LIVE TV
മോഹൻലാൽ നായകനായ പുതിയ ചിത്രം തുടരും ഒടിടിയിൽ പ്രദർശനം ആരംഭിച്ചിരിക്കുകയാണ്. തിയേറ്ററിൽ മികച്ച സ്വീകാര്യത ലഭിച്ച സിനിമയ്ക്ക് ഒടിടിയിലും മികച്ച അഭിപ്രായം തന്നെയാണ് ലഭിക്കുന്നത്. ഒടിടി റിലീസിന് പിന്നാലെ മോഹൻലാലിന്റെ അഭിനയ മുഹൂർത്തങ്ങൾ ആരാധകർ ആഘോഷമാക്കുകയും ചെയ്യുന്നുണ്ട്. ഇപ്പോഴിതാ ഒടിടി റിലീസിന് പിന്നാലെയും ചിത്രത്തിന് തിയേറ്ററിൽ മികച്ച ബുക്കിംഗ് ലഭിക്കുന്നു എന്ന റിപ്പോർട്ട് ആണ് പുറത്തുവരുന്നത്.
ഞായറാഴ്ച ദിവസമായ ഇന്നലെ തിയേറ്ററുകളിൽ തുടരുമിന് മികച്ച ബുക്കിംഗ് ആണ് ലഭിച്ചത്. പല തിയേറ്ററുകളും നിറഞ്ഞ സദസ്സോടെയായിരുന്നു പ്രദർശനം നടത്തിയത്. ഒടിടി റിലീസിനെത്തുടർന്ന് ചില തിയേറ്ററുകളിൽ നിന്നും സിനിമ പിൻവലിച്ചിരുന്നു. വളരെ കുറച്ച് തിയേറ്ററുകളിൽ മാത്രമാണ് ഇപ്പോൾ സിനിമയുള്ളത്. തിങ്കളാഴ്ചയും സിനിമയ്ക്ക് നല്ല ബുക്കിംഗ് ലഭിക്കുമെന്ന സൂചനയാണ് വരുന്നത്. അതേസമയം, ഒടിടിയിൽ സിനിമ കത്തിക്കയറുകയാണ്. തമിഴ്, തെലുങ്ക് പ്രേക്ഷകരിൽ നിന്നും സിനിമയ്ക്ക് മികച്ച അഭിപ്രായമാണ് ലഭിക്കുന്നത്. മോഹൻലാൽ ഞെട്ടിച്ചെന്നും മലയാള സിനിമ വീണ്ടും അത്ഭുതപ്പെടുത്തുകയാണെന്നുമാണ് കമന്റുകൾ.
വില്ലനെ അവതരിപ്പിച്ച പ്രകാശ് വർമയുടെ പ്രകടനം ഞെട്ടിച്ചെന്നും തമിഴിൽ പോലും ഇത്തരമൊരു വില്ലനെ കണ്ടിട്ട് കുറെ കാലമായി എന്നും അഭിപ്രായങ്ങളുണ്ട്. ചിത്രത്തിലെ ആക്ഷൻ സീനുകൾക്കും മോഹൻലാൽ - ശോഭന റൊമാന്റിക് സീനുകൾക്കും കയ്യടി ലഭിക്കുന്നുണ്ട്. ദൃശ്യം പോലെ അത്ഭുതപ്പെടുത്തിയ സിനിമയാണ് തുടരുമെന്നും മോഹൻലാൽ ഒരു കംപ്ലീറ്റ് തന്നെയാണെന്നും സിനിമ കണ്ടവർ സോഷ്യൽ മീഡിയയിൽ കുറിക്കുന്നുണ്ട്. തിയേറ്ററിൽ വിജയമാകുന്ന സിനിമകൾ ഒടിടിയിലെത്തുമ്പോൾ വിമർശനങ്ങൾക്ക് വിധേയരാകുന്ന പതിവ് രീതിയെകളെ മറികടന്നാണ് സിനിമ സ്ട്രീമിങ്ങിലും മികച്ച അഭിപ്രായം സ്വന്തമാക്കുന്നത്.
ജിയോ ഹോട്ട്സ്റ്റാറിലൂടെയാണ് തുടരും ഒടിടി സ്ട്രീം ചെയ്യുന്നത്. മലയാളത്തിന് പുറമെ തമിഴ്, തെലുങ്ക്, കന്നഡ, ഹിന്ദി ഭാഷകളിലും സിനിമ ലഭ്യമാണ്. തരുൺ മൂർത്തി സംവിധാനം ചെയ്യുന്ന സിനിമയിൽ പ്രകാശ് വർമ, ബിനു പപ്പു, ഫർഹാൻ ഫാസിൽ, മണിയൻപിള്ള രാജു, തോമസ് മാത്യു, ഇർഷാദ് തുടങ്ങിയവരാണ് ചിത്രത്തിൽ പ്രധാന വേഷങ്ങളിൽ എത്തുന്നത്. നിരവധി പുതുമുഖങ്ങളും ചിത്രത്തിൽ എത്തുന്നുണ്ട്. കെ ആര്‍ സുനിലിന്റെ കഥയ്ക്ക് തരുണ്‍ മൂര്‍ത്തിയും ചേര്‍ന്നാണ് തിരക്കഥ ഒരുക്കിയത്.
Content Highlights: Thudarum continues housefull shows even after OTT release
