LIVE TV
ചെന്നൈ: സഹോദരി രാധ ഉന്നയിച്ച ചെക്ക് തട്ടിപ്പ് പരാതിയില് വിശദീകരണവുമായി നടി അംബിക രംഗത്ത്. രാധ വളരെ സൂക്ഷ്മമായും ശ്രദ്ധിച്ചും കാര്യങ്ങള് കൈകൈര്യം ചെയ്യുന്ന ആളാണ്. ബാഗുകള് അടക്കം അത്രമാത്രം സൂക്ഷിച്ച് നമ്പര് ലോക്ക് ആടക്കം ഇട്ടാണ് ഉറങ്ങാന് പോലും പോകുന്നത്. അങ്ങനയുള്ള രാധ ചെക്ക് വീട്ടിലെ കബോര്ഡില് അലക്ഷ്യമായി വെച്ചിട്ട് പോയി എന്ന് പറയുന്നത് തന്നെ വിശ്വസിക്കുമോ. ഇത് കേള്ക്കുന്നവര് സാമാന്യ ബുദ്ധിയില്ലാത്തവരാണോ എന്ന് അവര് ചോദിച്ചു.
ചെക്ക് തന്നത് രാധ തന്നെയാണ്. എആര്എസ് ഗാര്ഡന്റെ ഷെയറുമായി ബന്ധപ്പെട്ട് എന്തിനൊക്കെയാണ് ആ ചെക്ക് നല്കിയതെന്ന് കൃത്യമായി രേഖപ്പെടുത്തിയിട്ടുണ്ട്. ഇത് എആര്എസുമായി ബന്ധപ്പെട്ട് നടന്ന നിയമ വ്യവഹാരത്തിന്റ ഭാഗമായി കേസ് ഒത്തുതീര്പ്പാക്കുന്നതിന് രാധ തനിക്ക് നല്കേണ്ടി വന്നതാണ്. രാധ തന്നെയാണ് അതില് ഒപ്പിട്ടിരിക്കുന്നതെന്നും അംബിക വ്യക്തമാക്കി. എന്നാല് ഇങ്ങനെ ഒരു പരാതി ഉണ്ടെന്ന് താന് അറിയുന്നത് തന്നെ സഹോദരന് പറയുമ്പോഴാണെന്നും അവര് വ്യക്തമാക്കി.
വിഷയം പൊലീസില് എത്തിയത് എന്തുകൊണ്ടാണെന്ന് തനിക്ക് മനസ്സിലാകുന്നില്ലെന്ന് അംബിക പറഞ്ഞു. തന്റെ കാഴ്ചപ്പാടില്, ബാധിക്കപ്പെട്ട വ്യക്തിയാണ് താനെന്ന് അവര് വാദിച്ചു. രാധ എന്തിനാണ് തനിക്കെതിരെ പരാതി നല്കിയതെന്ന് അറിയില്ലെന്നും അവർ പറഞ്ഞു. 'നോക്കുമ്പോള്, ഇത് വിചിത്രമായി തോന്നുന്നു, കാരണം യഥാര്ത്ഥത്തില് ഞാന് വഞ്ചിക്കപ്പെട്ട ആളാണ്. പരാതി നല്കേണ്ടത് ഞാനായിരുന്നു. കുഴപ്പമില്ല. രാധയെ ആരെങ്കിലും ഉപദേശിച്ചിരിക്കാം, അതുകൊണ്ടാണ് അവര് പരാതി നല്കിയത്', അംബിക പറഞ്ഞു.
