LIVE TV
ജയിലർ 2വിൽ വില്ലൻ വേഷത്തിൽ അഭിനയിച്ചുകൊണ്ടിരുന്നപ്പോൾ രജിനികാന്തിനൊപ്പം തനിക്കുണ്ടായ അനുഭവത്തെക്കുറിച്ച് സുരാജ് വെഞ്ഞാറമൂട്. ഷൂട്ടിംഗ് സമയത്ത് തന്റെ ഭാഗങ്ങൾ എടുത്തതിന് ശേഷം രജിനികാന്ത് കയ്യടിച്ച് അഭിനന്ദിച്ചെന്നും നാഷണൽ അവാർഡ് കിട്ടിയിട്ട് ഉണ്ടെങ്കിലും ഓസ്കർ ലഭിച്ച അവസ്ഥയായിരുന്നുവെന്നും സുരാജ് പറഞ്ഞു. ജയിലർ 2 പ്രൊമോഷൻ പരിപാടിയിൽ സുരാജ് പറഞ്ഞ ഈ വാക്കുകളാണ് ഇപ്പോൾ സോഷ്യൽ മീഡിയയിൽ ശ്രദ്ധ നേടുന്നത്.
‘ഷൂട്ടിനിടയില്‍ ഒരു ദിവസം പുലര്‍ച്ച വരെ ഷൂട്ട് പോയി. പുലര്‍ച്ചെ രണ്ടര മണി വരെ ഞാനും സാറും തമ്മിലുള്ള ഷൂട്ട് ഉണ്ടായിരുന്നു. രണ്ടരയ്ക്ക് അദ്ദേഹത്തിന്റെ പോര്‍ഷന്‍ കഴിഞ്ഞു. അതിന് ശേഷം എന്റെ ഷോട്ടായിരുന്നു. ഞാന്‍ ക്യാരക്ടറായി അഭിനയിച്ച ശേഷം സാര്‍ കട്ട് വിളിച്ചു. രണ്ടേമുക്കാലായിട്ടുണ്ടാകും. അപ്പോഴാണ് ഒരു ക്ലാപ്പ് ശബ്ദം കേള്‍ക്കുന്നത്. നോക്കുമ്പോള്‍ രജിനി സാര്‍ ക്ലാപ്പടിച്ചുകൊണ്ട് നടന്നുവരികയാണ്'.
'അദ്ദേഹത്തിന്റെ ഒപ്പം ലൊക്കേഷനിലുള്ള എല്ലാവരും കൈയടിക്കുന്നുണ്ട്. അത് എന്റെ ലൈഫ് ടൈം മൊമന്റാണ്. അന്ന് ഞാന്‍ സാറിന്റെ അടുത്ത് പോയി എനിക്ക് നാഷണല്‍ അവാര്‍ഡ് കിട്ടിയിട്ടുണ്ടെന്നും എന്നാല്‍ ഇപ്പോഴാണ് ഓസ്‌കാര്‍ അവാര്‍ഡ് കിട്ടിയതെന്നും പറഞ്ഞു. സമയം അത്രയും ലേറ്റായിട്ടും അദ്ദേഹത്തെ പോലൊരാള്‍ അവിടെ കാത്തുനിന്ന് കോ ആക്ടറിന്റെ പെര്‍ഫോമന്‍സ് കണ്ട് അയാളെ അഭിനന്ദിക്കുക എന്ന് പറഞ്ഞാല്‍ ചെറിയ കാര്യമല്ല. അത് ഒരിക്കലും എനിക്ക് മറക്കാന്‍ സാധിക്കില്ല. വലിയ ഇന്‍സ്പിരേഷനാണ് അത്', സുരാജ് പറഞ്ഞു.
അതേസമയം, 2023ല്‍ പുറത്തിറങ്ങി വലിയ വിജയമായി മാറിയ ജയിലറിന്റെ രണ്ടാം ഭാഗം ഒക്ടോബര്‍ 15ന് തിയേറ്ററുകളിലെത്തും. രജിനികാന്തിനൊപ്പം നിരവധി മലയാളി താരങ്ങളാണ് സിനിമയിൽ അണിനിരക്കുന്നത്. കൂടാതെ മോഹൻലാലും ഒരു പ്രധാന വേഷം ചെയ്യുന്നുണ്ട്. ശ്രീ ഗോകുലം ഗോപാലന്റെ ശ്രീ ഗോകുലം മൂവീസ് ആണ് ചിത്രം കേരളത്തിലും കർണാടകത്തിലും വമ്പൻ റിലീസായി പ്രദർശനത്തിനെത്തിക്കുന്നത്.
എസ് ജെ സൂര്യ, വിദ്യ ബാലൻ എന്നിവരാണ് ചിത്രത്തിലെ മറ്റ് പ്രധാന താരങ്ങൾ. മിഥുൻ ചക്രവർത്തി, യോഗി ബാബു, ഹക്കീം ഷാജഹാൻ എന്നിവരും ചിത്രത്തിന്റെ താരനിരയിലുണ്ട് ഇവരുടെ ക്യാരക്ടർ വീഡിയോ നേരത്തെ തന്നെ പുറത്ത് വരികയും ഏറെ ശ്രദ്ധ നേടുകയും ചെയ്തിരുന്നു.
Content Highlights: Suraj Venjaramoodu about rajinikanth and jailer 2
