LIVE TV
ചിലപ്പോള് ടിവി കണ്ടുകൊണ്ടിരിക്കുമ്പോഴായിരിക്കും റിമോട്ട് പെട്ടെന്ന് പ്രവര്ത്തിക്കാതാകുന്നത്. അപ്പോള് നാം ആവര്ത്തിച്ച് ബട്ടണുകള് അമര്ത്തിനോക്കും, റിമോട്ട് കൈയില് തട്ടിനോക്കും. പക്ഷേ ചാനല് മാറില്ല. അത്തരം അവസരങ്ങളില് സ്വാഭാവികമായി എല്ലാവരും ചിന്തിക്കുന്നത് റിമോട്ടിന് എന്തെങ്കിലും കേടുപാട് സംഭവിച്ചിട്ടുണ്ടോ അതോ അതിന്റെ ബാറ്ററി തീര്ന്നുപോയോ എന്നൊക്കെയായിരിക്കും.
ഇങ്ങനെയൊരു സാഹചര്യത്തില് ആളുകള് പുതിയൊരു റിമോട്ട് വാങ്ങുകയോ അല്ലെങ്കില് അത് നന്നാക്കാന് കൊടുക്കുകയോ ചെയ്യും. എന്നാല് നിങ്ങളുടെ കൈയ്യിലിരിക്കുന്ന സ്മാര്ട്ട്ഫോണിന് ഈ പ്രശ്നം നിമിഷത്തിനുള്ളില് കണ്ടുപിടിക്കാന് കഴിഞ്ഞാലോ? മൊബൈലിന്റെ ക്യാമറ ഉപയോഗിച്ച് റിമോട്ടിന് കേടുപാടുകള് സംഭവിച്ചിട്ടുണ്ടോ എന്ന് പരിശോധിക്കാന് കഴിയും.
ഇന്ന് വിപണിയില് ലഭ്യമായ മിക്ക ടിവി, എസി, അല്ലെങ്കില് സെറ്റ്-ടോപ്പ് ബോക്സ് റിമോട്ടുകളും ഇന്ഫ്രാറെഡ് ലൈറ്റ് സാങ്കേതികവിദ്യ ഉപയോഗിച്ചുള്ളവയാണ്. റിമോട്ടിലെ ഒരോ ബട്ടണ് അമര്ത്തുമ്പോഴും റിമോട്ടില് ഘടിപ്പിച്ചിരിക്കുന്ന ചെറിയ ബള്ബില് നിന്ന് ഒരു അദൃശ്യ പ്രകാശം പുറത്തുവരികയും, സിഗ്നല് നേരിട്ട് ടിവിയുടെ സെന്സറിലേക്ക് കൈമാറ്റം ചെയ്യപ്പെടുകയും ചെയ്യുന്നു. ഈ ഇന്ഫ്രാറെഡ് പ്രകാശത്തിന് നഗ്നനേത്രങ്ങള്കൊണ്ട് കാണാന് കഴിയാത്ത ഒരു അദൃശ്യമായ ഫ്രീക്വന്സി ഉണ്ട്. എങ്കിലും നമ്മുടെ സ്മാര്ട്ട്ഫോണ് ക്യാമറകളിലെ സെന്സറുകള്ക്ക് ഈ പ്രകാശം എളുപ്പത്തില് കാണാനും റെക്കോര്ഡുചെയ്യാനും കഴിയും. റിമോട്ടുകളുടെ കേടുപാടുകള് പരീക്ഷിക്കാന് ഈ സാങ്കേതിക വിദ്യയാണ് ഉപയോഗിക്കുന്നത്.
ആദ്യം സ്മാര്ട്ട്ഫോണിന്റെ പ്രൈമറി അല്ലെങ്കില് ഫ്രണ്ട് ക്യാമറ ആപ്പ് തുറക്കുക. എന്നിട്ട് ക്യാമറ സ്ക്രീനില് നോക്കുക. റിമോട്ടിലെ ഏതെങ്കിലും ബട്ടണ് അമര്ത്തിപ്പിടിക്കുക. ബട്ടണ് അമര്ത്തുമ്പോള് റിമോട്ടിന്റെ ബള്ബില് എന്തെങ്കിലും ചലനമുണ്ടോ എന്ന് കാണാന് മൊബൈല് സ്ക്രീന് ശ്രദ്ധാപൂര്വ്വം നിരീക്ഷിക്കുക.
ബട്ടണ് അമര്ത്തിയതിന് ശേഷം നിങ്ങളുടെ മൊബൈല് സ്ക്രീനില് റിമോട്ടിന്റെ ബള്ബില് നിന്ന് വയലറ്റ്, ചുവപ്പ് അല്ലെങ്കില് വെള്ള നിറത്തിലുള്ള ഒരു തിളക്കം പ്രത്യക്ഷപ്പെടുകയാണെങ്കില്, അതിനര്ത്ഥം റിമോട്ട് പൂര്ണ്ണമായും പ്രവര്ത്തനക്ഷമമാണെന്നും ബാറ്ററി തകരാറുകള് ഇല്ല എന്നുമാണ്. അങ്ങനെയെങ്കില് പ്രശ്നം ടിവിയുടെ സെന്സറിലായിരിക്കാം.
ക്യാമറ വെളിച്ചം കാണിക്കുന്നുണ്ടെങ്കിലും അത് വളരെ മങ്ങിയതോ ദുര്ബലമോ ആണെങ്കില്, റിമോട്ടിന്റെ ബാറ്ററി തീര്ന്നുപോകാന് പോകുന്നു എന്ന് മനസ്സിലാക്കുക. ഒരു പുതിയ ബാറ്ററി ഇട്ടുകഴിഞ്ഞാല് റിമോട്ട് പഴയതുപോലെ പ്രവര്ത്തിക്കാന് തുടങ്ങും. പക്ഷേ ഒരു ബട്ടണ് അമര്ത്തിയതിനുശേഷവും മൊബൈല് സ്ക്രീനില് വെളിച്ചം ദൃശ്യമാകുന്നില്ലെങ്കില് റിമോട്ടിനുള്ളിലെ സര്ക്യൂട്ട് കേടായതായോ അല്ലെങ്കില് അതിന്റെ ബാറ്ററി പൂര്ണ്ണമായും തീര്ന്നതായോ മനസിലാക്കാവുന്നതാണ്.
റിമോട്ടിനുള്ളില് ബാറ്ററികള് ഘടിപ്പിച്ചിരിക്കുന്ന ഇരുമ്പ് സ്പ്രിംഗുകളിലോ പോര്ട്ടുകളിലോ ചിലപ്പോള് തുരുമ്പോ പൊടിയോ അടിഞ്ഞുകൂടാം. ഇത് വൈദ്യുതി തടസ്സത്തിനും കാരണമാകും. ബാറ്ററി മാറ്റുന്നതിനുമുമ്പ് ഉണങ്ങിയ തുണിയോ മറ്റോ ഉപയോഗിച്ച് ഈ ഭാഗം വൃത്തിയാക്കാന് ശ്രമിക്കുക. ഇങ്ങനെ ചെയ്യുമ്പോള് റിമോട്ട് പ്രവര്ത്തിച്ചേക്കാം.
Content Highlights : Is the TV remote faulty, or is it a battery issue? Here is a way to find out using your mobile camera.