എആര്എസ് ഗാര്ഡനെക്കുറിച്ചായിരുന്നു അംബിക പ്രധാനമായും സംസാരിച്ചത്. മുന് തമിഴ്നാട് മുഖ്യമന്ത്രിയും നടനുമായ എംജിആറില് നിന്ന് കുടുംബത്തിന് 25 ഏക്കര് ഭൂമി സൗജന്യമായി ലഭിച്ചു എന്ന തരത്തില് യൂട്യൂബില് പ്രചരിക്കുന്ന വാര്ത്തകളെയും അവര് തള്ളി. കുടുംബം കഠിനാധ്വാനം ചെയ്ത് സമ്പാദിച്ച പണം കൊണ്ടാണ് ആ സ്ഥലം വാങ്ങിയതെന്ന് അംബിക വ്യക്തമാക്കി. എആര്എസ് ഗാര്ഡന് തനിക്ക് വൈകാരികമായി ഇത്രയേറെ പ്രധാനപ്പെട്ടതാകാനുള്ള കാരണവും അവര് വിശദീകരിച്ചു. 'ദേവര് ഫിലിംസ്' കുടുംബത്തില് നിന്ന്, ഞങ്ങള് കഠിനാധ്വാനം ചെയ്ത് ഉണ്ടാക്കിയ പണം കൊണ്ട് വാങ്ങിയ സ്ഥലമാണത്. പ്രത്യേകിച്ച്, തങ്ങള് വാങ്ങിയ ആദ്യത്തെ സ്വത്തായിരുന്നു എആര്എസ് ഗാര്ഡന്. അത് തന്റെ ജീവിതം പോലെ തന്നെയാണെന്നാണ് അവര് പറഞ്ഞത്.
എആര്എസ് ഗാര്ഡന് എന്ന യഥാര്ത്ഥ നെയിം ബോര്ഡ് നീക്കം ചെയ്ത് മറ്റൊന്ന് സ്ഥാപിച്ചതിനെക്കുറിച്ചും അംബിക സംസാരിച്ചു. തമിഴ് സിനിമാരംഗത്ത് ഈ സ്ഥലത്തിന് ദീര്ഘകാലത്തെ ഒരു വ്യക്തിത്വമുണ്ടെന്നും, അതിനാല് ആ കാഴ്ച തനിക്ക് ഏറെ പ്രയാസകരമായിരുന്നുവെന്നും അവര് പറഞ്ഞു. എന്റെ എആര്എസ് ഗാര്ഡന് എന്ന ബോര്ഡ് നീക്കം ചെയ്ത് മറ്റൊരു ബോര്ഡ് സ്ഥാപിക്കുന്നത് കണ്ടപ്പോള് എനിക്ക് അത് സഹിക്കാനായില്ല. തമിഴ് സിനിമാരംഗത്തുള്ള എല്ലാവര്ക്കും 'എആര്എസ് ഗാര്ഡന്' എന്താണെന്ന് അറിയാം,' അംബിക പറഞ്ഞു. ഈ സ്ഥലം നിലവില് ഒരു നിയമതര്ക്കത്തില് ഉള്പ്പെട്ടിരിക്കുന്നതിനാല്, കേസിന്റെ എല്ലാ വശങ്ങളെക്കുറിച്ചും പരസ്യമായി സംസാരിക്കാന് കഴിയില്ലെന്നും അവര് വ്യക്തമാക്കി.
എആര്എസ് ഗാര്ഡന് വില്പ്പനയ്ക്കുള്ളതല്ല. നിയമപരമായ ഒരു തര്ക്കം നിലനില്ക്കുന്നതിനാല്, എല്ലാ കാര്യങ്ങളെക്കുറിച്ചും തുറന്നു സംസാരിക്കാന് കഴിയില്ല. പേര് മാറ്റിയതില് വൈകാരികമായാണ് അംബിക പ്രതികരിച്ചത്. എആര്എസിലെ 'എ' മരിച്ചുപോയോ എന്നാണ് അവര് ചോദിച്ചത്. എആര്എസ് ഗാര്ഡന്റെ ആരംഭ ഘട്ടത്തില് അതില് തങ്ങള് മൂന്ന് സഹോദരങ്ങളുടെ തന്നെ പേര് വെക്കാന് പറഞ്ഞത് എംജിആറാണ്. അതാണ് ഇപ്പോല് ആര്ആര് എന്ന് മാറ്റിയിരിക്കുന്നതെന്നും അംബിക പ്രതികരിച്ചു.
Content Highlights: Actress Ambika has responded to the cheque fraud complaint raised by her sister Radha. Ambika questioned the claim that Radha, known for being highly careful with her belongings, would leave a cheque unattended in a cupboard at home. She also questioned whether such a claim could be accepted as credible.
