LIVE TV
ഇന്ത്യയുടെ സാമ്പത്തിക വളർച്ച സംബന്ധിച്ച പ്രതീക്ഷകൾ ഉയർത്തി അന്താരാഷ്ട്ര നാണയനിധി. 2026–27 സാമ്പത്തിക വർഷത്തിലെ ഇന്ത്യയുടെ മൊത്ത ആഭ്യന്തര ഉൽപ്പാദന വളർച്ചാ പ്രവചനം 6.4 ശതമാനത്തിൽനിന്ന് 7 ശതമാനമായി ഉയർത്തി. ആഭ്യന്തര ആവശ്യകതയിലെ കരുത്തും സേവനമേഖലയുടെ മികച്ച പ്രകടനവുമാണ് ഈ മാറ്റത്തിന് പ്രധാന കാരണങ്ങളായി ഐഎംഎഫ് ചൂണ്ടിക്കാട്ടിയത്.
പ്രതീക്ഷിച്ചതിലും മികച്ച സാമ്പത്തിക മുന്നേറ്റമാണ് ഇന്ത്യയിൽ പ്രകടമാകുന്നതെന്ന് ഐഎംഎഫ് വിലയിരുത്തി. ഉപഭോഗം, ആഭ്യന്തര വിപണിയിലെ ആവശ്യകത, സേവനമേഖലയിലെ പ്രവർത്തനങ്ങൾ എന്നിവ വളർച്ചയ്ക്ക് പിന്തുണ നൽകുന്നു.
റിസർവ് ബാങ്ക് ഓഫ് ഇന്ത്യയും ലോകബാങ്കും ഏഷ്യൻ വികസന ബാങ്കും ഇന്ത്യയുടെ വളർച്ചാ പ്രവചനങ്ങൾ ഉയർത്തിയ പശ്ചാത്തലത്തിലാണ് ഐഎംഎഫിന്റെ പുതിയ വിലയിരുത്തൽ.
അതേസമയം വളർച്ചാ പ്രവചനം ഉയർത്തിയ പശ്ചാത്തലത്തിലും ആഗോള സമ്പദ്‌വ്യവസ്ഥയ്ക്ക് വെല്ലുവിളികൾ തുടരുന്നുണ്ട്. ഭൗമരാഷ്ട്രീയ സംഘർഷങ്ങൾ, നീണ്ടുനിൽക്കുന്ന യുദ്ധസാഹചര്യങ്ങൾ, എണ്ണവിലയിലെ വർധന എന്നിവ പണപ്പെരുപ്പ സമ്മർദം ഉയർത്താനും സാമ്പത്തിക വളർച്ചയെ ബാധിക്കാനും സാധ്യതയുണ്ടെന്ന് ഐഎംഎഫ് മുന്നറിയിപ്പ് നൽകുന്നു.
എണ്ണ ഇറക്കുമതിയെ ആശ്രയിക്കുന്ന ഇന്ത്യയെ സംബന്ധിച്ചിടത്തോളം ആഗോള ഇന്ധനവിലയിലെ മാറ്റങ്ങൾ പ്രധാനമാണ്. അതേസമയം, അനുകൂല ജനസംഖ്യാ ഘടന, ഘടനാപരമായ പരിഷ്കാരങ്ങൾ എന്നിവ ഇന്ത്യയുടെ ദീർഘകാല വളർച്ചയ്ക്ക് പിന്തുണയാകുമെന്നാണ് വിലയിരുത്തൽ.
