'തുടര്‍ച്ചയായി ക്രിസ്ത്യന്‍ വിഭാഗക്കാര്‍'; തൃക്കാക്കര ഒരു സമുദായത്തിന് മാത്രമായി കോണ്‍ഗ്രസ് മാറ്റിവെച്ചെന്ന് എംബി മുരളീധരന്‍

തൃക്കാക്കര: തൃക്കാക്കര മണ്ഡലം ഒരു സമുദായത്തിന് മാത്രമായി കോണ്‍ഗ്രസ് മാറ്റിവെച്ചെന്ന് എംബി മുരളീധരന്‍. തൃക്കാക്കര ഉപതെരഞ്ഞെടുപ്പില്‍ സിപിഐഎമ്മുമായി സഹകരിച്ച് പ്രവര്‍ത്തിക്കാന്‍ തീരുമാനിച്ചതിന് പിന്നാലെ റിപ്പോര്‍ട്ടര്‍ ടിവിയോട് പ്രതികരിക്കുകയായിരുന്നു അദ്ദേഹം. എല്ലാ വിഭാഗം ജനങ്ങളേയും ഉള്‍ക്കൊണ്ട് വേണം ഇന്ത്യന്‍ നാഷണല്‍ കോണ്‍ഗ്രസിന്റെ സ്ഥാനാര്‍ത്ഥി നിര്‍ണ്ണയം നടക്കേണ്ടതെന്നും അദ്ദേഹം കൂട്ടിച്ചേര്‍ത്തു.

തൃക്കാക്കര സീറ്റ് ഒരിക്കലും എന്നെപ്പോലൊരാള്‍ക്ക് ലഭിക്കില്ലായിരുന്നു. കെ ബാബു തൃപ്പുണിത്തുറയില്‍ ആയിരുന്നപ്പോഴാണ് ഈ നിയോജക മണ്ഡലത്തില്‍ മത്സരിച്ചത്. അതിന് ശേഷം തൃക്കാക്കരയും തൃപ്പൂണിത്തുറയുമായി മാറിയപ്പോള്‍ കെ ബാബു തൃപ്പുണിത്തുറയിലേക്കാണ് മാറിയത്. ഇവിടെ ക്രിസ്ത്യന്‍ സമുദായത്തില്‍പ്പെട്ട ബെന്നി ബെഹനാന്‍ ആണ് സ്ഥാനാര്‍ത്ഥിയായി വന്നത്. തുടര്‍ച്ചയായി സ്വാഭാവികമായും അങ്ങനെയൊരു വിഭാഗത്തിന് സീറ്റ് സംവരണം ചെയ്യപ്പെട്ടിരിക്കും. മറ്റ് സമുദായത്തില്‍പ്പെട്ടവര്‍ക്ക് വേറെ സീറ്റുകള്‍ ഉണ്ട്. ഭൂരിപക്ഷ സമുദായത്തെ അവഗണിച്ചു എന്നൊന്നും ഞാന്‍ പറഞ്ഞിട്ടില്ലെന്നും അദ്ദേഹം കൂട്ടിച്ചേര്‍ത്തു.

എംബി മുരളീധരന്റെ വാക്കുകള്‍:

കഴിഞ്ഞ കുറേ ദിവസങ്ങളായി ഞാന്‍ മുന്‍കാലങ്ങളിലുള്ളത് പോലെയുള്ള സജീവ പ്രവര്‍ത്തനത്തില്‍ ഉണ്ടായിരുന്നില്ല. അതു സംബന്ധിച്ച് ഞാന്‍ മാനസികമായി പ്രശ്‌നങ്ങളിലായിരുന്നു. പ്രവര്‍ത്തിക്കുകയാണെങ്കില്‍ ആത്മാര്‍ത്ഥമായി പ്രവര്‍ത്തിക്കണം. അല്ലെങ്കില്‍ പ്രവര്‍ത്തിക്കാതിരിക്കുക എന്നുള്ളതാണ്. വളരേയേറെ ശ്രമിച്ചു, പറ്റാത്തൊരു സാഹചര്യത്തിലാണ് മാറി നില്‍ക്കുന്ന സാഹചര്യം ഉണ്ടായത്.

