LIVE TV
പ്രതികൂല കാലാവസ്ഥയിലും പിച്ചും ഔട്ട്ഫീല്ഡും മികച്ച രീതിയില് സംരക്ഷിച്ചതിന് ഗുവാഹത്തി ബര്സപര ക്രിക്കറ്റ് സ്റ്റേഡിയത്തിലെ ഗ്രൗണ്ട് സ്റ്റാഫിനും ക്യൂറേറ്റര്മാര്ക്കും 25 ലക്ഷം രൂപ പാരിതോഷികം പ്രഖ്യാപിച്ച് അസം ക്രിക്കറ്റ് അസോസിയേഷന്.
തുടര്ച്ചയായ മഴയെത്തുടര്ന്ന് മത്സരങ്ങള് തടസ്സപ്പെടാന് സാധ്യതയുണ്ടായിരുന്നിട്ടും കഠിനപ്രയത്നത്തിലൂടെ കളി നടത്താന് സൗകര്യമൊരുക്കിയതിനാണ് ഈ അംഗീകാരം.
രാജസ്ഥാന് റോയല്സിന്റെ ഗുവാഹത്തിയിലെ മൂന്ന് ഹോം മത്സരങ്ങളിലും മഴ വില്ലനായിരുന്നു. മുംബൈ ഇന്ത്യന്സിനെതിരെയുള്ള മത്സരം മഴ കാരണം 11 ഓവര് വീതമായി ചുരുക്കേണ്ടി വന്നു. റോയല് ചലഞ്ചേഴ്സ് ബെംഗളൂരു, ചെന്നൈ സൂപ്പര് കിംഗ്സ് എന്നിവര്ക്കെതിരായ മത്സരങ്ങളും കാലാവസ്ഥാ വ്യതിയാനം കാരണം വെല്ലുവിളികള് നേരിട്ടു.
എന്നാല്, ഓരോ തവണ മഴ മാറുമ്പോഴും കളി ഉടന് പുനരാരംഭിക്കാന് പാകത്തില് ഗ്രൗണ്ട് സജ്ജമാക്കാന് ജീവനക്കാര്ക്ക് സാധിച്ചു. 'വെല്ലുവിളി നിറഞ്ഞ കാലാവസ്ഥയിലും പിച്ചുകള് ഉയര്ന്ന നിലവാരത്തില് സംരക്ഷിക്കാന് ക്യൂറേറ്റര്ക്കും ഗ്രൗണ്ട് സ്റ്റാഫിനും സാധിച്ചു. മത്സരങ്ങള് സുഗമമായി നടത്തുന്നതിനും സ്റ്റേഡിയത്തിന്റെ ഖ്യാതി നിലനിര്ത്തുന്നതിനും ഇവരുടെ സേവനം നിര്ണ്ണായകമായിരുന്നു.' എന്ന് അസം ക്രിക്കറ്റ് അസോസിയേഷന് പ്രസ്താവനയില് അറിയിച്ചു.
ജയ്പൂരിലെ സ്റ്റേഡിയം നവീകരണ പ്രവര്ത്തനങ്ങള് കാരണമാണ് രാജസ്ഥാന് റോയല്സ് ഗുവാഹത്തിയെ താല്ക്കാലിക ഹോം ഗ്രൗണ്ടായി തിരഞ്ഞെടുത്തത്. ഗുവാഹത്തിയിലെ മത്സരങ്ങള് പൂര്ത്തിയായതോടെ ടീം ഇനി തങ്ങളുടെ പ്രധാന ഹോം ഗ്രൗണ്ടായ സവായ് മാന്സിംഗ് സ്റ്റേഡിയത്തിലേക്ക് മടങ്ങും.
ഏപ്രില് 25നാണ് ജയ്പൂരിലെ ആദ്യ മത്സരം. ബിസിസിഐ മാനദണ്ഡങ്ങള്ക്കനുസരിച്ച് അത്യാധുനിക സൗകര്യങ്ങളോടെയാണ് ജയ്പൂര് സ്റ്റേഡിയം നവീകരിച്ചിരിക്കുന്നത്.
Content Highlights:guwahati ground staff reward 25 lakh bcci rain match update
