Get the latest news at
your fingertips!
Download our app now
LIVE TV
Search
കണ്ണൂർ: രാഹുൽ വിഷയത്തിൽ വീക്ഷണത്തെ തള്ളി സതീശൻ. രാഹുൽ മാങ്കൂട്ടത്തിലിന് അനുകൂലമായ വീക്ഷണം മുഖപ്രസംഗം എഴുതിയതിനെ കുറിച്ച് അതേഴുതിയവരോട് ചോദിക്കണമെന്ന് പ്രതിപക്ഷ നേതാവ് വി ഡി സതീശൻ. കണ്ണൂരിൽ മാധ്യമപ്രവർത്തകരുടെ ചോദ്യത്തിന് മറുപടി നൽകുകയായിരുന്നു അദ്ദേഹം. ശബരിമല വിഷയത്തിലും കണ്ണൂർ പയ്യന്നൂരിൽ പൊലീസ് വാഹനത്തിന് നേരെ ബോംബെറിഞ്ഞ് ശിക്ഷിക്കപ്പെട്ടയാൾക്കെതിരെയും നടപടി സ്വീകരിക്കാത്ത സിപിഐഎമ്മിന്റെ ഇരട്ടമുഖം ഈ തെരഞ്ഞെടുപ്പിൽ ചർച്ചചെയ്യപ്പെടുമെന്നും വി ഡി സതീശൻ പറഞ്ഞു.
വി ഡി സതീശന്റെ വാക്കുകൾ:
'ശബരിമലയിൽ അയ്യപ്പന്റെ സ്വർണം മോഷ്ടിച്ച രണ്ട് മുൻ ദേവസ്വം പ്രസിഡന്റുമാർക്കെതിരെ ഒരു നടപടിയും സിപിഐഎം സ്വീകരിക്കുന്നില്ല. ആഭ്യന്തരവകുപ്പു കൂടി കൈകാര്യം ചെയ്യുന്ന വ്യക്തിയാണ് മുഖ്യമന്ത്രി. നിരപരാധികളായ പൊലീസുകാർ സഞ്ചരിച്ച പൊലീസ് ജീപ്പിന് നേരെ ബോംബെറിഞ്ഞതിന് കോടതി ഇരുപത് വർഷം ശിക്ഷിച്ചയാളാണ് സിപിഐഎമ്മിന്റെ സ്ഥാനാർത്ഥി. ഇതിൽ ധാർമികതയുടെ പ്രശ്‌നമില്ലെന്നാണ് ഡിവൈഎഫ്‌ഐയുടെ പ്രസ്താവന. മോഷ്ടാക്കളെയും ക്രിമിനലുകളെയും സംരക്ഷിക്കുന്ന പാർട്ടിയാണ് സിപിഐഎം എന്നതാണ് പരിതാപകരമായ കാര്യം. എന്ത് ക്രിമിനൽകുറ്റം ചെയ്യുന്നവർക്കും കുട പിടിച്ചുകൊടുക്കുന്ന പാർട്ടിയാണ് സിപിഐഎം. ക്രിമിനലുകളെയും മോഷ്ടാക്കളെയും പ്രോത്സാഹിപ്പിക്കുന്ന സിപിഐഎമ്മിന്റെ ഇരട്ടമുഖം ഈ തെരഞ്ഞെടുപ്പിൽ ഉറപ്പായും ചർച്ചചെയ്യപ്പെടും.
രാഹുൽ വിഷത്തിൽ പാർട്ടി നടപടി സ്വീകരിച്ചിട്ടുണ്ട്. ഒരു വിഷയത്തിൽ ഒരാൾക്കെതിരെ രണ്ടു തവണ നടപടി സ്വീകരിക്കാൻ കഴിയില്ല. ഇതിൽ കെപിസിസി പ്രസിഡന്റ് അഭിപ്രായം പറഞ്ഞിട്ടുണ്ട്. പാർട്ടിയുടെ നിലപാടും അത് തന്നെയാണ്. എല്ലാവരുമായി കൂടിയാലോചന നടത്തിയാണ് അന്ന് നടപടി സ്വീകരിച്ചതും ഇപ്പോഴത്തെ നിലപാട് കെപിസിസി അധ്യക്ഷൻ പറഞ്ഞതും. ഈ വിഷയം വീണ്ടും ഉയർത്തിക്കൊണ്ട് വന്ന് ശബരിമലയിലെ കൊള്ള ഒഴിവാക്കാനുള്ള തന്ത്രം ആര് സ്വീകരിച്ചാലും അതിൽ വീഴിയില്ല. മേൽപ്പറഞ്ഞ കാര്യങ്ങളിൽ നടപടി സ്വീകരിക്കാതെ അത്തരക്കാരെ സംരക്ഷിക്കുന്ന സിപിഐഎമ്മിന് ഇക്കാര്യം ചോദിക്കാനുള്ള ഒരു ധാർമികയുമില്ല. ഇത്തരം ഒരു സാഹചര്യത്തിൽ പരാതി പോലുമില്ലാതെ നടപടിയെടുത്ത കോൺഗ്രസ് തലയുയർത്തിയാണ് നിൽക്കുന്നത്. വീക്ഷണത്തിൽ രാഹുലിനെതിരെ നടന്നത് ഗൂഡാലോചനയാണെന്ന് എഴുതിയത് എഴുതിയവരോട് പോയി ചോദിക്കണം'.
Content Highlights: VD Satheeshan about Veekshanam Editoral Supporting Rahul Mamkootathil
