LIVE TV
ഇന്ത്യയിലെ ട്രെയിന്‍ യാത്രയ്ക്ക് പുതിയൊരു അധ്യായം തുറക്കാനൊരുങ്ങുകയാണ് ബുള്ളറ്റ് ട്രെയിന്‍. അതിവേഗ യാത്രയ്‌ക്കൊപ്പം ആധുനിക സൗകര്യങ്ങളും ഒരുക്കിയിരിക്കുന്ന ട്രെയിന്‍ ബെംഗളൂരുവിലെ ബിഇഎംഎല്‍ (BEML) പ്ലാന്റിലാണ് നിര്‍മിക്കുന്നത്. ഇന്ത്യയിലെ സാഹചര്യങ്ങള്‍ക്കും യാത്രക്കാരുടെ ആവശ്യങ്ങള്‍ക്കും അനുയോജ്യമായ രീതിയിലാണ് ഇതിന്റെ രൂപകല്‍പ്പന.
മണിക്കൂറില്‍ 280 കിലോമീറ്റര്‍ വേഗം
പരീക്ഷണ ഓട്ടത്തില്‍ മണിക്കൂറില്‍ 280 കിലോമീറ്റര്‍ വരെ വേഗം കൈവരിക്കുന്ന രീതിയിലാണ് ട്രെയിനിന്റെ രൂപകല്‍പ്പന. എന്നാല്‍ സാധാരണ സര്‍വീസിനായി നിശ്ചയിച്ചിരിക്കുന്ന വേഗം മണിക്കൂറില്‍ 249 കിലോമീറ്ററാണ്. ഏകദേശം 202 മീറ്റര്‍ നീളമുള്ള ട്രെയിനില്‍ എട്ട് കോച്ചുകളാണുള്ളത്. നാല് മോട്ടോര്‍ കോച്ചുകളും നാല് ട്രെയിലര്‍ കോച്ചുകളുമാണ് ഇതിലുള്ളത്.
ഏകദേശം 557 യാത്രക്കാര്‍ക്ക് ഒരേസമയം യാത്ര ചെയ്യാന്‍ കഴിയും. ഏഴ് കോച്ചുകളില്‍ സാധാരണ ക്ലാസ് സീറ്റുകളും ഒരു കോച്ചില്‍ എക്‌സിക്യൂട്ടീവ് ക്ലാസ് സീറ്റുകളുമാണുള്ളത്. സാധാരണ ക്ലാസില്‍ ഒരു നിരയില്‍ മൂന്ന് സീറ്റുകള്‍ വീതം ഇരുവശത്തുമായി ക്രമീകരിച്ചിരിക്കുന്നു. എക്‌സിക്യൂട്ടീവ് ക്ലാസില്‍ ഒരു നിരയില്‍ രണ്ട് സീറ്റുകള്‍ വീതമാണുള്ളത്.
ദീര്‍ഘദൂര യാത്രയില്‍ യാത്രക്കാര്‍ക്ക് സൗകര്യപ്രദമായി ഇരിക്കാനാകുന്ന തരത്തിലാണ് സീറ്റുകള്‍ രൂപകല്‍പ്പന ചെയ്തിരിക്കുന്നത്. കാലുകള്‍ നീട്ടിവയ്ക്കാന്‍ മതിയായ സ്ഥലവും ഓരോ നിരയിലും വിശാലമായ ജനലുകളും ഉണ്ടാകും. കോച്ചുകള്‍ക്കുള്ളില്‍ എല്‍ഇഡി ലൈറ്റുകളും ഒരുക്കിയിട്ടുണ്ട്.
ചെറിയ ബാഗുകള്‍ സൂക്ഷിക്കാന്‍ മുകളിലെ ലഗേജ് റാക്കുകളും വലിയ ബാഗുകള്‍ക്കും സ്യൂട്ട്‌കേസുകള്‍ക്കുമായി പ്രത്യേക സ്ഥലവും ലഭിക്കും. മൊബൈല്‍ ഫോണുകള്‍ ചാര്‍ജ് ചെയ്യാനും ലാപ്‌ടോപ്പുകള്‍ ഉപയോഗിക്കാനും പവര്‍ ഔട്ട്ലെറ്റുകളുണ്ടാകും. ബയോ ഡൈജസ്റ്റര്‍ ടോയ്ലറ്റുകളും ട്രെയിനിന്റെ പ്രത്യേകതയാണ്. കോച്ചുകള്‍ തമ്മില്‍ ബന്ധിപ്പിക്കുന്ന ഭാഗവും യാത്രക്കാര്‍ക്ക് സുഗമമായി കടന്നുപോകാന്‍ കഴിയുന്ന രീതിയിലാണ് ഒരുക്കുന്നത്.
