Top

'റോഷന് പുതിയ ശ്രവണ സഹായി'; നാളെ വീട്ടിലെത്തി കൈമാറുമെന്ന് മേയര്‍

''നമുക്ക് നന്മ നഷ്ടപെട്ടിട്ടില്ലെന്ന് തോന്നിയ നിമിഷമായിരുന്നു അത്. എല്ലാവര്‍ക്കും നന്ദി..''

29 Oct 2022 3:41 PM GMT
റിപ്പോർട്ടർ നെറ്റ്‌വർക്ക്

റോഷന് പുതിയ ശ്രവണ സഹായി; നാളെ വീട്ടിലെത്തി കൈമാറുമെന്ന് മേയര്‍
X

തിരുവനന്തപുരം: രാജാജി നഗറിലെ വിദ്യാര്‍ഥിയായ റോഷന് പുതിയ ശ്രവണ സഹായി നാളെ നല്‍കുമെന്ന് മേയര്‍ ആര്യാ രാജേന്ദ്രന്‍. രാവിലെ ഒന്‍പത് മണിക്ക് റോഷന്റെ വീട്ടിലെത്തി ശ്രവണ സഹായി നല്‍കാനാണ് തീരുമാനമെന്നും കിംസ് ആശുപത്രിയുടെ സഹായത്തോടെയാണ് ലക്ഷ്യം നിറവേറ്റുന്നതെന്ന് മേയര്‍ അറിയിച്ചു. റോഷനെ സഹായിക്കാന്‍ വേണ്ടി നിരവധി പേരാണ് നഗരസഭയെ സമീപിച്ചത്. നമുക്ക് നന്മ നഷ്ടപെട്ടിട്ടില്ലെന്ന് തോന്നിയ നിമിഷമായിരുന്നു അത്. എല്ലാവര്‍ക്കും നന്ദിയെന്നും മേയര്‍ ആര്യ അറിയിച്ചു.



കഴിഞ്ഞദിവസമാണ് റോഷന്റെ ഒന്നര ലക്ഷം രൂപ വരുന്ന ശ്രവണ സഹായി സ്‌കൂള്‍ ബാഗിനൊപ്പം നഷ്ടമായത്. ജഗതി ബധിര വിദ്യാലയത്തിലെ പ്ലസ്ടു വിദ്യാര്‍ഥിയാണ് റോഷന്‍. സ്‌കൂളില്‍ നിന്ന് പിതാവിനൊപ്പം ബൈക്കില്‍ വീട്ടിലേക്ക് മടങ്ങും വഴിയാണ് ശ്രവണ സഹായി നഷ്ടമായത്. കളഞ്ഞുപോയ ശ്രവണ സഹായി ലഭ്യമായില്ലെങ്കില്‍ പുതിയൊരെണ്ണം ലഭ്യമാക്കുന്നതിന് വേണ്ടിയുള്ള നടപടി നഗരസഭ സ്വീകരിക്കുമെന്ന് രാവിലെ മേയര്‍ പറഞ്ഞിരുന്നു. രാജാജി നഗറിലെത്തി റോഷനെ സന്ദര്‍ശിച്ച ശേഷമാണ് ആര്യ ഇക്കാര്യം പറഞ്ഞത്.

മേയര്‍ ആര്യ രാവിലെ പറഞ്ഞത്: ''കഴിഞ്ഞ ദിവസം മാധ്യമ വാര്‍ത്തകളിലൂടെയാണ് തിരുവനന്തപുരം രാജാജി നഗര്‍ സ്വദേശിയും വിദ്യാര്‍ത്ഥിയുമായ റോഷന്റെ അവസ്ഥ മനസിലാക്കുന്നത്. സ്‌ക്കൂളില്‍ നിന്ന് വരുന്ന വഴിക്ക് ബധിര വിദ്യാര്‍ത്ഥിയായ റോഷന്റെ ശ്രവണ സഹായി നഷ്ടമായി. തന്റെ ജീവിതം മുന്നോട്ട് നയിച്ച എല്ലാമായിരുന്ന വിലപിടിപ്പുള്ള ശ്രവണ സഹായി നഷ്ടമായതോടെ ഈ വിദ്യാര്‍ത്ഥിയുടെ പഠനം വലിയ ബുദ്ധിമുട്ടിലായിരിക്കുകയാണ്. ഏതാണ്ട് ഒന്നര ലക്ഷം രൂപ വിലവരുന്ന ശ്രവണ സഹായി പെട്ടന്ന് വാങ്ങി നല്‍കാന്‍ പറ്റുന്ന സാഹചര്യമല്ല ഈ കുടുംബത്തിനുള്ളത്.

നഷ്ടപെട്ട ബാഗ് തിരികെ ലഭിക്കാന്‍ ഒരു നാട് ഒന്നാകെ ശ്രമിക്കുകയാണ്. കണ്ട് കിട്ടുന്നവര്‍ ദയവായി നഗരസഭയേയോ 9895 4440 67 എന്ന നമ്പരിലോ അറിയിക്കുക. മറ്റൊരു കാര്യം, നഷ്ടമായ ശ്രവണ സഹായി തിരികെ ലഭ്യമായില്ലെങ്കില്‍ പുതിയൊരെണ്ണം ലഭ്യമാക്കുന്നതിന് വേണ്ട നടപടി നഗരസഭ സ്വീകരിക്കും. എന്തായാലും റോഷന്റെ പഠനം മുന്നോട്ട് കൊണ്ട് പോകേണ്ടതായിട്ടുണ്ട്. എല്ലാവരും ഒപ്പമുണ്ടാകുമല്ലോ.''

Next Story