തമിഴിലും തെലുങ്കിലും സ്റ്റാർഡത്തിന്റെ ഭാരമില്ല, മലയാളത്തിൽ വലിയ സിനിമകളാണ് വരുന്നത്; ദുൽഖർ സൽമാൻ

മലയാള സിനിമ പാന്‍ ഇന്ത്യന്‍ തിയേറ്റര്‍ ബിസിനസില്‍ ഇനിയും വലിയ മുന്നേറ്റം നടത്താനുണ്ടെന്നും താരം

തമിഴിലും തെലുങ്കിലും സ്റ്റാർഡത്തിന്റെ ഭാരമില്ല, മലയാളത്തിൽ വലിയ സിനിമകളാണ് വരുന്നത്; ദുൽഖർ സൽമാൻ
dot image

തമിഴിലും തെലുങ്കിലും തനിക്ക് സ്റ്റാര്‍ഡത്തിന്റെ ഭാരമില്ലെന്ന് നടന്‍ ദുല്‍ഖര്‍ സല്‍മാന്‍. മലയാളത്തിലെത്തുമ്പോള്‍ വലിയ സിനിമകളാണ് എനിക്കായി ഒരുങ്ങാറുള്ളതെന്നും താരം. ഇത് എന്റെ പ്രശ്‌നമോ എന്നെ വച്ച് സിനിമ ചെയ്യുന്ന സംവിധായകരുടെ പ്രശ്‌നമോ അല്ലെന്നും ദുല്‍ഖര്‍ സല്‍മാന്‍.

ഒടിടി പ്ലാറ്റ്ഫോമുകളിലൂടെ ഭാഷാ അതിര്‍ത്തികള്‍ മലയാള സിനിമ മറികടന്നിട്ടുണ്ടെങ്കിലും പാന്‍ ഇന്ത്യന്‍ തിയേറ്റര്‍ ബിസിനസില്‍ ഇനിയും വലിയ മുന്നേറ്റം നടത്താനുണ്ട്. ഈ ലക്ഷ്യത്തിലേക്കുള്ള ശ്രമങ്ങളുടെ ഭാഗമായാണ് വലിയ ബജറ്റിലുള്ള ചിത്രങ്ങള്‍ തന്നെ തേടിയെത്തുന്നതെന്നും ദുല്‍ഖര്‍ പറഞ്ഞു. 'ആകാശത്തില്‍ ഒരു താരകം' (AOT) എന്ന പുതിയ ചിത്രത്തിന്റെ പ്രചാരണത്തിന്റെ ഭാഗമായി ഗലാട്ട പ്ലസിന് നല്‍കിയ അഭിമുഖത്തിലായിരുന്നു ദുല്‍ഖറിന്റെ പ്രതികരണം.

ദുല്‍ഖറിന്റെ വാക്കുകള്‍:

'തമിഴിലോ തെലുങ്കിലോ എനിക്ക് സ്റ്റാര്‍ഡത്തിന്റെ ഭാരമില്ല. ഞാന്‍ കുറച്ചൊക്കെ ബാങ്കബിള്‍ ആണെന്നാണ് കരുതുന്നത്. എനിക്ക് വിശ്വാസമുള്ള കഥകള്‍ സിനിമയാക്കാനും എനിക്ക് കഴിയുന്നുണ്ട്. നിലവില്‍ മലയാളത്തില്‍ എന്തൊക്കെയോ കാരണങ്ങള്‍കൊണ്ട് കുറേക്കൂടി വലിയ ബജറ്റിലുള്ള ചിത്രങ്ങളാണ് എന്നെ തേടി വരുന്നത്. അത് എന്റെയോ സംവിധായകരുടെയോ കുറ്റമാണെന്നല്ല പറയുന്നത്.

എന്നെ സമീപിക്കുന്നവര്‍ വലിയ സിനിമകളുമായാണ് വരുന്നത്. ഒരുപക്ഷേ ഞങ്ങളുടെ സ്വപ്നങ്ങള്‍ അത്രത്തോളം വലുതായതുകൊണ്ടാകാം. ഒടിടിയിലെല്ലാം ഞങ്ങള്‍ അതിര്‍ഥികളുടെ കടമ്പ മുറിച്ചുകടന്നിട്ടുണ്ട്. എല്ലാവരും ഞങ്ങളുടെ സിനിമ കാണുന്നുണ്ട്. പക്ഷേ നിങ്ങള്‍ പാന്‍ ഇന്ത്യ എന്നു വിശേഷിപ്പിക്കുന്ന തിയേറ്റര്‍ ബിസിനസ് ഇപ്പോഴും ഞങ്ങള്‍ മറികടന്നിട്ടില്ല. അതിനു ശ്രമിക്കുന്ന തരം സിനിമകളാണെന്നു തോന്നുന്നു എനിക്ക് കിട്ടുന്നത്. ഞാന്‍ മറ്റു ഭാഷകളിലും സിനിമകള്‍ ചെയ്യുന്നതുകൊണ്ട് ആ മാര്‍ക്കെറ്റുണ്ടെന്ന പ്രതീക്ഷയിലായിരിക്കാം'.

Content Highlights: Dulquer Salmaan states that there is no burden of stardom in Tamil and Telugu, whereas in Malayalam, large-scale films are being produced. The actor adds that Malayalam cinema has significant strides yet to make in the pan-Indian theatrical market.

dot image
To advertise here,contact us
dot image