LIVE TV
ഭൂമി നിരവധി അത്ഭുതങ്ങളാല് നിറഞ്ഞുനില്ക്കുന്നു. കാലാവസ്ഥ, ജീവന്, സമുദ്രങ്ങള്, സസ്യങ്ങള് എന്നിവയെല്ലാം ഭൂമിയുടെ ഭ്രമണത്തെ ആശ്രയിച്ചാണിരിക്കുന്നത്. പെട്ടെന്നൊരു ദിവസം തന്റെ അച്ചുതണ്ടില് കറങ്ങിക്കൊണ്ടിരിക്കുന്ന ഭൂമിയുടെ കറക്കം നിന്നുപോയാലോ? എന്ത് സംഭവിക്കുമെന്ന് എപ്പോഴെങ്കിലും ആലോചിച്ചിട്ടുണ്ടോ?
ഭൂമിയുടെ ഉപരിതലത്തിലുള്ളതെല്ലാം നിലവില് മണിക്കൂറില് 1600 കിലോമീറ്റര് വേഗതയിലാണ് കറങ്ങിക്കൊണ്ടിരിക്കുന്നത്. ഈ കറക്കം പെട്ടെന്ന് നിലച്ചുപോയാല് അന്തരീക്ഷത്തിലും സമുദ്രത്തിലും കരയിലും എല്ലാ പ്രവര്ത്തിച്ചുവരുന്ന ജഡത്വനിയമം (The Earth's law of inertia) കാരണം കറങ്ങിക്കൊണ്ടിരുന്ന അതേ വേഗതയില് അവയെല്ലാം മുന്നോട്ട് എറിയപ്പെടും.
ഈ പെട്ടെന്നുള്ള ഇടവേളയില് സൂപ്പര് സോണിക് കാറ്റുകള് ഉണ്ടാകും. ഈ കാറ്റുകള്ക്ക് വലിയ കെട്ടിടങ്ങളെ നിമിഷങ്ങള്ക്കുളളില് നിലംപരിശാക്കാന് സാധിക്കും. ആളുകളും വാഹനങ്ങളും കൂറ്റന് നിര്മ്മിതികളുമെല്ലാം വായുവിലേക്ക് പറന്നുപോയി നിലത്തേക്ക് എടുത്തെറിയപ്പെടും. വലിയ നാശം സംഭവിക്കും.
നിരന്തരമായ ഭ്രമണം ഭൂമിയെ അല്പ്പം പരന്ന ആകൃതിയിലാക്കിയിട്ടുണ്ട്. സമുദ്രജലം ഭൂമധ്യരേഖയ്ക്ക് സമീപം അടിഞ്ഞുകൂടിയിട്ടുണ്ട്. ഭ്രമണം നിലച്ചുകഴിഞ്ഞാല് ഗുരുത്വാകര്ഷണ സന്തുലിതാവസ്ഥ തകരാറിലാകും. വെള്ളം മുഴുവനും ഉത്തര, ദക്ഷിണ ദ്രുവങ്ങളിലേക്ക് വേഗത്തില് ഒഴുകാന് തുടങ്ങും. ഇത് പല ഭൂഖണ്ഡങ്ങളെയും തീരദേശ രാജ്യങ്ങളെയും വെള്ളത്തിനടിയിലാക്കും. സമുദ്രത്തിന്റെ ഈ സ്ഥാന ചലനംമൂലം പുതിയ തടാകങ്ങള്, വിശാലമായ മരുഭൂമികള്, പുതിയ ജലാശയങ്ങള് എന്നിവ സൃഷ്ടിക്കപ്പെടും.
ഭ്രമണം നിലയ്ക്കുന്നത് പകലിന്റെയും രാത്രിയുടെയും 24 മണിക്കൂര് ചക്രം എന്നെന്നേക്കുമായി അവസാനിപ്പിക്കും. പിന്നീട് വര്ഷത്തില് ഒരുപകലും ഒരു രാത്രിയും മാത്രമേ ഉണ്ടാകൂ. അതായത് ആറ് മാസത്തേക്ക് സൂര്യന് പ്രകാശിക്കുകയും ആറ് മാസത്തേക്ക് പൂര്ണ ഇരുട്ടിലാവുകയും ചെയ്യും. സൂര്യനെ അഭിമുഖീകരിക്കുന്ന ഭാഗത്ത് അസഹനീയമായ ചൂടും താപനിലയും അനുഭവപ്പെടും അതേസമയം ഇരുണ്ട ഭാഗത്ത് അസ്ഥി മരവിപ്പിക്കുന്ന തണുപ്പും അനുഭവപ്പെടും.
കാറ്റിന്റെയും മഴയുടെയും സ്വാഭാവിക ചക്രം തടസ്സപ്പെടുന്നത് കടുത്ത വരള്ച്ചയ്ക്കും കൊടുംകാറ്റിനും കാരണമാകും. ഭൂമിയുടെ ജീവിതചക്രം സൂര്യപ്രകാശത്തിന്റെ പതിവ് ചക്രത്തെ ആശ്രയിച്ചാണിരിക്കുന്നത്. തുടര്ച്ചയായ സൂര്യപ്രകാശവും മാസങ്ങളോളം തുടരുന്ന ഇരുട്ടും പ്രകാശസംശ്ലേഷണ പ്രക്രീയയെ(സസ്യങ്ങളില് ഭക്ഷണം ഉത്പാദിപ്പിക്കുന്ന) തടസ്സപ്പെടുത്തും.
സസ്യജാലങ്ങളുടെ നഷ്ടം സസ്യഭുക്കുകളുടെയും മാംസഭുക്കുകളുടെയും ചക്രത്തെ തടസ്സപ്പെടുത്തുന്നു. പക്ഷികളുടെയും മൃഗങ്ങളുടെയും പ്രജനനവും ദേശാടന രീതികളും തടസ്സപ്പെടും. ഇത് ഭൂമിയിലെ മിക്ക ജീവജാലങ്ങളെയും പെട്ടെന്നുള്ള വംശനാശത്തിലേക്ക് നയിക്കും.
ഭൂമിയുടെ ഭ്രമണമാണ് അതിന്റെ ആന്തരിക ദ്രാവക കാമ്പിനെ സജീവമായി നിലനിര്ത്തുന്നത്. ഇതൊരു സുരക്ഷിതമായ കാന്തിക ക്ഷേത്രം സൃഷ്ടിക്കുന്നു. ഭ്രമണം നിലച്ചാല് ഈ സംരക്ഷിത കാന്തിക കവചം പൂര്ണമായും നശിക്കാനിടയാക്കും. മാത്രമല്ല ഭൂമിയിലെ ആന്തരിക സന്തുലിതാവസ്ഥയിലെ തടസ്സം വിനാശകരമായ ഭൂകമ്പങ്ങള്ക്കും, ഭൂമിയിലെ വിള്ളലുകള്ക്കും, പല അഗ്നിപര്വ്വത സ്ഫോടനങ്ങള്ക്കും കാരണമാകുകയും ചെയ്യും.
Content Highlights :The Earth is rotating on its axis. We know what would happen if it were to stop.
