LIVE TV
ഹോർമുസ് കടലിടുക്കിൽ വെച്ച് കുവൈറ്റ് പതാകയേന്തിയ എണ്ണക്കപ്പലിന് നേരെ ആക്രമണമുണ്ടായതിനെ തുടർന്ന്, കപ്പലിലുണ്ടായിരുന്ന അഞ്ച് ഇന്ത്യൻ ജീവനക്കാരെ ഒമാൻ അധികൃതരുടെ സഹായത്തോടെ സുരക്ഷിതമായി തീരത്തെത്തിച്ചു. ഒമാനിലെ ഇന്ത്യൻ എംബസിയാണ് വെള്ളിയാഴ്ച സോഷ്യൽ മീഡിയ പ്ലാറ്റ്‌ഫോമായ എക്‌‌സിലൂടെ ഈ വിവരവും ചിത്രങ്ങളും പങ്കുവെച്ചത്. 'എം.ടി കാസിമ III' എന്ന കപ്പലിൽ ഉണ്ടായ അടിയന്തര സാഹചര്യത്തിൽ ഒമാൻ ഭരണകൂടവുമായി ചേർന്നാണ് രക്ഷാപ്രവർത്തനം ഏകോപിപ്പിച്ചത്.
കപ്പലിന് നേരെ തൊടുത്തുവിട്ട വസ്തു എവിടെ നിന്നാണ് വന്നതെന്നതിനെ കുറിച്ചോ കപ്പലിനുണ്ടായ നാശനഷ്ടങ്ങളുടെ വ്യാപ്തിയെക്കുറിച്ചോ ഉള്ള വിവരങ്ങൾ ഇതുവരെ ലഭ്യമായിട്ടില്ല. മേഖലയിൽ സുരക്ഷാ ഭീഷണിയും സംഘർഷാവസ്ഥയും നിലനിൽക്കുന്ന സാഹചര്യത്തിൽ, ഗൾഫ് മേഖലയിലൂടെ സഞ്ചരിക്കുന്ന വാണിജ്യ കപ്പലുകളിലെ പതിനായിരക്കണക്കിന് ഇന്ത്യൻ നാവികരുടെ സുരക്ഷ ഇന്ത്യൻ അധികൃതർ നിരന്തരം നിരീക്ഷിച്ചുവരികയാണ്.
മേഖലയിൽ പ്രവർത്തിക്കുന്ന വിവിധ വാണിജ്യ കപ്പലുകളിലായി 4,500-ലധികം ഇന്ത്യൻ നാവികർ സേവനമനുഷ്ഠിക്കുന്നുണ്ടെന്ന് വിദേശകാര്യ മന്ത്രാലയ വക്താവ് രൺധീർ ജയ്‌സ്വാൾ കഴിഞ്ഞ ദിവസം വ്യക്തമാക്കിയിരുന്നു. കൂടാതെ, ഇന്ത്യയിലേക്ക് ചരക്കുമായി എത്തുന്ന ഇന്ത്യയുടെയും മറ്റ് വിദേശ രാജ്യങ്ങളുടെയും 12 കപ്പലുകളിലായി 163 ഇന്ത്യൻ ജീവനക്കാർ ഉണ്ടെന്നും അദ്ദേഹം അറിയിച്ചിരുന്നു.
കപ്പലുകളുടെ സുരക്ഷിതമായ സഞ്ചാരം ഉറപ്പാക്കാനും ആവശ്യമുള്ള ഘട്ടങ്ങളിൽ അടിയന്തര സഹായം എത്തിക്കാനും കേന്ദ്ര സർക്കാർ വിദേശരാജ്യങ്ങളിലെ ഇന്ത്യൻ എംബസികളുമായും പ്രാദേശിക അധികൃതരുമായും ചേർന്ന് പ്രവർത്തിച്ചുവരികയാണ്.
Content Highlights: Five Indian nationals aboard Kuwait-flagged oil tanker MT Kazimah III were safely shifted ashore after the vessel was struck by a projectile while sailing through the Strait of Hormuz. The Indian Embassy in Oman coordinated the rescue and thanked Omani authorities for their assistance.
