LIVE TV
സൗദി അറേബ്യയിൽ അനധികൃതമായി താമസിക്കുന്ന യെമൻ പൗരന്മാരുടെ രേഖകൾ നിയമവിധേയമാക്കുന്നതിനുള്ള നടപടികൾ കൂടുതൽ വേഗത്തിലാക്കാൻ സൗദി പാസ്‌പോർട്ട് ഡയറക്ടറേറ്റ് (ജവാസാത്ത്) നിർദ്ദേശം നൽകി. ഇതിന്റെ ഭാഗമായി മക്ക മേഖലയിലെ പ്രമുഖ സ്റ്റാറ്റസ് കറക്ഷൻ കേന്ദ്രം സൗദി പാസ്‌പോർട്ട് വിഭാഗം മേധാവി മേജർ ജനറൽ നേരിട്ട് സന്ദർശിച്ചു.
ജിദ്ദാ-മക്ക പാതയിലെ ശുമൈസി ജനറൽ സർവീസസ് സെന്ററിൽ പ്രവർത്തിക്കുന്ന റെഗുലറൈസേഷൻ കേന്ദ്രത്തിലാണ് പാസ്‌പോർട്ട് മേധാവി സന്ദർശനം നടത്തിയത്. സെന്ററിലൂടെ യെമൻ പൗരന്മാർക്ക് നൽകിവരുന്ന ഘടനാപരമായ സേവനങ്ങളും നിലവിലെ നടപടിക്രമങ്ങളുടെ പുരോഗതിയും അദ്ദേഹം നേരിട്ട് വിലയിരുത്തി.
നിലവിലുള്ള സൗദി താമസ-തൊഴിൽ ചട്ടങ്ങൾക്ക് അനുസൃതമായി, എത്തുന്ന അപേക്ഷകരുടെ രേഖകൾ തിരുത്തി നിയമവിധേയമാക്കുന്ന നടപടികൾ കാലതാമസമില്ലാതെ വേഗത്തിൽ പൂർത്തിയാക്കാൻ കേന്ദ്രത്തിലെ ജീവനക്കാർക്ക് അദ്ദേഹം കർശന നിർദ്ദേശം നൽകി.
രാജ്യത്ത് അനധികൃതമായി താമസിക്കുന്ന യെമൻ സ്വദേശികൾക്ക് തങ്ങളുടെ ഇഖാമയും മറ്റ് നിയമപരമായ രേഖകളും നിയമാനുസൃതമാക്കാൻ സൗദി പാസ്‌പോർട്ട് ഡയറക്ടറേറ്റ് കഴിഞ്ഞ മാസമാണ് പ്രത്യേക ഇളവുകളോടെയുള്ള നടപടികൾ ആരംഭിച്ചത്. ആയിരക്കണക്കിന് യെമൻ പ്രവാസികൾക്കാണ് ഈ പദ്ധതിയിലൂടെ സൗദിയിൽ നിയമവിധേയമായി ജോലി ചെയ്യാനും തുടരാനും അവസരമൊരുങ്ങുന്നത്.
Content Highlights: Saudi Arabia directs officials to speed up procedures for Yemeni nationals seeking to regularize their residency status under a special initiative.
