LIVE TV
ദീര്‍ഘനേരത്തെ ഡ്രൈവിങ്, ഗതാഗതക്കുരുക്ക്, അന്തരീക്ഷത്തിലെ ഉയര്‍ന്ന ചൂട്, കൂളിങ് സംവിധാനത്തിലെ തകരാറുകള്‍ എന്നിവ കാറിന്റെ എന്‍ജിന്‍ അമിതമായി ചൂടാകാന്‍ കാരണമാകാം. ഡാഷ്‌ബോര്‍ഡിലെ താപനില സൂചി Temperature indicator ചുവന്ന സ്ഥലത്തേക്ക് നീങ്ങുന്നതും മുന്നറിയിപ്പ് ലൈറ്റ് തെളിയുന്നതും ശ്രദ്ധിക്കണം. ഇത്തരം സാഹചര്യങ്ങളില്‍ പരിഭ്രാന്തരായി പെട്ടെന്ന് തീരുമാനമെടുക്കുന്നത് വാഹനത്തിന് കൂടുതല്‍ കേടുപാടുകള്‍ വരുത്താനും അപകടസാധ്യത വര്‍ധിപ്പിക്കാനും ഇടയാക്കും.
എന്‍ജിന്‍ ചൂടാകുന്നതായി ശ്രദ്ധയില്‍പ്പെട്ടാല്‍ ആദ്യം കാറിന്റെ എസി ഓഫ് ചെയ്യാം. ഇത് എന്‍ജിനിലെ അധികഭാരം കുറയ്ക്കാന്‍ സഹായിക്കും. തുടര്‍ന്ന് റോഡിലെ സാഹചര്യം കണക്കിലെടുത്ത് സുരക്ഷിതമായ സ്ഥലത്തേക്ക് വാഹനം മാറ്റുക. എന്നാല്‍ താപനില അമിതമായി ഉയരുകയോ മുന്നറിയിപ്പ് ലൈറ്റ് തെളിയുകയോ പുക പുറത്തുവരികയോ ചെയ്താല്‍ യാത്ര തുടരരുത്. സുരക്ഷിതമായി വാഹനം നിര്‍ത്തി എന്‍ജിന്‍ ഓഫ് ചെയ്യണം. റോഡിന്റെ നടുവിലോ അപകടസാധ്യതയുള്ള സ്ഥലത്തോ പെട്ടെന്ന് വാഹനം നിര്‍ത്തുന്നത് ഒഴിവാക്കുക.
എന്‍ജിന്‍ ചെറുതായി ചൂടാകുന്നതും അമിതമായി ചൂടാകുന്നതും തമ്മില്‍ വ്യത്യാസമുണ്ട്. Temperature Warning ഉണ്ടാവുകയാണെങ്കില്‍ വാഹനം സുരക്ഷിതമായി നിര്‍ത്തി എന്‍ജിന്‍ ഓഫ് ചെയ്യുന്നതാണ് ഉചിതം. പുക ഉയരുകയോ അസാധാരണമായ ശബ്ദം കേള്‍ക്കുകയോ ചെയ്യുന്ന സാഹചര്യത്തിലും യാത്ര തുടരരുത്. ചില വാഹനങ്ങളില്‍ എന്‍ജിന്‍ ചൂട് കുറയ്ക്കാന്‍ ഹീറ്റര്‍ ഉപയോഗിക്കുന്നത് സഹായിച്ചേക്കാം. എന്നാല്‍ അമിതമായി ചൂടായ എന്‍ജിനുമായി യാത്ര തുടരാനുള്ള മാര്‍ഗമായി ഇതിനെ കാണരുത്. വാഹനത്തിന്റെ താപനില നിയന്ത്രണവിധേയമാകുന്നില്ലെങ്കില്‍ സുരക്ഷിതമായി വണ്ടി നിര്‍ത്തി സഹായം തേടണം.