യാത്രയ്ക്കിടെ ആവശ്യമായ വിവരങ്ങള്‍ ലഭ്യമാക്കാന്‍ കോച്ചുകളില്‍ എല്‍സിഡി സ്‌ക്രീനുകളുണ്ടാകും. ഇംഗ്ലീഷ്, ഹിന്ദി, പ്രാദേശിക ഭാഷകള്‍ എന്നിവയില്‍ വിവരങ്ങള്‍ നല്‍കും. ഓഡിയോ അറിയിപ്പുകള്‍ക്കൊപ്പം വൈഫൈ അധിഷ്ഠിത ഇന്‍ഫോടെയ്ന്‍മെന്റ് സംവിധാനവും ഒരുക്കുന്നുണ്ട്. ഇതിലൂടെ മുന്‍കൂട്ടി ലഭ്യമാക്കിയ വിനോദ ഉള്ളടക്കങ്ങള്‍ യാത്രക്കാര്‍ക്ക് ഉപയോഗിക്കാനാകും. അടിയന്തര സാഹചര്യങ്ങളില്‍ ട്രെയിന്‍ ജീവനക്കാരുമായി സംസാരിക്കാന്‍ പ്രത്യേക ആശയവിനിമയ സംവിധാനവും ഉണ്ടാകും. യാത്രക്കാര്‍ക്ക് സഹായം ആവശ്യമായിവരുമ്പോള്‍ ഇത് പ്രയോജനപ്പെടും.
ഭിന്നശേഷിക്കാര്‍ക്കും ചലനപരിമിതിയുള്ളവര്‍ക്കും യാത്ര കൂടുതല്‍ എളുപ്പമാക്കുന്ന സൗകര്യങ്ങളും ബുള്ളറ്റ് ട്രെയിനിലുണ്ട്. പ്ലാറ്റ്ഫോമിന്റെയും ട്രെയിനിന്റെയും തറനിരപ്പുകള്‍ തമ്മിലുള്ള ഉയരവ്യത്യാസം കുറയ്ക്കുന്ന രീതിയിലാണ് രൂപകല്‍പ്പന. വാതിലുകളില്‍ ഘടിപ്പിച്ചിരിക്കുന്ന നീട്ടാനും മടക്കാനും കഴിയുന്ന ചവിട്ടുപടികള്‍ ട്രെയിനിനും പ്ലാറ്റ്ഫോമിനുമിടയിലെ വിടവ് കുറയ്ക്കാന്‍ സഹായിക്കും.വീല്‍ചെയര്‍ ഉപയോഗിക്കുന്നവര്‍ക്ക് കടന്നുപോകാന്‍ അനുയോജ്യമായ വാതിലുകള്‍, പ്രത്യേക സീറ്റുകള്‍, സൗകര്യപ്രദമായ ടോയ്ലറ്റുകള്‍ എന്നിവയും ഉണ്ടാകും. കാഴ്ചപരിമിതിയുള്ളവര്‍ക്കായി ബ്രെയില്‍ ലിപിയിലുള്ള വിവരസൂചനകളും ഒരുക്കിയിട്ടുണ്ട്.
അതിവേഗത്തില്‍ സഞ്ചരിക്കുന്ന ട്രെയിനുകളില്‍ ശബ്ദവും വായുമര്‍ദത്തിലെ മാറ്റങ്ങളും വെല്ലുവിളിയാകാം. ഇത് കുറയ്ക്കാന്‍ ബുള്ളറ്റ് ട്രെയിനില്‍ പ്രത്യേക സംവിധാനങ്ങള്‍ ഉള്‍പ്പെടുത്തിയിട്ടുണ്ട്. കോച്ചുകളുടെ ശരീരഭാഗത്തും തറയിലും ശബ്ദം കുറയ്ക്കുന്ന ഇന്‍സുലേഷനും പ്രത്യേക കോട്ടിങ്ങുകളും ഉപയോഗിക്കുന്നു. ഓരോ കോച്ചിലും രണ്ട് എയര്‍ കണ്ടീഷനിങ് യൂണിറ്റുകളുണ്ടാകും. താപനിലയും ഈര്‍പ്പവും നിയന്ത്രിച്ച് യാത്രക്കാര്‍ക്ക് സുഖകരമായ അന്തരീക്ഷം നിലനിര്‍ത്തുകയാണ് ലക്ഷ്യം.
