LIVE TV
ശൈത്യകാല ക്യാമ്പിങ് സീസണിനോട് അനുബന്ധിച്ച് ഖത്തറിലെ സീലൈനിലെ ഭക്ഷണശാലകളില് 30 ശതമാനം വരെ ഇളവ്. ഭക്ഷണശാലകള് നിശ്ചയിച്ചതിലും കൂടുതല് തുക ഈടാക്കുകയോ സേവനങ്ങളില് വീഴ്ച വരുത്തുകയോ ചെയ്താല് ഉപഭോക്താക്കള്ക്ക് നേരിട്ട് അറിയിക്കണമെന്ന് വാണിജ്യ വ്യവസായ മന്ത്രാലയം അറിയിച്ചു.
2025-2026 വര്ഷത്തെ ക്യാമ്പിങ് സീസണ് കണക്കിലെടുത്ത്, പരിസ്ഥിതി കാലാവസ്ഥാ വ്യതിയാന മന്ത്രാലയവുമായി സഹകരിച്ചാണ് ജനക്ഷേമ പദ്ധതി നടപ്പിലാക്കുന്നത്. ക്യാമ്പ് ചെയ്യുന്നവര്ക്കും സന്ദര്ശകര്ക്കും മിതമായ നിരക്കില് ഭക്ഷണവും സേവനങ്ങളും ലഭ്യമാക്കുക എന്ന ലക്ഷ്യത്തോടെ ആരംഭിച്ച ഈ പദ്ധതി ഏപ്രില് 15 വരെ തുടരും. സംരംഭത്തിന്റെ ഭാഗമായി സീലൈനിലെ തിരഞ്ഞെടുത്ത റെസ്റ്റോറന്റുകളിലും കഫേകളിലും ഉപഭോക്താക്കള്ക്ക് 30 ശതമാനം വരെ വിലക്കിഴിവ് ലഭിക്കും.
പദ്ധതിയില് പങ്കാളികളാകുന്ന സ്ഥാപനങ്ങളെ പൊതുജനങ്ങള്ക്ക് എളുപ്പത്തില് തിരിച്ചറിയാനായി അവയുടെ മുന്വശത്ത് പദ്ധതിയുടെ ഔദ്യോഗിക സ്റ്റിക്കറുകള് പതിപ്പിച്ചിട്ടുണ്ടാകും. 2025-2026 ക്യാമ്പിംഗ് സീസണിലെ കുറഞ്ഞ സേവന നിരക്ക് പദ്ധതിയില് പങ്കാളി' എന്ന് രേഖപ്പെടുത്തിയ സ്റ്റിക്കറുകള് ഉള്ള കടകളില് മാത്രമായിരിക്കും ഈ ആനുകൂല്യം ലഭ്യമാകുക.
മിതമായ നിരക്കില് ഗുണമേന്മയുള്ള ഭക്ഷണവും സേവനങ്ങളും ഉറപ്പാക്കുതിനൊപ്പം അമിതവില ഈടാക്കുന്നത് തടയുകയുമാണ് ഇതിലൂടെ ലക്ഷ്യമിടുന്നത്. സീലൈന് മേഖലയിലെ വിനോദസഞ്ചാരവും വാണിജ്യ പ്രവര്ത്തനങ്ങളും പ്രോത്സാഹിപ്പിക്കുകയുമാണ് ഈ പദ്ധതിയിലൂടെ ലക്ഷ്യമിടുന്നതെന്ന് ഖത്തര് വാണിജ്യ വ്യവസായ മന്ത്രാലയം വ്യക്തമാക്കി.
Content Highlights: Qatar Sealine restaurants offer 30% discount this winter