സ്ഥാനാര്‍ത്ഥി നിര്‍ണ്ണയം ഉണ്ടായപ്പോള്‍ തൃക്കാക്കര മണ്ഡലത്തിലെ മുതിര്‍ന്ന നേതാക്കളുമായി ചര്‍ച്ച വേണ്ടിയിരുന്നു എന്ന് തന്നെയാണ് ഞാന്‍ അന്ന് അഭിപ്രായം പറഞ്ഞത്. സംസ്ഥാന തെരഞ്ഞെടുപ്പ് കമ്മിറ്റിയില്‍ ആരും എതിര്‍ത്ത് അഭിപ്രായം പറഞ്ഞില്ല, അതുകൊണ്ടാണ് ആ സ്ഥാനാര്‍ത്ഥിയെ തീരുമാനിച്ചത് എന്നാണ് എനിക്ക് കിട്ടിയ വിശദീകരണം്.

തൃക്കാക്കര സീറ്റ് ഒരിക്കലും എന്നെപ്പോലൊരാള്‍ക്ക് ലഭിക്കില്ലായിരുന്നു. കെ ബാബു തൃപ്പുണിത്തുറയില്‍ ആയിരുന്നപ്പോഴാണ് ഈ നിയോജക മണ്ഡലത്തില്‍ മത്സരിച്ചത്. അതിന് ശേഷം തൃക്കാക്കരയും തൃപ്പൂണിത്തുറയുമായി മാറിയപ്പോള്‍ കെ ബാബു തൃപ്പുണിത്തുറയിലേക്കാണ് മാറിയത്. ഇവിടെ ക്രിസ്ത്യന്‍ സമുദായത്തില്‍പ്പെട്ട ബെന്നി ബെഹനാന്‍ ആണ് സ്ഥാനാര്‍ത്ഥിയായി വന്നത്. തുടര്‍ച്ചയായി സ്വാഭാവികമായും അങ്ങനെയൊരു വിഭാഗത്തിന് സീറ്റ് സംവരണം ചെയ്യപ്പെട്ടിരിക്കും എന്നുള്ളത് കൊണ്ട്. ഞാന്‍ അതില്‍ തെറ്റൊന്നും പറയില്ല. എല്ലാ വിഭാഗം ജനങ്ങളേയും ഉള്‍ക്കൊണ്ട് വേണം ഇന്ത്യന്‍ നാഷണല്‍ കോണ്‍ഗ്രസിന്റെ സ്ഥാനാര്‍ത്ഥി നിര്‍ണ്ണയം നടക്കേണ്ടത്. തൃക്കാക്കര മണ്ഡലം ആ ഒരു സമുദായത്തിന് വേണ്ടി മാത്രം മാറ്റിവെക്കപ്പെട്ടു. വേറെ സമുദായത്തില്‍പ്പെട്ടവര്‍ക്ക് വേറെ സീറ്റുകള്‍ ഉണ്ട്. അതില്‍ ഞാന്‍ തെറ്റ് പറയുന്നില്ല. അതുകൊണ്ട് തന്നെ ആ സീറ്റ് ലഭിക്കുമെന്ന ചിന്ത എനിക്ക് ഇല്ലായിരുന്നു.

ഭൂരിപക്ഷ സമുദായത്തെ അവഗണിച്ചു എന്നൊന്നും ഞാന്‍ പറഞ്ഞിട്ടില്ല. സ്ഥാനാര്‍ത്ഥി നിര്‍ണ്ണയത്തില്‍ എടുത്ത തെറ്റായ നിലപാട്, കൂടിയാലോചനയിലൂടെ മാത്രം എടുക്കേണ്ടൊരു തീരുമാനം, പ്രത്യേകിച്ച് ഒരു ബൈ ഇലക്ഷനില്‍ കൂടിയാലോചന അനിവാര്യമാണ്. തൃക്കാക്കര നിയോജക മണ്ഡലത്തിലുള്ള ഡിസിസി ഭാരവാഹികളുമായിട്ടോ, ബ്ലോക്ക് ഭാരവാഹികളുമായിട്ടോ, മണ്ഡലം പ്രസിഡന്റുമാരുമായിട്ടോ ചര്‍ച്ച ചെയ്തിട്ടില്ല. ആരായിരിക്കും സ്ഥാനാര്‍ത്ഥി എന്നത് നേതൃത്വം പ്രഖ്യാപിക്കുമ്പോള്‍ മാത്രമാണ് അറിഞ്ഞത്.

