LIVE TV
ഒമാനിൽ നിക്ഷേപക വിസയിലുള്ളവർക്കും വിദേശ സ്വത്തുടമകൾക്കും വിസ നിയമങ്ങളിൽ വൻ ഇളവുകൾ പ്രഖ്യാപിച്ചു. പുതിയ ഭേദഗതി പ്രകാരം യോഗ്യരായ അപേക്ഷകർക്ക് പ്രാദേശിക സ്പോൺസറുടെ സഹായമില്ലാതെ തന്നെ ഇനി മുതൽ വിസയും താമസ പെർമിറ്റും ലഭിക്കും. രാജ്യത്തെ നിക്ഷേപ സൗഹൃദ അന്തരീക്ഷം കൂടുതൽ മെച്ചപ്പെടുത്തുക എന്ന ലക്ഷ്യത്തോടെയാണ് പുതിയ നീക്കം. പൊലീസ് ആൻഡ് കസ്റ്റംസ് ഇൻസ്പെക്ടർ ജനറൽ ലെഫ്റ്റനന്റ് ജനറൽ ഹസ്സൻ ബിൻ മൊഹ്സിൻ അൽ ഷുറൈഖിയാണ് ഔദ്യോഗിക ഗസറ്റിലൂടെ പുതിയ മാറ്റങ്ങൾ പ്രഖ്യാപിച്ചത്.
പുതുക്കിയ ചട്ടങ്ങൾ അനുസരിച്ച്, നിർമ്മാണ ആവശ്യങ്ങൾക്കോ റിയൽ എസ്റ്റേറ്റ് യൂണിറ്റുകൾക്കോ വേണ്ടി ഭൂമി വാങ്ങുന്ന വിദേശ പൗരന്മാർക്ക് ഒമാനി സ്പോൺസറുടെ ആവശ്യമില്ല. ബന്ധപ്പെട്ട വകുപ്പുകളുടെ അംഗീകാരത്തിന്റെ അടിസ്ഥാനത്തിൽ ഇവർക്ക് നേരിട്ട് വിസകൾക്കും റെസിഡൻസി പെർമിറ്റുകൾക്കും അപേക്ഷിക്കാവുന്നതാണ്. യോഗ്യരായ സ്വത്തുടമകളുടെ പങ്കാളികൾക്കും അടുത്ത ബന്ധുക്കൾക്കും ഈ പുതിയ വ്യവസ്ഥകളുടെ ആനുകൂല്യം ലഭിക്കും. കൂടാതെ, ഒമാനിൽ ഭൂമിയോ റിയൽ എസ്റ്റേറ്റ് യൂണിറ്റുകളോ സ്വന്തമായിട്ടുള്ള കമ്പനികളുടെ നിയമപരമായ പ്രതിനിധികൾക്കും സ്പോൺസറില്ലാതെ വിസകൾ നൽകും. ആറ് മാസം മുതൽ ഒരു വർഷം വരെയുള്ള കാലയളവിലേക്കാണ് ഈ വിസകൾ അനുവദിക്കുന്നത്. സമാനമായ കാലയളവുകളിലേക്ക് ഇവ പുതുക്കാനും സാധിക്കും. ഈ വിസയുള്ളവർക്ക് ഓരോ സന്ദർശനത്തിലും മൂന്ന് മാസം വരെ ഒമാനിൽ തങ്ങാൻ അനുമതിയുണ്ടായിരിക്കും.
നടപടിക്രമങ്ങൾ കൂടുതൽ ലളിതമാക്കുന്നതിന്റെ ഭാഗമായി ഒമാൻ ഓണർ വിസയുമായി ബന്ധപ്പെട്ട നിയമങ്ങളിലും ഭേദഗതികൾ വരുത്തിയിട്ടുണ്ട്. ഇതിലൂടെ വിദേശ പ്രോപ്പർട്ടി ഉടമകൾക്കും കമ്പനി പ്രതിനിധികൾക്കും സ്പോൺസർഷിപ്പ് ഇല്ലാതെ തന്നെ ബന്ധപ്പെട്ട അതോറിറ്റി വഴി നേരിട്ട് വിസ നേടാൻ കഴിയും. ജിസിസി പൗരന്മാർ, ലൈസൻസുള്ള വിദേശ നിക്ഷേപകർ, റിയൽ എസ്റ്റേറ്റ് യൂണിറ്റുകളുടെ വിദേശ ഉടമകൾ, സർക്കാർ സ്ഥാപനങ്ങളിൽ ജോലി ചെയ്യുന്ന വിദേശ ജീവനക്കാർ എന്നിവർക്ക് ഇനിമുതൽ സ്പോൺസർമാരായി പ്രവർത്തിക്കാൻ അർഹതയുണ്ടായിരിക്കും. ഇതിനുപുറമെ, രജിസ്റ്റർ ചെയ്ത റിയൽ എസ്റ്റേറ്റ് യൂണിറ്റുകൾ സ്വന്തമാക്കിയിട്ടുള്ളവർക്കും, രജിസ്ട്രേഷൻ നടപടികൾ ഇതുവരെ പൂർത്തിയാക്കാത്ത സ്വത്തുക്കളുടെ ഉടമകൾക്കും റെസിഡൻസി പെർമിറ്റുകൾ അനുവദിക്കാൻ പുതിയ നിയമം സഹായിക്കും.
അതേസമയം, നിയമപരമായ ഏതെങ്കിലും ഇടപാടിലൂടെ റിയൽ എസ്റ്റേറ്റ് യൂണിറ്റ് വിൽക്കുകയോ കൈമാറ്റം ചെയ്യുകയോ ചെയ്താൽ താമസരേഖ റദ്ദാക്കപ്പെടും. വിദേശ ഉടമയുടെയോ കമ്പനി പ്രതിനിധിയുടെയോ അവർക്കൊപ്പമുള്ള മുഴുവൻ കുടുംബാംഗങ്ങളുടെയോ റെസിഡൻസി പെർമിറ്റുകൾ ഇതിലൂടെ സ്വയമേവ റദ്ദാകുന്നതാണെന്നും പുതിയ നിയമത്തിൽ വ്യക്തമാക്കുന്നു.
Content Highlights: Oman has announced new visa facilitation measures for investors and foreign real estate owners. The initiative removes the requirement for a local sponsor for eligible applicants, aiming to attract more investment and strengthen the country's property sector.
