LIVE TV
മധുരപലഹാരങ്ങള്‍ വാങ്ങുമ്പോള്‍ കിലോയ്ക്ക് ആയിരങ്ങള്‍ വരെ ചെലവഴിക്കാന്‍ നമ്മള്‍ തയ്യാറായേക്കാം. എന്നാല്‍ ഒരു കിലോ മിഠായിക്ക് ഒരു ലക്ഷത്തിലധികം രൂപ നല്‍കേണ്ടിവന്നാലോ?. രാജസ്ഥാനിലെ ജയ്പൂരില്‍ തയ്യാറാക്കുന്ന 'സ്വര്‍ണ പ്രസാദം' (Swarn Prasadam) എന്ന മധുരപലഹാരത്തിന്റെ വില കേട്ടാല്‍ പലരും ഒന്ന് ചിന്തിച്ചുപോകും. കിലോയ്ക്ക് 1,11,000 രൂപയാണ് ഇതിന്റെ വിലയെന്നാണ് റിപ്പോര്‍ട്ടുകള്‍.
ജയ്പൂരിലെ അഞ്ജലി ജെയിനിന്റെ മിഠായി ഔട്ട്ലെറ്റില്‍ അവതരിപ്പിച്ച ഈ സ്‌പെഷ്യല്‍ മധുരപലഹാരം ആഡംബരത്തിന്റെ പേരിലാണ് ശ്രദ്ധ നേടുന്നത്. സാധാരണ മിഠായികളില്‍ നിന്ന് വ്യത്യസ്തമായി വിലകൂടിയ ചേരുവകളും സ്വര്‍ണത്തിന്റെ തിളക്കവുമാണ് ഇതിന്റെ പ്രത്യേകത. പൈന്‍ നട്ട്‌സ് അഥവാ ചില്‍ഗോസ, പ്രീമിയം കുങ്കുമപ്പൂവ്, സ്വര്‍ണഭസ്മം എന്നിവ ഉപയോഗിച്ചാണ് ഇത് തയ്യാറാക്കുന്നത്. പരമ്പരാഗത ഇന്ത്യന്‍ മധുരപലഹാരങ്ങള്‍ക്ക് രാജകീയമായ ഒരു രൂപം നല്‍കുകയാണ് ഇതിലൂടെ ലക്ഷ്യമിടുന്നത്.
ഈ മിഠായിയുടെ വില ഉയരാന്‍ പ്രധാന കാരണങ്ങളിലൊന്ന് അതില്‍ ഉപയോഗിക്കുന്ന സ്വര്‍ണമാണ്. 24 കാരറ്റ് സ്വര്‍ണം ഭക്ഷ്യയോഗ്യമായ രൂപത്തില്‍ ഉപയോഗിക്കുന്നതാണ് ഇതിന്റെ പ്രത്യേകത. സ്വര്‍ണഭസ്മവും സ്വര്‍ണത്തിന്റെ തിളക്കമുള്ള അലങ്കാരപ്പണികളും മിഠായിക്ക് ആഡംബരഭംഗി നല്‍കുന്നു. ഇതിനൊപ്പം വിലയേറിയ ഡ്രൈ ഫ്രൂട്ടുകളില്‍ ഒന്നായ ചില്‍ഗോസയും സുഗന്ധത്തിനും രുചിക്കും വേണ്ടി കുങ്കുമപ്പൂവും ചേര്‍ക്കുന്നു. ഈ ചേരുവകളും പ്രത്യേകമായ അവതരണരീതിയും ചേരുന്നത് കൊണ്ടാണ് മിഠായിയുടെ വില ഇത്രയധികം ഉയരുന്നത്.
