LIVE TV
കോഴിക്കോട്: കോഴിക്കോട് പാളയത്ത് വൻ തീപിടിത്തം. പാളയം റെയിൽവെ സ്റ്റേഷന് സമീപമുള്ള ജയലക്ഷ്മി ടെകസ്റ്റൈൽസിലാണ് തീപിടിത്തമുണ്ടായത്. ഫയര്ഫോഴ്സെത്തി തീ അണയ്ക്കാനുള്ള ശ്രമം തുടരുകയാണ്. ടെകസ്റ്റൈൽസിന്റെ രണ്ടും മൂന്നു നിലകളിൽ തീ ആളിപ്പടരുകയാണ്. മീഞ്ചന്ത, ബീച്ച്, വെള്ളിമാടുകുന്ന് എന്നീ ഫയര്സ്റ്റേഷനുകളിൽ നിന്നുള്ള ഫയര്ഫോഴ്സാണ് സ്ഥലത്തെത്തിയിരിക്കുന്നത്.
തീപടര്ന്ന ഉടനെ ജീവനക്കാരെയും ഉപഭോക്താക്കളെയും പുറത്തിറക്കി. കെട്ടിടത്തിന്റെ പിൻഭാഗത്ത് നിന്നാണ് തീപടര്ന്നത്. തുടര്ന്ന് മുകളിലത്തെ നിലയിലേക്ക് ആളിപ്പടരുകയായിരുന്നു. കെട്ടിടത്തിനുള്ളിൽ ആളുകള് ഇല്ലെന്നാണ് പ്രാഥമിക നിഗമനം. പതിനായിരം ചതുരശ്ര അടിയിലുള്ള കെട്ടിടത്തിന്റെ മൂന്ന് നിലകളിലായാണ് തീപിടിച്ചത്. വെഡ്ഡിങ് സെക്ഷനിലെ വസ്ത്രങ്ങള് സൂക്ഷിച്ച ഗോഡൗണിന്റെ ഭാഗത്ത് നിന്നുമാണ് തീ ആദ്യം ആളിപ്പടര്ന്നത്.
തീപിടിച്ചതിനെതുടര്ന്ന് ടെകസ്റ്റൈൽസിലെ ഗ്ലാസുകള് പൊട്ടിത്തെറിക്കുന്നത് രക്ഷാപ്രവര്ത്തനത്തിന് വെല്ലുവിളിയായി മാറുന്നുണ്ട്. നിലവിൽ രക്ഷപ്രവർത്തനം അതിവേഗം പുരോഗമിക്കുകയാണ്. സ്ഥലത്തേയ്ക്ക് കൂടുതൽ ഫയർഫോഴ്സ് സംഘത്തിന് എത്തിച്ചേരാനായി റോഡുകൾ ബ്ലോക്ക് ചെയ്ത് വഴിയൊരുക്കിയിട്ടുണ്ട്.
Content Highlights: Kozhikode major fire: Fire breaks out at Jayalakshmi Textiles; Rescue operations continue
