LIVE TV
കോഴിക്കോട്: നിപ സമ്പര്ക്കപ്പട്ടികയില് ഉണ്ടായിരുന്ന എട്ടു പേരുടെ പരിശോധന ഫലം കൂടി നെഗറ്റീവായി. ഇതോടെ സംസ്ഥാനത്ത് പുതിയ രോഗബാധയില്ല. അതേസമയം സമ്പര്ക്കപ്പട്ടികയില് മൂന്നു പേരെ കൂടി ഉള്പ്പെടുത്തി. നിലവില് 103പേരാണ് സമ്പര്ക്കപ്പട്ടികയിലുള്ളത്. നിപ രോഗബാധിതന് ചികിത്സയില് തുടരുകയാണ്. രോഗിക്ക് ഇന്ന് റെംഡിസിവര് ആദ്യ ഡോസ് നല്കി.
അതേസമയം നിപ സ്ഥിരീകരിച്ച സാഹചര്യത്തില് കോഴിക്കോട് കേന്ദ്രീകരിച്ച് പ്രവര്ത്തിച്ചില്ലെന്ന ആരോപണത്തില് വിശദീകരണവുമായി ആരോഗ്യവകുപ്പ് മന്ത്രി കെ മുരളീധരന്. 2018ല് നിപ പടര്ന്ന് പിടിച്ചിരുന്നുവെന്നും അതുകൊണ്ടാണ് അന്നത്തെ മന്ത്രി അവിടെ ക്യാമ്പ് ചെയ്ത് പ്രവര്ത്തിച്ചതെന്നും കെ മുരളീധരന് പറഞ്ഞു. ഇന്ന് നിപ മാത്രമല്ല, ഷിഗെല്ലയുമുണ്ട്. രോഗിയെ അഡ്മിറ്റ് ചെയ്യുന്നതടക്കം എല്ലാ കാര്യങ്ങളും ചെയ്ത ശേഷമാണ് താന് മടങ്ങിയത്. സെന്ട്രലൈസ്ഡ് പ്രവര്ത്തനത്തിന് കുറേ കൂടി സൗകര്യം തിരുവനന്തപുരത്താണ്. മാത്രവുമല്ല നിപ വ്യാപിച്ചിട്ടുമില്ല. കൂടുതല് നിപ പോസിറ്റീവ് കേസുകള് റിപ്പോര്ട്ട് ചെയ്തിരുന്നെങ്കില് അന്ന് തന്നെ തിരികെ വരുമായിരുന്നുവെന്നും കെ മുരളീധരന് പറഞ്ഞു. നിപ ഇതുവരെ അപകടകാരിയല്ലെന്നും രോഗിയുടെ ജീവന് നിലനിര്ത്താനുള്ള പോരാട്ടമാണ് ഡോക്ടര്മാര് നടത്തുന്നതെന്നും മന്ത്രി വ്യക്തമാക്കി.
രോഗബാധ റിപ്പോര്ട്ട് ചെയ്ത രാമനാട്ടുകര മുനിസിപ്പാലിറ്റി ഡിവിഷന് അഞ്ചിലെ 35 വീടുകളില് കൂടി ആരോഗ്യ പ്രവര്ത്തകര് ് സര്വേ നടത്തിയിരുന്നു. ഇതോടെ ഡിവിഷനിലെ 320 വീടുകളിലെയും സന്ദര്ശനം പൂര്ത്തിയായി. രോഗബാധിതന് നിലവില് മെഡിക്കല് കോളജില് ചികിത്സയിലാണ്.
Content Highlights: Health authorities have confirmed that no new Nipah virus infections have been detected in the latest assessment
