LIVE TV
തിരുവനന്തപുരം: തൊണ്ടിമുതല് തിരിമറിക്കേസില് മുന് മന്ത്രിയും ഇപ്പോള് എംഎല്എയുമായ ആന്റണി രാജുവിന് മൂന്ന് വര്ഷം തടവ് ശിക്ഷ വിധിച്ച് കോടതി. കേസെടുത്ത് മൂന്ന് പതിറ്റാണ്ടിന് ശേഷമാണ് കേസില് വിധി വന്നത്.
ഗൂഢാലോചനയ്ക്ക് ആറ് മാസം തടവ്, തെളിവ് നശിപ്പിക്കലിന് മൂന്ന് വര്ഷം തടവും 10,000 രൂപ പിഴയും, കള്ള തെളിവ് ഉണ്ടാക്കല് വകുപ്പിന് മൂന്ന് വര്ഷം തടവുമാണ് ശിക്ഷ. ഐപിസി 120 ബി, 201, 193, 409, 34 എന്നീ വകുപ്പുകളായിരുന്നു ആന്റണി രാജുവിനെതിരെ തെളിഞ്ഞത്. ജോസുമായി ആന്റണി രാജു ഗൂഢാലോചന നടത്തി തൊണ്ടിമുതല് പുറത്തെടുത്ത് അതില് കൃത്രിമത്വം വരുത്തിയെന്നും അങ്ങനെ ഹൈക്കോടതിയിലെ കേസ് പ്രതിക്ക് അനുകൂലമാക്കിയെന്നും തെളിഞ്ഞതായി കോടതി ചൂണ്ടിക്കാട്ടിയിരുന്നു.
തൊണ്ടിമുതല് തിരിമറി കേസില് ആന്റണി രാജു കുറ്റക്കാരനാണെന്ന് നെടുമങ്ങാട് ജുഡീഷ്യല് ഫസ്റ്റ്ക്ലാസ് മജിസ്ട്രേറ്റ് കോടതിയാണ് വിധിച്ചത്. കേസിലെ ഒന്നാം പ്രതിയും കോടതി ക്ലര്ക്കുമായിരുന്ന ജോസും കുറ്റക്കാരനാണെന്ന് കോടതി വിധിച്ചു. ലഹരിക്കേസില് പിടിയിലായ വിദേശിയെ രക്ഷിക്കാനായി തൊണ്ടിമുതലില് തിരിമറി നടത്തിയെന്ന കേസില് മൂന്ന് പതിറ്റാണ്ട് നീണ്ട വാദ പ്രതിവാദങ്ങള്ക്കൊടുവിലാണ് കോടതി വിധി പറഞ്ഞത്. ഇതോടെ ആന്റണി രാജുവിന്റെ നിയമസഭാ അംഗത്വം റദ്ദാവും.
1990 ഏപ്രില് നാലിന് തിരുവനന്തപുരം വിമാനത്താവളത്തില് ലഹരിമരുന്ന് കേസില് പിടിയിലായ ഓസ്ട്രേലിയന് പൗരനെ ശിക്ഷയില്നിന്ന് രക്ഷപ്പെടുത്താന് തൊണ്ടിയായ അടിവസ്ത്രത്തില് കൃത്രിമം കാട്ടിയെന്നതാണ് ആന്റണി രാജുവിന് എതിരായ കേസ്. അടിവസ്ത്രത്തില് ഒളിപ്പിച്ച 61 ഗ്രാം ഹാഷിഷുമായി ഓസ്ട്രേലിയക്കാരന് ആന്ഡ്രൂ സാല്വദോര് സര്വലിയാണ് പിടിയിലായത്. ഈ കേസില് പ്രധാന തൊണ്ടിമുതലായിരുന്നു സര്വലിയുടെ അടിവസ്ത്രം.
പ്രശസ്ത അഭിഭാഷകയായ സെലിന് വില്ഫ്രഡായിരുന്നു പ്രതിയ്ക്ക് വേണ്ടി അന്ന് ഹാജരായത്. സെലിന്റെ ജൂനിയര് അഭിഭാഷകനായിരുന്നു ആന്റണി രാജു. എന്നാല് ഈ കേസ് തോല്ക്കുകയും സര്വലിക്ക് തിരുവനന്തപുരം സെഷന്സ് ജഡ്ജി കെ വി ശങ്കരനാരായണന് 10 വര്ഷം തടവും ഒരു ലക്ഷം രൂപ പിഴ വിധിക്കുകയും ചെയ്തു. എന്നാല്, തൊട്ടുപിന്നാലെ ഹൈക്കോടതിയില് അപ്പീല് ഫയല്ചെയ്തു.
ഇതില് കൃത്രിമത്വം നടത്തിയാല് മേല്ക്കോടതിയില് അപ്പീലില് ഗുണം ചെയ്യുമെന്ന് കണ്ടെത്തിയതിന് പിന്നാലെ ജോസുമായി ആന്റണി രാജു ഗൂഢാലോചന നടത്തുകയായിരുന്നു. കുഞ്ഞിരാമ മേനോന് ആയിരുന്നു അന്ന് പ്രതിക്കുവേണ്ടി വക്കാലത്തെടുത്തത്. കേസിലെ പ്രധാന തൊണ്ടിമുതലായി പൊലീസ് ഹാജരാക്കിയ അടിവസ്ത്രം പ്രതിയുടേതല്ല എന്ന വാദമായിരുന്നു അന്ന് പ്രതിഭാഗം ഉയര്ത്തിയത്. തുടര്ന്ന് അടിവസ്ത്രം പ്രതിക്ക് ധരിക്കാന് കഴിയില്ലെന്ന് കോടതി നേരിട്ട് ഉറപ്പാക്കുകയും ഹൈക്കോടതി പ്രതിയെ വെറുതേവിടുകയും ചെയ്തു.
തുടര്ന്ന് ഓസ്ട്രേലിയയിലേക്ക് കടന്ന ആന്ഡ്രൂ അവിടെ കൊലക്കേസില്പ്പെടുകയും തടവില് വെച്ച് സഹതടവുകാരനോട് കേരളത്തിലെ കേസിനെക്കുറിച്ച് പറയുകയുമായിരുന്നു. തുടര്ന്ന് ഇന്റര്പോള് സിബിഐയ്ക്ക് വിവരം കൈമാറുകയും സിബിഐ കേരളാ പൊലീസിന് കത്ത് നല്കുകയുമായിരുന്നു. പിന്നാലെയാണ് ആന്റണി രാജുവിനെതിരേ കേസെടുക്കുന്നത്.
Content Highlights: Antony Raju has been sentenced to three years of imprisonment by the court
