവി പാടി വിശ്വാസികളെ ഇടതുപക്ഷത്ത് നിന്ന് അകറ്റാന് നോക്കുന്നവര് തങ്ങളുടെ സ്വന്തം രാഷ്ട്രീയ സഖ്യങ്ങളിലെയും നിലപാടുകളിലെയും ഇരട്ടത്താപ്പുകളാണ് ആദ്യം പരിശോധിക്കേണ്ടത്.
ഒരു യഥാര്ത്ഥ വിശ്വാസിക്ക് കമ്മ്യൂണിസ്റ്റ് പാര്ട്ടിയില് പ്രവര്ത്തിക്കാന് യാതൊരു തടസ്സവുമില്ലെന്ന് മാത്രമല്ല, വിശ്വാസികളുടെ അവകാശങ്ങള് സംരക്ഷിക്കുന്നത് ഇടതുപക്ഷമാണെന്ന് തെളിയിക്കാന് കൃത്യമായ കാരണങ്ങളുണ്ട്.
1 പലിശ ബാങ്കുകള് നടത്തുന്നവരുമായുള്ള 'വിശുദ്ധ' സഖ്യം
ഇസ്ലാമിക പ്രമാണങ്ങള് പ്രകാരം ഏറ്റവും വലിയ വന്പാപങ്ങളില് ഒന്നാണ് പലിശ (രിബ). പലിശ വാങ്ങുന്നവനും കൊടുക്കുന്നവനും എഴുതുന്നവനും നരകത്തിലാണ് എന്നാണ് വിശ്വാസപ്രമാണം. എന്നാല് സത്താറിന്റെ രാഷ്ട്രീയ രക്ഷാധികാരികളായ മുസ്ലിം ലീഗ് നേതാക്കള് പ്രസിഡന്റുമാരായി ഇരിക്കുന്ന എത്രയോ സഹകരണ ബാങ്കുകളാണ് കേരളത്തിലുള്ളത്? ഇവയെല്ലാം പൂര്ണ്ണമായും പലിശയിന്മേലാണ് പ്രവര്ത്തിക്കുന്നത്.
മതനിയമങ്ങള് അക്ഷരാര്ത്ഥത്തില് ലംഘിച്ച്, പലിശപ്പണം കൊണ്ട് രാഷ്ട്രീയം കളിക്കുന്ന ലീഗുകാര്ക്ക് 'വിശ്വാസി'പ്പട്ടം നല്കുകയും, പാവപ്പെട്ടവന്റെ വിശപ്പകറ്റാന് പോരാടുന്ന കമ്മ്യൂണിസ്റ്റുകാരെ 'അവിശ്വാസി'കളാക്കി മാറ്റിനിര്ത്തുകയും ചെയ്യുന്നത് എന്ത് തരം ആദര്ശമാണ്? പലിശ ബാങ്ക് നടത്തുന്ന ലീഗുകാരനാകാമെങ്കില്, ചൂഷണത്തിനെതിരെ പോരാടുന്ന കമ്മ്യൂണിസ്റ്റുകാരനാകാന് ഒരു വിശ്വാസിക്ക് നൂറുവട്ടം യോഗ്യതയുണ്ട്.
2 സ്ത്രീ വിരുദ്ധതയും രാഷ്ട്രീയ കപടതയും
സ്ത്രീകളുടെ പൊതുരംഗപ്രവേശനം, തെരഞ്ഞെടുപ്പുകളില് മത്സരിക്കല് എന്നിവയെ ഇദ്ദേഹം പരസ്യമായി എതിര്ക്കുന്ന ഒന്നാണ്. എന്നാല് മുസ്ലിം ലീഗ് തങ്ങളുടെ രാഷ്ട്രീയ നിലനില്പ്പിനായി വനിതാ സ്ഥാനാര്ത്ഥികളെ വോട്ടുചോദിക്കാന് തെരുവിലിറക്കുകയും എംഎല്എമാരാക്കുകയും ചെയ്യുന്നു.
