LIVE TV
അങ്കാറ: ഗസയില്‍ ഇസ്രയേലിന്റെ അതിക്രമങ്ങള്‍ തുടരുമ്പോള്‍ അന്താരാഷ്ട്ര സമൂഹം കാഴ്ചക്കാരായി നില്‍ക്കുകയാണെന്നും, അധിനിവേശ പലസ്തീന്‍ പ്രദേശങ്ങളില്‍ ഇസ്രയേല്‍ നടത്തുന്ന ലംഘനങ്ങളെ തടയുന്നതില്‍ അന്താരാഷ്ട്ര സമൂഹം പരാജയപ്പെട്ടുവെന്നും തുര്‍ക്കി പ്രസിഡന്റ് റജബ് ത്വയ്യിബ് എര്‍ദോഗന്‍. ലോകത്ത് സമാധാനവും സുരക്ഷയും നിലനിര്‍ത്തുന്നതില്‍ അന്താരാഷ്ട്ര സംവിധാനങ്ങള്‍ പൂര്‍ണമായും പരാജയപ്പെടുകയാണെന്നും അദ്ദേഹം കുറ്റപ്പെടുത്തി. ഇസ്താംബുള്‍ കോണ്‍ഗ്രസ് സെന്ററില്‍ നടന്ന ടിആര്‍ടി വേള്‍ഡ് ഫോറം 2026-ന്റെ ഉദ്ഘാടന ചടങ്ങില്‍ സംസാരിക്കുകയായിരുന്നു എര്‍ദോഗന്‍.
'പലസ്തീനികളെ അവരുടെ സ്വന്തം മണ്ണില്‍ നിന്ന് ബലമായി കുടിയൊഴിപ്പിക്കാന്‍ ശ്രമിക്കുന്ന അധിനിവേശ ഭീകരത ആധുനിക ലോകത്തിന്റെ ഉദാസീനതയില്‍ ദിനംപ്രതി കൂടുതല്‍ ധാര്‍ഷ്ട്യമുള്ളതായി മാറുകയാണ്,'എര്‍ദോഗന്‍ പറഞ്ഞു. നേരത്തെ റുവാണ്ടയിലും സ്രെബ്രെനിസയിലും സംഭവിച്ചതുപോലെ, ഗസയില്‍ ദുരന്തങ്ങള്‍ അരങ്ങേറുമ്പോഴും സമാധാനവും സുരക്ഷയും ഉറപ്പാക്കാന്‍ ചുമതലപ്പെട്ട അന്താരാഷ്ട്ര സ്ഥാപനങ്ങള്‍ വീണ്ടും കാഴ്ചക്കാരായി നില്‍ക്കുകയാണെന്നും അദ്ദേഹം കുറ്റപ്പെടുത്തി.
മനുഷ്യദുരന്തങ്ങളെ ആശങ്കയോടെ നോക്കിക്കാണുകയോ ആശങ്ക പ്രകടിപ്പിക്കുകയോ ചെയ്യുകയല്ലാതെ അവര്‍ മറ്റൊന്നും ചെയ്യുന്നില്ല എന്ന് അദ്ദേഹം വിമര്‍ശിച്ചു. ഒക്ടോബര്‍ മാസത്തില്‍ മാത്രം വെസ്റ്റ് ബാങ്കില്‍ പലസ്തീനികളെ ലക്ഷ്യമിട്ട് 3,000ത്തിലധികം ആക്രമണങ്ങളും ലംഘനങ്ങളും രേഖപ്പെടുത്തിയതായി എര്‍ദോഗന്‍ ചൂണ്ടിക്കാട്ടി.
തുര്‍ക്കി കൂടി മധ്യസ്ഥത വഹിച്ച 2025 ഒക്ടോബറിലെ ഗസ സമാധാന കരാര്‍ നടപ്പിലാക്കുന്നില്ലെന്ന് അദ്ദേഹം പറഞ്ഞു. 'തുര്‍ക്കിയുടെ കാര്യം വരുമ്പോള്‍ സിംഹങ്ങളായി മാറുന്നവര്‍, വംശഹത്യ ശൃംഖലയുടെ (Genocide Network) കാര്യം വരുമ്പോള്‍ പെട്ടെന്ന് കടലാസ് പുലികളായി മാറുന്നു. ഇത് ഇരട്ടത്താപ്പിന്റെ ഏറ്റവും വ്യക്തമായ രൂപമാണ്' എന്ന് എര്‍ദോഗന്‍ തുറന്നടിച്ചു. അന്താരാഷ്ട്ര ബന്ധങ്ങളുടെ അടിത്തറയായ കരാറുകള്‍ പാലിക്കപ്പെടണം എന്ന തത്ത്വം പാലിക്കപ്പെടുന്നില്ലെന്ന് എര്‍ദോഗന്‍ വ്യക്തമാക്കി. 'ഈ രീതിയില്‍ ഒരു പ്രശ്‌നവും പരിഹരിക്കാന്‍ കഴിയില്ലെന്ന് എല്ലാവരും മനസ്സിലാക്കണം' എന്ന് അദ്ദേഹം പറഞ്ഞു.
