LIVE TV
പാകിസ്താന് ക്രിക്കറ്റ് താരങ്ങളായ മുഹമ്മദ് റിസ്വാനെയും ഇമാമുല് ഹഖിനെയും ലാഹോറിലെ നാഷണല് സൈബര് ക്രൈംസ് ഇന്വെസ്റ്റിഗേഷന് ഏജന്സി ചോദ്യം ചെയ്തതായി റിപ്പോര്ട്ട്. ഇംഗ്ലണ്ടിനെതിരായ ടെസ്റ്റ് പരമ്പരയ്ക്കിടെ ടീമില് നിന്ന് ഒഴിവാക്കുകയും, ലോര്ഡ്സില് നടന്ന രണ്ടാം ടെസ്റ്റിലെ തോല്വിക്ക് ശേഷം നാട്ടിലേക്ക് തിരിച്ചയക്കുകയും ചെയ്ത ഏഴ് കളിക്കാരില് ഉള്പ്പെട്ടവരാണ് ഇരു താരങ്ങളും. തുടര്ന്ന് എന്സിസിഐഎയെ നേരിട്ട് കാണാന് സമന്സ് ലഭിച്ചതിനെ തുടര്ന്ന് വ്യാഴാഴ്ച ഇരുവരും ഏജന്സിയുടെ ഓഫീസിലെത്തി. കളിക്കാരില് ഒരാള് അവിടെ മണിക്കൂറുകളോളം ചെലവഴിച്ചതായാണ് റിപ്പോര്ട്ടില് പറയുന്നത്.
ചോദ്യം ചെയ്യല് ഏത് വിഷയവുമായി ബന്ധപ്പെട്ടതാണെന്നോ, അല്ലെങ്കില് ഈ ആഴ്ച ആദ്യം പ്രഖ്യാപിച്ച പാകിസ്താന് ക്രിക്കറ്റ് ബോര്ഡിന്റെ ആഭ്യന്തര അന്വേഷണവുമായി ഇതിന് ബന്ധമുണ്ടോ എന്നതിലും വ്യക്തതയില്ല. അച്ചടക്കത്തെയും പെരുമാറ്റത്തെയും കുറിച്ചുള്ള മാധ്യമ റിപ്പോര്ട്ടുകളെ തുടര്ന്ന് ആഭ്യന്തര അച്ചടക്ക അന്വേഷണം ആരംഭിച്ചതായി പിസിബി വ്യക്തമാക്കിയെങ്കിലും അന്ന് കളിക്കാരുടെ പേരുകള് വെളിപ്പെടുത്തിയിരുന്നില്ല. റിപ്പോര്ട്ട് അനുസരിച്ച്, ചോദ്യം ചെയ്യപ്പെട്ട കളിക്കാരില് ഒരാള്ക്ക് ചോദ്യവലി നല്കിയിട്ടുണ്ടെന്നും അടുത്ത ആഴ്ചയോടെ ഇത് പൂരിപ്പിച്ച് എന്സിസിഐഎയ്ക്ക് സമര്പ്പിക്കുമെന്നും പ്രതീക്ഷിക്കുന്നു.
ഇംഗ്ലണ്ട് പര്യടനത്തിനിടെ പാകിസ്താന് ടീമില് വരുത്തിയ വലിയ മാറ്റങ്ങള്ക്ക് പിന്നാലെയാണ് ഈ സംഭവവികാസങ്ങള്. ലോര്ഡ്സിലെ തോല്വിക്ക് ശേഷം ഏഴ് കളിക്കാര്, ഹെഡ് കോച്ച് സര്ഫറാസ് അഹമ്മദ്, ബൗളിങ് കോച്ച് ഉമര് ഗുല് എന്നിവരെ ടീമില് നിന്ന് ഒഴിവാക്കിയിരുന്നു. തുടര്ന്ന് അന്താരാഷ്ട്ര പരിചയമില്ലാത്ത അഞ്ച് പേരടക്കം ഏഴ് പുതിയ കളിക്കാരെ ഇംഗ്ലണ്ടിലേക്ക് അയക്കുകയായിരുന്നു. പ്രകടനത്തിലെ പോരായ്മകള്ക്ക് പുറമെ മറ്റ് ചില കാരണങ്ങളും ഈ തീരുമാനത്തിന് പിന്നിലുണ്ടെന്ന് പിസിബി ചെയര്മാന് മൊഹ്സിന് നഖ്വി നേരത്തെ സൂചിപ്പിച്ചിരുന്നു. വെസ്റ്റ് ഇന്ഡീസ്, ഇംഗ്ലണ്ട് പര്യടനങ്ങള്ക്കായി റിസ്വാനെയും ഇമാമിനെയും തിരഞ്ഞെടുത്തതിന് പിന്നിലെ കാരണങ്ങള് വ്യക്തമാക്കണമെന്ന് ആവശ്യപ്പെട്ട് പിസിബി സെലക്ടര്മാര്ക്ക് നോട്ടീസ് നല്കിയിരുന്നു. അതിനുപിന്നാലെ സെലക്ടര്മാരില് ഒരാളായ മിസ്ബാഹ്-ഉല്-ഹഖ് സ്ഥാനം രാജിവെക്കുകയും ചെയ്തിരുന്നു.
content highlights: Pakistan Players Under Fire: PCB Questions Mohammad Rizwan and Imam-ul-Haq