സ്ഥാനാര്‍ത്ഥിത്വം പാര്‍ട്ടിയില്‍ സജീവമായി പ്രവര്‍ത്തിക്കുന്നവര്‍ക്ക് കൊടുക്കേണ്ടതാണ്. അത് അങ്ങനെ കൊടുക്കാതെ, ഒരു ബൈപാസ് ചെയ്ത് വരുന്ന ആളുകള്‍ക്ക് കൊടുക്കുമ്പോള്‍ ഉണ്ടാകുന്ന മാനസികമായ ബുദ്ധിമുട്ട് പാര്‍ട്ടി പ്രവര്‍ത്തകര്‍ക്കുണ്ട്. അതിപ്പോഴും നിലനില്‍ക്കുന്നുണ്ട്. എനിക്ക് മാത്രമല്ല.

എന്നെപ്പോലെ സമാനമായി ചിന്തിക്കുന്ന മറ്റ് ഒത്തിരിപ്പേരുണ്ട്. എല്‍ഡിഎഫിനായി സജീവമായി പ്രവര്‍ത്തിക്കാന്‍ തീരുമാനിച്ച് തന്നെയാണ് ഞാന്‍ ഇറങ്ങിയത്. ഒന്നുമല്ലാത്ത രീതിയില്‍ മുന്നോട് പോകുന്നതില്‍ അര്‍ത്ഥമില്ല.

പാര്‍ട്ടിയില്‍ വിയോജിപ്പ് നേരത്തെ തന്നെ പല നേതാക്കന്മാരും വെളിപ്പെടുത്തിയതാണ്. സ്ഥാനാര്‍ത്ഥിയെ പ്രഖ്യാപിച്ച ശേഷം അത് ആരും പ്രത്യേകം എടുത്ത് പറഞ്ഞില്ല എന്ന് മാത്രമേയുള്ളൂ. ആ ഒരു നീരസം അവരുടെയെല്ലാം മനസ്സിലുണ്ട്. താഴോട്ട് മണ്ഡലം തലത്തില്‍ വരെ അതുണ്ട്.

ഷിയാസിനെ ഞാന്‍ കുറ്റപ്പെടുത്തി പറയില്ല. വളരെ മാന്യമായാണ് അദ്ദേഹം എന്നോട് സംസാരിച്ചിട്ടുള്ളത്. പക്ഷേ, മറ്റ് പലരും അങ്ങനെയല്ല. ഷിയാസ് ജില്ലയിലെ പരമാവധി കോണ്‍ഗ്രസ് പ്രവര്‍ത്തകരെ ഒപ്പം നിര്‍ത്താന്‍ ശ്രമിക്കുന്നുണ്ട്. ഷിയാസ് മാത്രം വിചാരിച്ചാല്‍ മാത്രം പാര്‍ട്ടി രക്ഷപ്പെട്ട് പോകില്ലെല്ലോ.

സംസ്ഥാന നേതൃത്വത്തില്‍ പുതുതായി വന്ന നേതൃത്വങ്ങളുണ്ട്. അവരുടെ പ്രവര്‍ത്തന ശൈലിയില്‍ വന്ന മാറ്റങ്ങളുണ്ട്. പാര്‍ട്ടി ബുദ്ധിമുട്ടുള്ള അവസ്ഥയിലൂടെ കടന്നുപോകുമ്പോള്‍ പരമാവധി പ്രവര്‍ത്തകരെ കൂടെ നിര്‍ത്തിക്കൊണ്ടു പോകാനുള്ള നടപടികള്‍ അല്ലേ വേണ്ടത്. പാര്‍ട്ടി സ്ഥാനാര്‍ത്ഥി മത്സരിക്കുമ്പോള്‍ ഏത് വിധേനയും വിജയിപ്പിക്കാന്‍ ശ്രമിക്കേണ്ടവരാണ് പ്രവര്‍ത്തകര്‍. തങ്ങളുടെ താത്പര്യത്തിന് ഒപ്പം നില്‍ക്കാത്തവരെ പരാജയപ്പെടുത്താന്‍ വേണ്ടി ശ്രമിക്കുന്നവരേയും നമ്മള്‍ കണ്ടിട്ടുണ്ട്. ഇത് ഇതിന് മുമ്പ് നടന്ന കാര്യങ്ങളാണ്.

STORY HIGHLIGHTS: 'Continually Christian'; MB Muraleedharan says Congress has set aside Thrikkakara for one community only