LIVE TV
പ്രവാസി ലീഗൽ സെൽ പ്രതിനിധികൾ വിവിധ ആവശ്യങ്ങൾ ഉന്നയിച്ചുകൊണ്ട് കേരളം മുഖ്യമന്ത്രി വി ഡി സതീശനുമായി ഔദ്യോഗിക വസതിയിൽ കൂടിക്കാഴ്ച നടത്തി. പ്രവാസികാര്യ വകുപ്പിന്റെ ചുമതല മുഖ്യമന്ത്രിക്കാണ്. പ്രവാസി ക്ഷേമം, പുനരധിവാസം, സാമൂഹ്യസുരക്ഷ, ആരോഗ്യപരിരക്ഷ, തൊഴിൽ, നിക്ഷേപം, പുനസംയോജനം തുടങ്ങിയ പ്രധാന വിഷയങ്ങളുമായി ബന്ധപ്പെട്ട നിർദേശങ്ങൾ സർക്കാരിന്റെ നയപ്രഖ്യാപനത്തിലും സംസ്ഥാന ബജറ്റിലും ഉൾപ്പെടുത്തണമെന്നും പ്രവാസി സമൂഹത്തിന്റെ ദീർഘകാല ആവശ്യങ്ങൾ പരിഗണിക്കുന്ന സമഗ്ര പ്രവാസി നയരൂപീകരണം നടത്തണമെന്നും പ്രവാസി ലീഗൽ സെൽ പ്രതിനിധികൾ മുഖ്യമന്ത്രിയോട് അഭ്യർത്ഥിച്ചു.
പ്രവാസികളിൽ നിന്നും ശേഖരിച്ച പെൻഷൻ സംബന്ധമായ 135 വ്യക്തിഗത പരാതികൾ മുഖ്യമന്ത്രിക്ക് കൈമാറി. നിയമവും പദ്ധതി ചട്ടങ്ങളും പാലിക്കാതെ പ്രവാസി ക്ഷേമബോർഡ് കൈക്കൊണ്ട പരാതികൾ അനുഭാവപൂർവ്വം പരിഗണിക്കണമെന്ന് പിഎൽസി അഭ്യർത്ഥിച്ചു.
പ്രവാസി നിക്ഷേപവും സംരംഭകത്വവും പ്രോത്സാഹിപ്പിക്കുന്നതിനായി പ്രവാസി ഇൻവെസ്റ്റ്മെന്റ് ആൻഡ് ഫിനാൻസ് കോർപ്പറേഷൻ രൂപീകരിക്കുക, മടങ്ങിയെത്തിയ പ്രവാസികൾക്ക് മെഡിക്കൽ ഇൻഷുറൻസ് ഏർപ്പെടുത്തുക, സർക്കാർ പങ്കാളിത്തത്തോടെ പ്രവാസികൾക്ക് കെയർ ഹോമുകൾ രൂപീകരിക്കുക, ഡിജിറ്റൽ സംവിധാനങ്ങളും SOP (Standard Operating Procedure)-യും തയ്യാറാക്കി നിർദ്ദിഷ്ട പ്രവാസി പോലീസ് സ്റ്റേഷൻ പ്രവർത്തനക്ഷമമാക്കുക, ക്ഷേമനിധി അംഗത്വത്തിന് നിലവിലുള്ള 60 വയസ്സ് പ്രായപരിധി എടുത്തുകളയുക, ലോകകേരളസഭയെ കൂടുതൽ ജനാധിപത്യവൽക്കരിക്കുകയും വർഷത്തിലൊരിക്കലെങ്കിലും പ്രവാസി സംഗമങ്ങൾ സംഘടിപ്പിക്കുകയും ചെയ്യുക, എൻ ആർ ഐ കമ്മീഷൻ നിയമം ഭേദഗതി ചെയ്ത് സമഗ്രമായി പരിഷ്കരിക്കുക, പ്രവാസി ക്ഷേമ പെൻഷൻ വർദ്ധിപ്പിക്കുക, സൗദി അറേബ്യായിലെ നാസ്സർ അൽ ഹാജിരി കമ്പനി ജീവനക്കാരുടെ സർവീസ് ആനുകൂല്യങ്ങൾ ലഭിക്കുന്നതിന് നടപടിയെടുക്കുക തുടങ്ങിയ 13 ആവശ്യങ്ങൾ അടങ്ങിയ നിവേദനവും മുഖ്യമന്ത്രിക്ക് നൽകി.
പ്രവാസികളുടെ ഒരു യോഗം അടുത്തുതന്നെ വിളിക്കുമെന്നും അതിൽ കൂടുതൽ കാര്യങ്ങൾ ചർച്ചചെയ്യാമെന്നും മുഖ്യമന്ത്രി പറഞ്ഞു. കൂടിക്കാഴ്ചയിൽ സംസ്ഥാന വൈസ് പ്രസിഡന്റ് ജിഹാന്ഗിർ സംസ്ഥാന ജനറൽ സെക്രട്ടറി അഡ്വ. ആർ മുരളീധരൻ, PLC നാഷണൽ കോ-ഓർഡിനേറ്റർ ഫോർ വിമൺ അഡ്വ. വഹീദ യു., ഭരണസമിതി അംഗങ്ങളായ നന്ദഗോപകുമാർ , നിയാസ് പൂജപ്പുര, ശ്രീകുമാർ എന്നിവർ പങ്കെടുത്തു.
Content Highlights: Representatives of the Expatriate Legal Cell held discussions with the Chief Minister regarding key concerns affecting expatriates. The meeting focused on legal assistance, welfare measures, and finding effective solutions to the problems faced by overseas Malayalis.
