LIVE TV
ട്രെയിന്‍ കടന്നുപോകുന്ന റെയില്‍വേ ട്രാക്കിന് മുകളിലുള്ള വൈദ്യുതി കമ്പികള്‍ കണ്ടിട്ടില്ലേ?. ഇതെങ്ങാനും പൊട്ടിവീണാല്‍ എന്തായിരിക്കും സംഭവിക്കുക?. കമ്പി പാളത്തില്‍ തട്ടിയാല്‍ എത്ര ദൂരത്തേക്ക് വൈദ്യുതി അപകടമുണ്ടാക്കും?. കമ്പിയില്‍ തൊട്ടില്ലെങ്കിലും പാളത്തില്‍ എവിടെയെങ്കിലും നിന്നാല്‍ ആളുകള്‍ക്ക് ഷോക്കേല്‍ക്കുമോ?.സാധാരണയായി ട്രെയിനുകള്‍ക്ക് വൈദ്യുതി നല്‍കുന്ന ഓവര്‍ഹെഡ് ലൈനുകളെക്കുറിച്ച് പലര്‍ക്കുമുള്ള സംശയങ്ങളാണിവ. ഇന്ത്യന്‍ റെയില്‍വേയുടെ ഇലക്ട്രിക് ട്രാക്കുകളില്‍ 25,000 വോള്‍ട്ട് (25 കെവി) വൈദ്യുതിയാണ് ഉപയോഗിക്കുന്നത്. ഇത്രയും ഉയര്‍ന്ന വോള്‍ട്ടേജുള്ള കമ്പി പൊട്ടിവീഴുന്നത് ഗുരുതരമായ അപകടത്തിന് കാരണമാകാം.
വൈദ്യുതി ലൈനില്‍ എന്തെങ്കിലും തകരാര്‍ സംഭവിച്ചാല്‍ വൈദ്യുതി വിതരണം വിച്ഛേദിക്കാന്‍ സഹായിക്കുന്ന സംരക്ഷണ സംവിധാനങ്ങള്‍ റെയില്‍വേയിലുണ്ട്. ഷോര്‍ട്ട് സര്‍ക്യൂട്ട് പോലുള്ള തകരാറുകള്‍ കണ്ടെത്തിയാല്‍ വൈദ്യുതി വിതരണം നിര്‍ത്തിയേക്കാം. എന്നാല്‍ എല്ലാ സാഹചര്യങ്ങളിലും അങ്ങനെ സംഭവിച്ചുവെന്ന് വരില്ല. റെയില്‍വേയുടെ ഗ്രൗണ്ടിങ്, ബോണ്ടിങ് സംവിധാനങ്ങള്‍ വൈദ്യുത സുരക്ഷയില്‍ പ്രധാന പങ്കുവഹിക്കുന്നു. പക്ഷേ കമ്പി പൊട്ടിവീഴുന്ന സ്ഥലത്തെ സാഹചര്യങ്ങള്‍ക്കനുസരിച്ച് അപകടസാധ്യത മാറാന്‍ സാധ്യതയുണ്ട്.
കമ്പി പാളത്തില്‍ തട്ടുന്ന രീതി, വൈദ്യുതി വിതരണം വിച്ഛേദിച്ചിട്ടുണ്ടോ ഇല്ലയോ, മണ്ണിന്റെ സ്വഭാവം, ഈര്‍പ്പം, വൈദ്യുത ബന്ധങ്ങള്‍ തുടങ്ങിയ ഘടകങ്ങളെല്ലാം അപകടത്തിന്റെ വ്യാപ്തിയെ സ്വാധീനിക്കും.
ഉയര്‍ന്ന വോള്‍ട്ടേജുള്ള വൈദ്യുത കമ്പിയുടെ അടുത്തെത്തുന്നതുപോലും അപകടകരമാണ്. ചില സാഹചര്യങ്ങളില്‍ കമ്പിയും മനുഷ്യശരീരവും തമ്മില്‍ നേരിട്ടുള്ള സമ്പര്‍ക്കമില്ലെങ്കിലും കറണ്ടടിക്കുന്ന സാഹചര്യം ഉണ്ടാകാം. ഇത് ഗുരുതരമായ പൊള്ളലിനും മരണത്തിനും വരെ കാരണമാകാം. റെയില്‍വേയുടെ സുരക്ഷാ നിര്‍ദേശങ്ങളില്‍ പറയുന്നതനുസരിച്ച് ലൈവ് ഓവര്‍ഹെഡ് ഉപകരണങ്ങളില്‍നിന്ന് കുറഞ്ഞത് രണ്ട് മീറ്റര്‍ അകലം പാലിക്കണമെന്ന് വ്യക്തമാക്കുന്നുണ്ട്. കമ്പി പൊട്ടിവീണാല്‍ അതില്‍നിന്ന് പരമാവധി അകന്നുനില്‍ക്കുകയാണ് വേണ്ടത്.
കമ്പി പൊട്ടിവീഴുന്ന സാഹചര്യത്തില്‍ ട്രെയിനിനുള്ളില്‍ ഇരിക്കുന്ന എല്ലാവരും സുരക്ഷിതരാണെന്ന് ഉറപ്പിച്ചു പറയാനാവില്ല. അപകടത്തിന്റെ സ്ഥാനം, ട്രെയിനുമായുള്ള വൈദ്യുതബന്ധം, വൈദ്യുതി വിതരണം നിലച്ചിട്ടുണ്ടോ തുടങ്ങിയ ഘടകങ്ങള്‍ ഇക്കാര്യത്തില്‍ പ്രധാനമാണ്. ഇങ്ങനെ ഒരു സാഹചര്യത്തില്‍ ട്രെയിനില്‍ ഇരിക്കുന്നവര്‍ റെയില്‍വേ അധികൃതരുടെ നിര്‍ദേശങ്ങള്‍ പാലിക്കുകയും സ്വമേധയാ പുറത്തിറങ്ങി പാളത്തിലൂടെ നടക്കാതിരിക്കുകയും വേണം.
Content Highlights : What kind of danger arises if an overhead electric wire falls onto a railway track? Will people in the surrounding areas also be at risk? How far can the electric current spread along the tracks from a high-tension line?