എന്‍ജിന്‍ ചൂടായിരിക്കുമ്പോള്‍ ബോണറ്റ് തുറക്കുന്നത് അപകടകരമായേക്കാം. ഉള്ളില്‍നിന്ന് ചൂട് പുറത്തേക്ക് വരാനും പൊള്ളലേല്‍ക്കാനും സാധ്യതയുണ്ട്. അതിനാല്‍ വാഹനം നിര്‍ത്തിയ ഉടന്‍ ബോണറ്റ് തുറക്കാതെ എന്‍ജിന്‍ തണുക്കാന്‍ സമയം നല്‍കുക. പ്രത്യേകിച്ച് റേഡിയേറ്ററിന്റെ അടപ്പോ കൂളന്റ് ടാങ്കിന്റെ അടപ്പോ ചൂടുള്ളപ്പോള്‍ തുറക്കരുത്. കൂളിങ് സംവിധാനത്തിനുള്ളില്‍ സമ്മര്‍ദം നിലനില്‍ക്കുന്നതിനാല്‍ ചൂടുള്ള ദ്രാവകം പുറത്തേക്ക് തെറിച്ച് ഗുരുതരമായി പൊള്ളലേല്‍ക്കാം.
എന്‍ജിന്‍ അമിതമായി ചൂടായിരിക്കുമ്പോള്‍ അതിലേക്ക് പെട്ടെന്ന് തണുത്ത വെള്ളം ഒഴിക്കുന്നത് ഒഴിവാക്കണം. താപനിലയിലുണ്ടാകുന്ന പെട്ടെന്നുള്ള മാറ്റം ചില ഭാഗങ്ങള്‍ക്ക് കേടുപാടുകള്‍ വരുത്താന്‍ സാധ്യതയുണ്ട്. എന്‍ജിന്‍ പൂര്‍ണമായി തണുത്തശേഷം വാഹനത്തിന്റെ നിര്‍ദേശങ്ങള്‍ അനുസരിച്ച് കൂളന്റ് നില പരിശോധിക്കാം. കൂളന്റ് വീണ്ടും വീണ്ടും കുറയുന്നുണ്ടെങ്കില്‍ അത് ചോര്‍ച്ചയുടെയോ കൂളിങ് സംവിധാനത്തിലെ മറ്റേതെങ്കിലും തകരാറിന്റെയോ സൂചനയായിരിക്കാം. ഇത്തരം സാഹചര്യങ്ങളില്‍ മെക്കാനിക്കിന്റെ സഹായം തേടണം.
ഒരിക്കല്‍ താപനില സാധാരണ നിലയിലെത്തിയതുകൊണ്ട് പ്രശ്‌നം പൂര്‍ണമായി പരിഹരിച്ചുവെന്ന് കരുതരുത്. റേഡിയേറ്റര്‍, കൂളന്റ്, വാട്ടര്‍ പമ്പ് തുടങ്ങിയ ഭാഗങ്ങളിലെ തകരാറുകള്‍ എന്‍ജിന്‍ ആവര്‍ത്തിച്ച് ചൂടാകാന്‍ കാരണമാകാം. അതുകൊണ്ട് ഇത്തരം പ്രശ്‌നങ്ങള്‍ തുടര്‍ച്ചയായി അനുഭവപ്പെടുന്നുണ്ടെങ്കില്‍ വാഹനം വീണ്ടും വീണ്ടും ഓടിച്ച് പരീക്ഷിക്കാതെ സര്‍വീസ് സെന്ററില്‍ പരിശോധന നടത്തണം. കൃത്യസമയത്ത് തകരാര്‍ കണ്ടെത്തുന്നത് വലിയ അറ്റകുറ്റപ്പണികളും അനാവശ്യ ചെലവുകളും ഒഴിവാക്കാന്‍ സഹായിക്കും.
Content Highlights :The engine of a car overheating while on the road is a cause for concern for many drivers. What should you do if a temperature warning light appears on the dashboard or if smoke begins to rise from the engine? Let’s look at the steps to take in such situations
