LIVE TV
ഇന്ത്യൻ പ്രീമിയർ ലീഗിന്റെ വരാനിരിക്കുന്ന സീസണിൽ ശ്രീലങ്കയുടെ ടി20 ക്യാപ്റ്റൻ ദസുൻ ഷനകയെ സ്വന്തമാക്കാനൊരുങ്ങി രാജസ്ഥാൻ റോയൽസ്. പരിക്കേറ്റ ഇംഗ്ലീഷ് ഓൾറൗണ്ടർ സാം കറന് പകരക്കാരനായാണ് ലങ്കയുടെ നായകനെ റോയൽസ് ടീമിലെത്തിക്കുന്നത്. ഇംഗ്ലണ്ടിന്റെ സാം കറന് പകരക്കാരനായി രാജസ്ഥാൻ റോയൽസിൽ ചേരാൻ ഓൾറൗണ്ടർ ഷനക ചർച്ചകൾ നടത്തുന്നുണ്ടെന്നാണ് റിപ്പോർട്ട്. ഇത് ഔദ്യോഗികമായി സ്ഥിരീകരിക്കപ്പെട്ടിട്ടില്ല.
പാകിസ്താൻ സൂപ്പർ ലീഗിന്റെ (പിഎസ്എൽ) 11-ാം സീസണിൽ നിന്ന് പിന്മാറിയാണ് ഷനക ഐപിഎല്ലിലേക്ക് എത്തുന്നത്. നിലവിൽ പിഎസ്എൽ 2026 സീസണിൽ ലാഹോർ ഖലന്ദേഴ്സ് താരമാണ് ഷനക. നേരത്തെ പാകിസ്താൻ സൂപ്പർ ലീഗ് വിട്ട് സിംബാബ്വെ താരം ബ്ലെസിംഗ് മുസറബാനിയും ഐപിഎല്ലിലേക്ക് ചേക്കേറിയിരുന്നു. ഐപിഎല്ലിൽ ബംഗ്ലാദേശ് താരം മുസ്തഫിസുർ റഹ്മാന് പകരക്കാരനായി കൊൽക്കത്ത നൈറ്റ്റൈഡേഴ്സാണ് മുസറബാനിയെ സ്വന്തമാക്കിയിരിക്കുന്നത്.
രാജസ്ഥാൻ റോയൽസിന് തിരിച്ചടിയായാണ് സ്റ്റാർ ഓൾറൗണ്ടർ സാം കറന് പരിക്കുപറ്റി ടൂർണമെന്റിൽ നിന്ന് പുറത്തായത്. സാം കറന് ഈ സീസണിലെ എല്ലാ ഐപിഎൽ മത്സരങ്ങളും നഷ്ടമാകുമെന്നാണ് വിവരം. അടി വയറിനേറ്റ പരിക്കാണ് താരത്തിനു വിനയായത്.
മലയാളി താരവും നായകനുമായ സഞ്ജു സാംസണ് പകരമായി ചെന്നൈ സൂപ്പർ കിങ്സ് മെഗാ ലേലത്തിനു മുൻപ് രാജസ്ഥാന് വിട്ടുകൊടുത്ത താരമാണ് സാം കറൻ. രവീന്ദ്ര ജഡേജയ്ക്കൊപ്പമാണ് സാം കറനേയും ചെന്നൈ സഞ്ജുവിനായി കൈവിട്ടത്. എന്നാൽ താരത്തിന്റെ പരിക്ക് രാജസ്ഥാന്റെ എല്ലാ പ്രതീക്ഷകളേയും തകിടം മറിച്ചിരിക്കുകയാണ്.
Content Highlights: Dasun Shanaka leaves Pakistan Super League for IPL 2026; Sri Lankan Captain to join Rajasthan Royals: Report
