LIVE TV
ലോകം ഇതുവരെ കണ്ടിട്ടില്ലാത്ത ഒരു വലിയ പ്രതിസന്ധിയിലൂടെയാണ് ജപ്പാൻ കടന്നുപോകുന്നത്. അവിടുത്തെ ജനങ്ങൾക്ക് വളരെ വേഗത്തിൽ പ്രായമാകുന്നു, അതേസമയം കുട്ടികൾ ജനിക്കുന്നത് കുത്തനെ കുറയുന്നു. ജപ്പാനിലെ 29% ആളുകളും (ഏകദേശം 3.6 കോടി പേർ) 65 വയസ്സിനു മുകളിലുള്ളവരാണ്. 2024-ൽ ജപ്പാനിലെ ജനനനിരക്ക് ചരിത്രത്തിലെ ഏറ്റവും താഴ്ന്ന നിലയിലെത്തി.
തൊഴിലാളികളുടെ കുറവ്
പ്രായമായവർ കൂടുകയും യുവാക്കൾ കുറയുകയും ചെയ്യുന്നതോടെ ജോലി ചെയ്യാൻ ആളില്ലാത്ത അവസ്ഥയാണ്. 2040 ആകുമ്പോഴേക്കും ജപ്പാനിൽ 1.1 കോടി തൊഴിലാളികളുടെ കുറവ് ഉണ്ടാകുമെന്നാണ് കണക്കുകൾ സൂചിപ്പിക്കുന്നത്.
മനുഷ്യന് പകരം റോബോട്ടുകൾ
ജോലി ചെയ്യാൻ ആളില്ലാത്ത വിടവ് നികത്താൻ ജപ്പാൻ ഇപ്പോൾ ആശ്രയിക്കുന്നത് അത്യാധുനിക റോബോട്ടുകളെയാണ്.പ്രായമായവരെ പരിചരിക്കാൻ മനുഷ്യരൂപത്തിലുള്ള റോബോട്ടുകളെ അവർ വികസിപ്പിച്ചു. ഈ റോബോട്ടുകൾക്ക് രോഗികളെ വശത്തേക്ക് തിരിച്ചു കിടത്താനും, സോക്സ് ധരിപ്പിക്കാനും, ഭക്ഷണം പാകം ചെയ്യാനും വരെ കഴിയും. മുമ്പ് 24 മണിക്കൂറും പ്രവർത്തിച്ചിരുന്ന കടകൾ ജീവനക്കാരില്ലാത്തതിനാൽ ഇപ്പോൾ നേരത്തെ അടയ്ക്കുന്നു. ഇത് പരിഹരിക്കാൻ റോബോട്ടുകളെയും ഓട്ടോമേഷൻ രീതികളെയും അവർ കടകളിൽ എത്തിക്കുന്നു. ലോറി ഡ്രൈവർമാരുടെ കുറവ് കാരണം സാധനങ്ങൾ എത്തിക്കാൻ ട്രക്കുകൾക്ക് പകരം ട്രെയിനുകളെയാണ് ഇപ്പോൾ പല കമ്പനികളും ആശ്രയിക്കുന്നത്.
സാമ്പത്തിക വിപ്ലവം
ജപ്പാൻ പണ്ടുമുതലേ റോബോട്ട് നിർമ്മാണത്തിൽ ലോകത്ത് ഒന്നാമതാണ്. ലോകത്തെമ്പാടുമുള്ള വ്യാവസായിക റോബോട്ടുകളിൽ വലിയൊരു പങ്കും ജാപ്പനീസ് കമ്പനികളുടേതാണ . 2035 ആകുമ്പോഴേക്കും പ്രായമായവരെ പരിചരിക്കുന്ന റോബോട്ടുകളുടെ വിപണി മാത്രം ഏകദേശം 31,000 കോടി രൂപയുടേതായി വളരുമെന്നാണ് കരുതുന്നത്.