തങ്ങളുടെ ആദര്ശത്തിന് വിരുദ്ധമായി സ്ത്രീകളെ പൊതുരംഗത്തിറക്കുന്ന ലീഗിനെ കണ്ണടച്ച് പിന്തുണയ്ക്കുന്ന സത്താറിന് കമ്മ്യൂണിസ്റ്റ് പാര്ട്ടിയുടെ സ്ത്രീപക്ഷ നിലപാടുകളെയും ലിംഗസമത്വത്തെയും ചോദ്യം ചെയ്യാന് എന്ത് ധാര്മ്മിക അവകാശമാണുള്ളത്? അധികാരത്തിന് വേണ്ടി സ്വന്തം മതനിയമങ്ങളില് ലീഗ് വിട്ടുവീഴ്ച ചെയ്യുമ്പോള് സത്താര് മൗനം പാലിക്കുന്നത് അദ്ദേഹത്തിന്റെ രാഷ്ട്രീയ പാപ്പരത്തമാണ് കാണിക്കുന്നത്.
3 കമ്മ്യൂണിസം വിശ്വാസത്തിന് എതിരല്ല, ചൂഷണത്തിന് എതിരാണ്
കമ്മ്യൂണിസ്റ്റ് പാര്ട്ടി വിഭാവനം ചെയ്യുന്നത് മനുഷ്യന്റെ സാമ്പത്തിക-സാമൂഹിക സമത്വമാണ്. ഒരു വിശ്വാസിയുടെയും ആരാധനാ സ്വാതന്ത്ര്യത്തില് പാര്ട്ടി ഇടപെടാറില്ല. കെ ടി ജലീലിനെപ്പോലെയോ, അദ്ദേഹത്തിന്റെ ഭാര്യ ഫാത്തിമ കുട്ടിയെപ്പോലെയോ ഉള്ള ആയിരക്കണക്കിന് പ്രായോഗിക വിശ്വാസികള് ഇന്ന് കമ്മ്യൂണിസ്റ്റ് പാര്ട്ടിയില് മെമ്പര്ഷിപ്പെടുത്ത് അന്തസ്സോടെ ജീവിക്കുന്നുണ്ട്.
ഭരണഘടന ഉറപ്പുനല്കുന്ന മതസ്വാതന്ത്ര്യം സംരക്ഷിക്കാന് കമ്മ്യൂണിസ്റ്റുകാര് നടത്തുന്ന പോരാട്ടങ്ങളാണ് ഇന്ത്യയിലെ ന്യൂനപക്ഷങ്ങള്ക്ക് ഇന്ന് ഏക ആശ്വാസം. പൗരത്വ ഭേദഗതി നിയമത്തിനെതിരെയും (CAA) ഫാസിസത്തിനെതിരെയും ഇടതുപക്ഷം കാണിച്ച ആര്ജ്ജവം ലീഗിനോ സത്താറിനോ അവകാശപ്പെടാനില്ല.
ആശയപരമായ ഭൗതികവാദത്തെ ചൂണ്ടിക്കാട്ടി കമ്മ്യൂണിസ്റ്റ് വിരുദ്ധത പ്രസംഗിക്കുന്നവര് സ്വന്തം അണികളിലെ പലിശ ഇടപാടുകാരെയും സ്ത്രീവിരുദ്ധ നിലപാടുകളെയും മൂടിവെക്കാനാണ് ശ്രമിക്കുന്നത്. വിശക്കുന്നവന് ഭരണഘടനയും അവകാശങ്ങളും ഉറപ്പാക്കുന്ന പാര്ട്ടിയാണ് കമ്മ്യൂണിസ്റ്റ് പാര്ട്ടി. അതുകൊണ്ട് തന്നെ, ചൂഷകര്ക്കും ഫാസിസത്തിനുമെതിരെ പോരാടുന്ന ഒരു കമ്മ്യൂണിസ്റ്റുകാരനാകാന് യഥാര്ത്ഥ മതവിശ്വാസിക്ക് യാതൊരു തടസ്സവുമില്ല. താത്വികമായ തര്ക്കങ്ങളേക്കാള് പ്രായോഗികമായ നീതിയിലാണ് കമ്മ്യൂണിസം വിശ്വസിക്കുന്നത്. മതാചാരം അനുഷ്ഠിച്ചു ജീവിക്കുന്ന ഒരാള്ക്ക് പാര്ട്ടി അംഗത്വം പറ്റില്ലെന്ന ഒരു വ്യവസ്ഥയും സിപിഐഎം ഭരണഘടനയില് ഇല്ല.
Content Highlights: CPIM leader P Jayarajan has responded to a statement made by Samastha leader Sathar Panthallur
