Get the latest news at
your fingertips!
Download our app now
LIVE TV
Search
കൊച്ചി: ട്വന്റി 20 ജനാധിപത്യ സംവിധാനത്തിന് നേരെ വെല്ലുവിളി ഉയര്‍ത്തുന്ന പാര്‍ട്ടിയാണെന്ന് മുതിര്‍ന്ന കോണ്‍ഗ്ര് നേതാവ് ബെന്നി ബെഹനാന്‍. യുഡിഎഫ് അധികാരത്തില്‍ വന്നാല്‍ പത്ത് വര്‍ഷത്തിനിടെ കിഴക്കമ്പലത്ത് നടന്ന കോണ്‍ട്രാക്ടുകള്‍ സമഗ്രമായി അന്വേഷിക്കുമെന്നും കിഴക്കമ്പലത്ത് നടന്ന അഴിമതികള്‍ പുറത്തുകൊണ്ടുവരുമെന്നും ബെന്നി ബെഹനാന്‍ പറഞ്ഞു. ഈ തെരഞ്ഞെടുപ്പില്‍ ജനങ്ങള്‍ യാഥാര്‍ത്ഥ്യം മനസിലാക്കുമെന്നും അദ്ദേഹം പറഞ്ഞു. കൊച്ചിയില്‍ വാര്‍ത്താസമ്മേളനത്തില്‍ സംസാരിക്കുകയായിരുന്നു അദ്ദേഹം.
'രാഷ്ട്രീയ പാര്‍ട്ടികളെ വെല്ലുവിളിച്ച് രംഗത്തുവന്നവരാണ് ട്വന്റി 20. കിഴക്കമ്പലം മാതൃക എന്നാണ് അവര്‍ വിശേഷിപ്പിച്ചത്. ഭരിക്കുന്നത് ആകെ നാല് പഞ്ചായത്തുകള്‍. ആ നാല് പഞ്ചായത്തുകളിലും നഷ്ടപ്പെടുത്തിയത് കോടിക്കണക്കിന് രൂപയാണ്. കിഴക്കമ്പലത്ത് 10 വര്‍ഷംകൊണ്ട് ലാപ്‌സ് ആക്കിയത് ഇരുപത് കോടി രൂപയാണ്. മഴുവന്നൂര്‍ പഞ്ചായത്തില്‍ 4 വര്‍ഷം കൊണ്ട് ലാപ്‌സ് ആയത് 13 കോടിയോളം രൂപ. സിങ്കപ്പൂര്‍ മോഡല്‍ എന്ന് അവകാശപ്പെടുന്ന ട്വന്റി 20 പഞ്ചായത്തുകളിലെ ഫണ്ട് വിനിയോഗിക്കുന്നതില്‍ ബഹുദൂരം പിന്നിലാണ്. ഈ പഞ്ചായത്തുകളില്‍ വികസന പ്രവര്‍ത്തനങ്ങള്‍ നടന്നിട്ടില്ലെന്നാണ് വിവരാവകാശ കണക്കുകള്‍ വ്യക്തമാക്കുന്നത്': ബെന്നി ബെഹനാന്‍ പറഞ്ഞു.
കേന്ദ്ര, സംസ്ഥാന സര്‍ക്കാരുകളുടെ ഫണ്ടുകള്‍ ട്വന്റി 20 പഞ്ചായത്തുകളില്‍ ചെലവഴിച്ചിട്ടില്ലെന്നും ഫണ്ട് നീക്കിയിരുപ്പ് ഉണ്ടെന്നാണ് ട്വന്റി അവകാശപ്പെടുന്നതെന്നും ബെന്നി ബെഹനാന്‍ പറഞ്ഞു. അത് നീക്കിയിരുപ്പ് അല്ലെന്നും ഉപയോഗിക്കാതെ വെച്ച ഫണ്ടാണെന്നും അദ്ദേഹം പറഞ്ഞു. 'കോര്‍പ്പറേറ്റ് കമ്പനികള്‍ രേഖകളില്‍ വ്യാജമായി ലാഭം കാണിക്കുന്നത് പോലെയാണ് ട്വന്റി 20 പഞ്ചായത്തുകളിലെ കണക്കുകള്‍. 2010-2015 യുഡിഎഫ് ഭരണകാലത്ത് കിഴക്കമ്പലം പഞ്ചായത്ത് ഫണ്ട് വിനിയോഗത്തില്‍ ഏഴാം സ്ഥാനത്തായിരുന്നു. ഇന്നത് എഴുപതാം സ്ഥാനത്താണ്': ബെന്നി ബെഹനാന്‍ പറഞ്ഞു. പട്ടികജാതി ക്ഷേമത്തിന് ചെലവാക്കേണ്ട തുക നാല് പഞ്ചായത്തുകളിലും ട്വന്റി 20 ലാപ്‌സ് ആക്കിയെന്ന് കെപിസിസി വൈസ് പ്രസിഡന്റ് വി പി സജീന്ദ്രനും ആരോപിച്ചു. ട്വന്റി 20 സോഷ്യല്‍ മീഡിയയിലെ ഊതിവീര്‍പ്പിച്ച ബലൂണ്‍ ആണെന്നും കണക്കുകള്‍ നിരത്തിയാണ് ട്വന്റി 20യുടെ കോടികളുടെ തട്ടിപ്പ് തങ്ങള്‍ തുറന്നുകാട്ടുന്നതെന്നും സജീന്ദ്രന്‍ കൂട്ടിച്ചേര്‍ത്തു.
Content Highlights: Congress will expose twenty 20 party curruption in kizhakkambalam says benny behanan
