LIVE TV
തിരുവനന്തപുരം: ബലാത്സംഗക്കേസ് പ്രതി രാഹുല്‍ മാങ്കൂട്ടത്തില്‍ എംഎൽഎ കോണ്‍ഗ്രസ് സ്ഥാനാര്‍ത്ഥികള്‍ക്കുവേണ്ടി പ്രചാരണത്തില്‍ ഇറങ്ങേണ്ടതില്ലെന്ന് കെ മുരളീധരന്‍. രാഹുലിനെ ഒരു പരിപാടിയിലും കയറ്റേണ്ടതില്ലായെന്ന് പറഞ്ഞതാണെന്നും കെ മുരളീധരന്‍ പറഞ്ഞു. ഉദിച്ചുയരേണ്ട താരങ്ങള്‍ ഉദിക്കും, അല്ലാത്തത് അസ്തമിക്കുമെന്നും കെ മുരളീധരന്‍ പറഞ്ഞു.
'കോണ്‍ഗ്രസില്‍ ഇപ്പോള്‍ പാര്‍ട്ടിയിലുള്ള എംഎല്‍എമാര്‍ ആരും ഒളിവിലല്ല. എല്ലാവരും ഫീല്‍ഡിലുണ്ട്. പാര്‍ട്ടിയിലില്ലാത്ത ഞങ്ങള്‍ മാറ്റിനിര്‍ത്തിയ ആരെങ്കിലും ഒളിവിലുണ്ടെങ്കില്‍ കണ്ടുപിടിക്കേണ്ടത് പൊലീസാണ്', കെ മുരളീധരന്‍ പറഞ്ഞു.
സ്വന്തം നിലയ്ക്കാണ് രാഹുല്‍ തെരഞ്ഞെടുപ്പ് പ്രചാരണത്തിന് ഇറങ്ങിയത്. ഇനി അങ്ങോട്ട് കയറ്റേണ്ടെന്ന് പറഞ്ഞിട്ടുമുണ്ട് പാര്‍ട്ടി. സസ്‌പെന്‍ഷന്‍ നടപടി നേരിടുന്ന ആളുടെ നടപടിയില്‍ പാര്‍ട്ടിക്ക് ഉത്തരവാദിത്തം ഇല്ല. വേണ്ട താരങ്ങള്‍ ഉദിച്ചുവരും. അല്ലാത്തത് അസ്തമിക്കും', കെ മുരളീധരന്‍.
രാഹുലിനെ അനുകൂലിച്ച് മുഖപ്രസംഗം എഴുതിയ കോണ്‍ഗ്രസ് മുഖപത്രം വീക്ഷണത്തോട് വിശദീകരണം ചോദിക്കില്ലെന്നും കെ മുരളീധരൻ പറഞ്ഞു. പത്രസ്വാതന്ത്ര്യം തങ്ങളുടെ പത്രത്തിനും അനുവദിച്ചിട്ടുണ്ട്. തദ്ദേശ തെരഞ്ഞെടുപ്പില്‍ കോണ്‍ഗ്രസിന് അനുകൂലമായ സാഹചര്യമാണ്. സെമി ഫൈനല്‍ വിജയം ഫൈനലിന് ശക്തികൂട്ടും. തിരുവനന്തപുരം കോര്‍പ്പറേഷനില്‍ 55 വാര്‍ഡുകള്‍ പിടിച്ച് അധികാരത്തില്‍ വരും. കവടിയാറും ശാസ്തമംഗലവും പേട്ടയുള്‍പ്പെടെ കോണ്‍ഗ്രസ് ജയിക്കും. വിമതര്‍ക്കെതിരെ എല്ലാ നടപടിയും സ്വീകരിച്ചിട്ടുണ്ട്. ആരും തങ്ങള്‍ക്കൊപ്പമില്ല. പുകഞ്ഞപുള്ളി പുറത്താണെന്നും കെ മുരളീധരന്‍ പറഞ്ഞു.
Content Highlights: k muraleedharan Said Rahul mamkootathil should not campaign for Congress