ഒരു കിലോയ്ക്ക് 1.11 ലക്ഷം രൂപ വിലയുള്ള ഈ മിഠായിയുടെ ഒരു കഷണത്തിന് ഏകദേശം 3,000 രൂപയാണ് വിലയെന്ന് റിപ്പോര്‍ട്ടുകള്‍ പറയുന്നു. അതായത് സാധാരണ ഒരു മിഠായിപ്പൊതി വാങ്ങുന്ന പണം കൊണ്ട് പോലും ഇതിന്റെ ഒരു കഷണം വാങ്ങാന്‍ കഴിയണമെന്നില്ല. മിഠായി സൂക്ഷിക്കുന്ന പാക്കേജിങ്ങിലും പ്രത്യേകതയുണ്ട്. സാധാരണ ബോക്‌സുകള്‍ക്ക് പകരം ആഭരണങ്ങള്‍ സൂക്ഷിക്കുന്ന പെട്ടിയെ ഓര്‍മിപ്പിക്കുന്ന തരത്തിലാണ് ഇത് അവതരിപ്പിക്കുന്നത്. അതിനാല്‍ ഭക്ഷണമെന്നതിലുപരി വിലയേറിയ സമ്മാനമായും ഇതിനെ പരിഗണിക്കുന്നു.
ഇതേ ഔട്ട്ലെറ്റില്‍ മറ്റ് വിലകൂടിയ മധുരപലഹാരങ്ങളും ലഭ്യമാണ്. റിപ്പോര്‍ട്ടുകള്‍ പ്രകാരം സ്വര്‍ണഭസ്മം ഉപയോഗിക്കുന്ന 'സ്വര്‍ണ ഭസ്മ ഭാരത്' എന്ന മിഠായിക്ക് കിലോയ്ക്ക് ഏകദേശം 85,000 രൂപയും വെള്ളിഭസ്മം ഉപയോഗിക്കുന്ന 'ചാന്ദി ഭസ്മ ഭാരത്' എന്ന മിഠായിക്ക് കിലോയ്ക്ക് ഏകദേശം 58,000 രൂപയുമാണ് വില. ബദാം, പിസ്ത, കശുവണ്ടി, അത്തിപ്പഴം തുടങ്ങിയ ചേരുവകള്‍ ഉപയോഗിച്ചുള്ള പ്രീമിയം മധുരപലഹാരങ്ങളും ഇവിടെ യുണ്ട്.
സ്വര്‍ണഭസ്മത്തിന് ആയുര്‍വേദത്തില്‍ ചില ആരോഗ്യഗുണങ്ങള്‍ കല്‍പ്പിക്കപ്പെടുന്നുണ്ടെന്ന് മിഠായി വില്‍പ്പനക്കാര്‍ അവകാശപ്പെടുന്നുണ്ട്. എന്നാല്‍ അതുകൊണ്ടുമാത്രം ഈ മിഠായി കഴിക്കുന്നത് പ്രതിരോധശേഷി വര്‍ധിപ്പിക്കുമെന്നോ ആരോഗ്യത്തിന് ഗുണകരമാണെന്നോ ഉറപ്പിച്ച് പറയാനാവില്ല. ഭക്ഷ്യയോഗ്യമായ സ്വര്‍ണം ഉപയോഗിച്ചിട്ടുണ്ടെന്നത് മാത്രം ഒരു ഉല്‍പ്പന്നം ആരോഗ്യകരമാണെന്നതിന് തെളിവല്ല.
ഉത്സവകാലങ്ങളില്‍ മധുരപലഹാരങ്ങള്‍ സമ്മാനമായി നല്‍കുന്നത് ഇന്ത്യയിലെ പതിവാണ്. എന്നാല്‍ സ്വര്‍ണ പ്രസാദം പോലുള്ള ഉല്‍പ്പന്നങ്ങള്‍ ആ പതിവിനെ മറ്റൊരു തലത്തിലേക്ക് കൊണ്ടുപോകുന്നു. രുചിക്കൊപ്പം ആകര്‍ഷകമായ രൂപവും വിലയേറിയ ചേരുവകളും സമ്മാനപ്പൊതിയുടെ ഭംഗിയും ചേരുമ്പോള്‍ മിഠായിയും ഒരു ആഡംബര ഉല്‍പ്പന്നമായി മാറുന്നു.
Content Highlights : Rs 1.11 lakh per kilogram—a sweet that costs as much as a motorcycle. What is special about the 'gold prasadam' in Jaipur?