നിലവിലെ ആഗോള, പ്രാദേശിക സംഭവവികാസങ്ങള്‍ കാണിക്കുന്നത് അന്താരാഷ്ട്ര സംവിധാനം 'കീഴടങ്ങലിന്റെ വെള്ളക്കൊടി' ഉയര്‍ത്തിയെന്നതാണെന്നും അദ്ദേഹം മുന്നറിയിപ്പ് നല്‍കി. 'അധികാര മത്സരങ്ങള്‍ തീവ്രമാവുകയും, നിയമങ്ങള്‍ അവഗണിക്കപ്പെടുകയും, നിയമാധിഷ്ഠിത സംവിധാനം ഗുരുതരമായി തകരുകയും, മൂല്യങ്ങള്‍ക്ക് വലിയ തകര്‍ച്ച സംഭവിക്കുകയും ചെയ്യുന്ന ഒരു പ്രക്ഷുബ്ധമായ കാലഘട്ടത്തിലൂടെയാണ് നാം കടന്നുപോകുന്നത്' എന്ന് അദ്ദേഹം കൂട്ടിച്ചേര്‍ത്തു. ലോകം നേരിടുന്ന വെല്ലുവിളികള്‍ പരിഹരിക്കുന്നതില്‍ ആഗോള ഭരണ സംവിധാനങ്ങള്‍ പര്യാപ്തമല്ലെന്നും ഫലപ്രദമല്ലെന്നും എര്‍ദോഗന്‍ പറഞ്ഞു. അന്താരാഷ്ട്ര സംവിധാനം നിര്‍മിക്കപ്പെട്ടിട്ടുള്ള എല്ലാ മാനദണ്ഡങ്ങളും തത്വങ്ങളും ഇന്ന് ചവിട്ടിമെതിക്കപ്പെടുകയാണെന്നും, 'പഴയത് നശിക്കുകയും പുതിയത് ഇതുവരെ ജനിക്കുകയും ചെയ്യാത്ത ഒരു ഘടനാപരമായ പ്രതിസന്ധിയെയാണ് നാം നേരിടുന്നത്' എന്നും അദ്ദേഹം അഭിപ്രായപ്പെട്ടു.
കൂടുതല്‍ നീതിയുക്തമായ ഒരു ലോകം കെട്ടിപ്പടുക്കുന്നതിനായി തുര്‍ക്കി തങ്ങളുടെ മുഴുവന്‍ വ്യക്തിത്വവും ഹൃദയവും ആത്മാവും സമര്‍പ്പിച്ചിരിക്കുകയാണെന്ന് എര്‍ദോഗന്‍ വ്യക്തമാക്കി. പലസ്തീന്‍ മുതല്‍ യെമന്‍, സുഡാന്‍, യുക്രെയ്ന്‍ വരെയുള്ള മേഖലകളില്‍ സംഭവിക്കുന്ന എല്ലാ യുദ്ധങ്ങള്‍ക്കും പ്രതിസന്ധികള്‍ക്കും സമാധാനപരമായ പരിഹാരം കാണാന്‍ തങ്ങളാല്‍ കഴിയുന്നതെല്ലാം ചെയ്യുന്നുണ്ടെന്ന് അദ്ദേഹം പറഞ്ഞു.
ചിലരുടെ അസ്വസ്ഥതകളും കുപ്രചരണങ്ങളിലൂടെ നമ്മെയും നമ്മുടെ രാജ്യത്തെയും വഴിതെറ്റിക്കാനുള്ള ശ്രമങ്ങളും വകവെക്കാതെ, ഞങ്ങള്‍ ഒരിക്കലും പിന്മാറില്ലെന്നും അദ്ദേഹം വ്യക്തമാക്കി. 'എന്ത് വില കൊടുത്തും, ശരിയെന്ന് വിശ്വസിക്കുന്ന കാര്യങ്ങള്‍ ധൈര്യത്തോടെ ശബ്ദമുയര്‍ത്താനും, പരിഹാരത്തിനായുള്ള നിര്‍ദ്ദേശങ്ങള്‍ തുറന്നു പങ്കുവെക്കാനും, നീതിയും സത്യവും ദൃഢനിശ്ചയത്തോടെ സംരക്ഷിക്കാനും ഞങ്ങള്‍ തുടര്‍ന്നും മുന്നോട്ടുപോകും,' എര്‍ദോഗന്‍ പറഞ്ഞു. വിവേകവും മനസാക്ഷിയുമുള്ള മനുഷ്യരെന്ന നിലയില്‍ ന്യായമായ പരിഹാരങ്ങളിലൂടെ ഈ പ്രതിസന്ധി അവസാനിപ്പിക്കുന്നത് ഏവരുടെയും പങ്കുവെക്കപ്പെട്ട ഉത്തരവാദിത്തമാണെന്ന് പ്രസ്താവിച്ചുകൊണ്ടാണ് അദ്ദേഹം പ്രസംഗം അവസാനിപ്പിച്ചത്.
Content Highlight: Turkish President Recep Tayyip Erdoğan has strongly criticised the international community for remaining a mere spectator as Israel continues its attacks on Gaza. Speaking at the inaugural ceremony of the TRT World Forum 2026 at the Istanbul Congress Centre, Erdoğan said the international community had failed to stop Israel's violations in the occupied Palestinian territories. He also accused international institutions of completely failing to maintain global peace and security, questioning their effectiveness in addressing ongoing conflicts and violations of international law.
