LIVE TV
യുഎഇയുടെ വിവിധ ഭാഗങ്ങളിൽ കനത്ത മഞ്ഞുപാളികൾ രൂപപ്പെട്ടതിനെത്തുടർന്ന് ബുധനാഴ്ച രാവിലെ ദേശീയ കാലാവസ്ഥാ നിരീക്ഷണ കേന്ദ്രം റെഡ്, യെല്ലോ അലർട്ടുകൾ പുറപ്പെടുവിച്ചു. മഞ്ഞുമൂടിയ അന്തരീക്ഷം കാരണം കാഴ്ചപരിധി കുറയാൻ സാധ്യതയുള്ളതിനാൽ വാഹനമോടിക്കുന്നവർ അതീവ ജാഗ്രത പാലിക്കണമെന്ന് അബുദാബി പൊലീസ് നിർദ്ദേശം നൽകിയിട്ടുണ്ട്. റോഡുകളിലെ ഇലക്ട്രോണിക് ഇൻഫോർമേഷൻ ബോർഡുകളിൽ പ്രദർശിപ്പിക്കുന്ന വേഗപരിധി കൃത്യമായി പാലിക്കണമെന്നും സുരക്ഷാ മുൻകരുതലുകൾ സ്വീകരിക്കണമെന്നും പൊലീസ് ഓർമ്മിപ്പിച്ചു.
ബുധനാഴ്ച പകൽ സമയത്ത് രാജ്യം പൊതുവെ തെളിഞ്ഞതോ ഭാഗികമായി മേഘാവൃതമായതോ ആയ കാലാവസ്ഥയിലായിരിക്കും. എന്നാൽ രാത്രിയോടെ കൂടുതൽ മേഘാവൃതമാകാൻ സാധ്യതയുണ്ട്. പകൽ സമയത്ത് മണിക്കൂറിൽ 10 മുതൽ 25 കിലോമീറ്റർ വേഗതയിൽ നേരിയതോ മിതമായതോ ആയ കാറ്റ് വീശിയടിക്കും. ഇത് ചില സമയങ്ങളിൽ 40 കിലോമീറ്റർ വരെ വേഗത പ്രാപിക്കാനും പടിഞ്ഞാറൻ പ്രദേശങ്ങളിൽ പൊടിക്കാറ്റ് രൂപപ്പെടാനും കാരണമായേക്കാം.
രാജ്യത്തെ പരമാവധി താപനില 48 ഡിഗ്രി സെൽഷ്യസ് വരെ ഉയർന്നേക്കുമെന്നാണ് കാലാവസ്ഥാ വകുപ്പിന്റെ മുന്നറിയിപ്പ്. അബുദാബിയിൽ 40 ഡിഗ്രിയും ദുബായിൽ 39 ഡിഗ്രിയുമായിരിക്കും പകൽ സമയത്തെ ഉയർന്ന താപനില. എന്നാൽ കുറഞ്ഞ താപനില അബുദാബിയിൽ 30 ഡിഗ്രിയും ദുബായിൽ 31 ഡിഗ്രിയും ഉൾപ്രദേശങ്ങളിൽ 27 ഡിഗ്രി സെൽഷ്യസ് വരെയുമായി താഴും.
തീരപ്രദേശങ്ങളിൽ രാത്രിയിലും വ്യാഴാഴ്ച പുലർച്ചെയും അന്തരീക്ഷത്തിൽ ഈർപ്പത്തിന്റെ അളവ് ഉയർന്നുനിൽക്കും. ഈർപ്പത്തിന്റെ നിരക്ക് അബുദാബിയിൽ 20 മുതൽ 60 ശതമാനം വരെയും ദുബായിൽ 25 മുതൽ 70 ശതമാനം വരെയുമായിരിക്കും. കടൽ പൊതുവെ ശാന്തമായിരിക്കുമെങ്കിലും അറേബ്യൻ ഗൾഫിന്റെ പടിഞ്ഞാറൻ ഭാഗങ്ങളിൽ ചില സമയങ്ങളിൽ കടൽ പ്രക്ഷുബ്ധമാകാൻ സാധ്യതയുണ്ട്. ഒമാൻ കടൽ പ്രദേശം ശാന്തമായിരിക്കുമെന്നും അധികൃതർ അറിയിച്ചു.
Content Highlights: Authorities have warned motorists to drive carefully as dense fog reduces visibility across parts of the UAE. Speed limits have been adjusted on affected roads to enhance traffic safety.