25 കെവി എസി വൈദ്യുത സംവിധാനത്തിലാണ് ട്രെയിന്‍ പ്രവര്‍ത്തിക്കുക. ട്രെയിന്‍ വേഗം കുറയ്ക്കുമ്പോള്‍ ഉണ്ടാകുന്ന ഊര്‍ജത്തിന്റെ ഒരു ഭാഗം വീണ്ടെടുത്ത് ഉപയോഗിക്കാന്‍ സഹായിക്കുന്ന റീജനറേറ്റീവ് ബ്രേക്കിങ് സംവിധാനവും ഇതിലുണ്ട്. ഇത് ഊര്‍ജകാര്യക്ഷമത വര്‍ധിപ്പിക്കാന്‍ സഹായിക്കും. വായുവിന്റെ പ്രതിരോധം കുറയ്ക്കുന്ന രീതിയിലാണ് ട്രെയിനിന്റെ മുന്‍ഭാഗവും പുറംരൂപവും രൂപകല്‍പ്പന ചെയ്തിരിക്കുന്നത്. അതിവേഗ യാത്രയ്ക്കിടെ വായുപ്രവാഹം മൂലമുണ്ടാകുന്ന ബുദ്ധിമുട്ടുകളും തുരങ്കങ്ങളിലെ മര്‍ദവ്യത്യാസങ്ങളും കുറയ്ക്കുകയാണ് ഇതിന്റെ ലക്ഷ്യം.
മുംബൈ അഹമ്മദാബാദ് ബുള്ളറ്റ് ട്രെയിന്‍ ഇടനാഴിയിലാണ് ഇന്ത്യയുടെ ആദ്യ ബുള്ളറ്റ് ട്രെയിന്‍ സര്‍വീസ് ലക്ഷ്യമിടുന്നത്. പദ്ധതിയുടെ നിര്‍മാണവും ട്രെയിന്‍ നിര്‍മാണവും പുരോഗമിക്കുകയാണ്. 2026 നവംബര്‍ ആദ്യവാരത്തിലെ റിപ്പോര്‍ട്ടുകള്‍ പ്രകാരം, സൂറത്ത്‌വാപി ഭാഗത്ത് 2027 മെയ്-ജൂണ്‍ മാസങ്ങളില്‍ പരീക്ഷണ ഓട്ടം നടത്താനാണ് ലക്ഷ്യമിടുന്നത്. ഈ ഭാഗത്ത് വാണിജ്യ സര്‍വീസ് 2027 ഓഗസ്റ്റില്‍ ആരംഭിക്കാനാണ് നിലവിലെ ലക്ഷ്യം.
ഇന്ത്യയില്‍ തന്നെ നിര്‍മിക്കുന്ന ബുള്ളറ്റ് ട്രെയിന്‍ അതിവേഗ റെയില്‍ സാങ്കേതികവിദ്യയിലേക്കുള്ള രാജ്യത്തിന്റെ സുപ്രധാന ചുവടുവയ്പ്പാണ്. യാത്രയുടെ വേഗത്തിനൊപ്പം സുഖസൗകര്യങ്ങള്‍ക്കും സുരക്ഷയ്ക്കും പ്രാധാന്യം നല്‍കുന്ന ഈ ട്രെയിന്‍ യാഥാര്‍ഥ്യമാകുന്നതോടെ ഇന്ത്യന്‍ റെയില്‍വേയുടെ യാത്രാനുഭവത്തില്‍ വലിയ മാറ്റങ്ങളുണ്ടാകുമെന്നാണ് പ്രതീക്ഷ.
Content Highlights :A 'Made in India' bullet train is being prepared for the Mumbai-Ahmedabad High-Speed Rail Corridor. Let’s explore the features of this train, which prioritizes passenger comfort alongside speed
