LIVE TV
ലണ്ടൻ മുതൽ ടോക്കിയോ വരെ ലോകം അതിവേഗ റെയിലുകൾക്ക് പിന്നാലെ പായുമ്പോൾ, ഒരു ട്രെയിൻ പോലുമില്ലാത്ത ചില രാജ്യങ്ങളുണ്ട്. പ്രകൃതി കനിഞ്ഞനുഗ്രഹിച്ച സൗന്ദര്യവും അത്യാധുനിക സൗകര്യങ്ങളും ഈ രാജ്യങ്ങൾക്കുണ്ടെങ്കിലും റെയിൽവേ എന്നത് ഇവർക്ക് ഇന്നും ഒരു സ്വപ്നമാണ്.
ഒമാൻ: മണലാരണ്യത്തിലെ പുത്തൻ പ്രതീക്ഷകൾ
ഗൾഫ് രാജ്യങ്ങളിൽ പാരമ്പര്യമായി റോഡുകൾക്കാണ് പ്രാധാന്യം. നിലവിൽ ഒമാനിൽ ട്രെയിനുകളില്ലെങ്കിലും, യുഎഇയുമായി ബന്ധിപ്പിക്കുന്ന അതിവേഗ 'ഹഫീത് റെയിൽ' പദ്ധതിയിലൂടെ മണലാരണ്യത്തിലൂടെ ഉടൻ ട്രെയിനുകൾ ചീറിപ്പായും.
ഐസ്ലൻഡ്: മഞ്ഞിന്റെയും തീയുടെയും നാട്
യൂറോപ്പിലെ ഈ മനോഹരമായ ദ്വീപ് രാഷ്ട്രത്തിൽ റെയിൽവേ ട്രാക്കുകളില്ല. സജീവമായ അഗ്നിപർവ്വതങ്ങളും ചലിച്ചുകൊണ്ടിരിക്കുന്ന മഞ്ഞുപർവ്വതങ്ങളും നിറഞ്ഞ കഠിനമായ ഭൂപ്രകൃതിയാണ് ഇതിന് കാരണം. വിമാനങ്ങളും റോഡുകളുമാണ് ഇവിടുത്തെ ലൈഫ് ലൈൻ.
കുവൈറ്റ്: ആഡംബരങ്ങളുടെ നാട്
സമ്പത്തിന് കുറവില്ലെങ്കിലും കുവൈറ്റിൽ നിലവിൽ റെയിൽവേ ഇല്ല. ഗതാഗത സംവിധാനം പരിഷ്കരിക്കുന്നതിന്റെ ഭാഗമായി കുവൈറ്റ് മെട്രോയും ജിസിസി റെയിൽവേയും ഉടൻ വരാനിരിക്കുകയാണ്.
ബഹ്റൈൻ: കടലിന് നടുവിലെ കുഞ്ഞൻ രാജ്യം
വളരെ കുറഞ്ഞ വിസ്തൃതിയുള്ള രാജ്യമായതിനാൽ ബഹ്റൈനിൽ റെയിൽവേ അനിവാര്യമായിരുന്നില്ല. എന്നാൽ നഗരങ്ങളിലെ തിരക്ക് കുറയ്ക്കാനായി അത്യാധുനിക മെട്രോ സംവിധാനം ഒരുക്കാനുള്ള തയ്യാറെടുപ്പിലാണ് രാജ്യം.
ലിബിയ: യുദ്ധം തകർത്ത പാളങ്ങൾ
പണ്ട് സജീവമായ റെയിൽവേ ശൃംഖല ഉണ്ടായിരുന്ന രാജ്യമാണ് ലിബിയ. എന്നാൽ ആഭ്യന്തര കലാപങ്ങളും യുദ്ധങ്ങളും മൂലം ഗതാഗതം പൂർണ്ണമായും തകർന്നു. ഇന്ന് പലയിടത്തും റെയിൽവേ ട്രാക്കുകൾ മണലടിഞ്ഞ നിലയിലാണ്.
മാലദ്വീപ്: വെള്ളം മൂടിയ 'ട്രാക്കുകൾ'
കടലിനാൽ ചുറ്റപ്പെട്ട കൊച്ചു ദ്വീപുകളുടെ കൂട്ടമായ മാലദ്വീപിൽ ട്രെയിനുകൾ അപ്രായോഗികമാണ്. ഇവിടെ റോഡുകളെക്കാൾ കൂടുതൽ ബോട്ടുകളും സീപ്ലെയ്നുകളുമാണ് ഗതാഗതത്തിനായി ഉപയോഗിക്കുന്നത്.
മാൾട്ട & സൈപ്രസ്: ലാഭമില്ലാതെ പോയ പാളങ്ങൾ
ഈ ദ്വീപ് രാജ്യങ്ങളിൽ ഒരു കാലത്ത് ട്രെയിനുകൾ ഓടിയിരുന്നു. എന്നാൽ സാമ്പത്തികമായി വലിയ ലാഭമില്ലാത്തതിനാൽ പിന്നീട് ഇവ നിർത്തലാക്കുകയായിരുന്നു. ഇപ്പോൾ കാറുകളും ബസുകളുമാണ് ഇവിടുത്തെ പ്രധാന വാഹനങ്ങൾ.
ഭൂട്ടാൻ: ഹിമാലയൻ വെല്ലുവിളികൾ
മലനിരകൾ നിറഞ്ഞ ഭൂട്ടാനിൽ റെയിൽവേ നിർമ്മാണം എന്നും ഒരു വലിയ വെല്ലുവിളിയായിരുന്നു. എന്നാൽ അയൽരാജ്യമായ ഇന്ത്യയുമായി ചേർന്ന് അസമിൽ നിന്ന് ഭൂട്ടാനിലേക്ക് പുതിയ റെയിൽവേ ലൈനുകൾ യാഥാർത്ഥ്യമാക്കാനുള്ള പണികൾ ദ്രുതഗതിയിൽ നടക്കുന്നു.
അൻഡോറ: പർവ്വതങ്ങളുടെ തടവിൽ
യൂറോപ്പിലെ മലനിരകൾക്കിടയിലുള്ള ഈ കൊച്ചു രാജ്യത്ത് പാളങ്ങൾ പണിയുക പ്രായോഗികമല്ല. അതിനാൽ അതിർത്തി രാജ്യമായ ഫ്രാൻസിലെ റെയിൽവേ സ്റ്റേഷനെയാണ് ഇവിടുത്തുകാർ ദീർഘദൂര യാത്രകൾക്കായി ഉപയോഗിക്കുന്നത്.
സാൻ മറിനോ: ചരിത്രത്തിന്റെ തിരുശേഷിപ്പ്
ലോകത്തിലെ ഏറ്റവും ചെറിയ രാജ്യങ്ങളിൽ ഒന്നായ സാൻ മറിനോയിൽ പണ്ട് ഇലക്ട്രിക് റെയിൽവേ ഉണ്ടായിരുന്നു. രണ്ടാം ലോകമഹായുദ്ധത്തിൽ ബോംബാക്രമണത്തിൽ ഇത് തകർന്നു. പിന്നീട് പുനർനിർമ്മിക്കാത്തതിനാൽ ഇപ്പോൾ ബസുകളെയാണ് ജനങ്ങൾ ആശ്രയിക്കുന്നത്.
Content Highlights : 11 countries in the world which has no railway transportation facilities
