LIVE TV
തിരുവനന്തപുരം: സംസ്ഥാനത്തെ പഴയ സ്‌കൂള്‍ കെട്ടിടങ്ങള്‍ പൊളിക്കുന്ന നടപടി വേഗത്തിലാക്കാനൊരുങ്ങി വിദ്യാഭ്യാസ വകുപ്പ്. സംസ്ഥാന വിദ്യാഭ്യാസ വകുപ്പിന്റെ ചരിത്രത്തില്‍ ആദ്യമായി വിവിധ ഫണ്ടുകള്‍ ഉപയോഗിച്ച് 5000 കോടി രൂപയുടെ പുതിയ സ്‌കൂള്‍ കെട്ടിടങ്ങളാണ് പൊതു വിദ്യാലയങ്ങളില്‍ നിര്‍മ്മിച്ചതെന്നും പുതിയ സ്‌കൂള്‍ കെട്ടിടങ്ങളില്‍ ക്ലാസുകള്‍ ആരംഭിച്ചിട്ടും പലയിടത്തും പഴയ സ്‌കൂള്‍ കെട്ടിടങ്ങള്‍ അതേപടി നിലനില്‍ക്കുകയാണെന്നും വിദ്യാഭ്യാസ വകുപ്പ് പുറത്തിറക്കിയ വാര്‍ത്താക്കുറിപ്പില്‍ പറയുന്നു. പല സ്‌കൂളുകളിലും നൂറു കൊല്ലത്തിലധികം പഴക്കമുളള കെട്ടിടങ്ങള്‍ ഇപ്പോഴുമുണ്ട്.
അതേസമയം, കെട്ടിടങ്ങള്‍ പൊളിച്ചുമാറ്റുന്നതിന് തദ്ദേശസ്ഥാപനങ്ങള്‍ ഈടാക്കുന്നത് വന്‍ തുകയാണ്. പൊളിച്ച സാധനങ്ങള്‍ കൊണ്ടുപോകുന്നതിനാണ് ഭീമമായ ഫീസ് ഈടാക്കുന്നത്. ഇതുമൂലം കെട്ടിടങ്ങള്‍ പൊളിക്കുന്നത് തടസപ്പെടുകയാണ്. വിഷയത്തില്‍ ചുമതലപ്പെട്ടവര്‍ അടിയന്തര നടപടി സ്വീകരിക്കണമെന്ന് വിദ്യാഭ്യാസ മന്ത്രി ആവശ്യപ്പെട്ടു. നിയമപ്രകാരം കെട്ടിടങ്ങള്‍ പൊളിക്കാന്‍ ലേലം പിടിച്ച കോണ്‍ട്രാക്ടര്‍മാര്‍ പൊളിച്ച് സാമഗ്രികള്‍ കൊണ്ടുപോവുകയാണ് പതിവ്.
തദ്ദേശസ്ഥാപനങ്ങള്‍ വന്‍ തുക ഫീസായി നിശ്ചയിച്ചതുമൂലം കെട്ടിടങ്ങള്‍ പൊളിച്ചുമാറ്റുന്ന പ്രവര്‍ത്തനം പലയിടത്തും തടസപ്പെടുകയാണെന്നും ഇക്കാര്യം ഗൗരവമായി കണ്ട് ന്യായമായും നിയമപരമായും ചെയ്യേണ്ട കാര്യങ്ങള്‍ അടിയന്തരമായി ചെയ്ത് പഴയ കെട്ടിടങ്ങള്‍ പൊളിച്ചുമാറ്റാനുളള നടപടികള്‍ കൈക്കൊളേളണ്ടതുണ്ട്. അല്ലെങ്കില്‍ കെട്ടിടങ്ങള്‍ നിലംപൊത്തുന്ന സാഹചര്യമുണ്ടാകും. അതിനാല്‍ ഇക്കാര്യത്തില്‍ ചുമതലപ്പെട്ടവര്‍ അടിയന്തരമായി നടപടി സ്വീകരിക്കണം. ഈ വിഷയത്തില്‍ തദ്ദേശസ്വയംഭരണ സ്ഥാപനങ്ങള്‍ക്കൊപ്പം പ്രദേശത്തെ ജനങ്ങളും ജാഗ്രത കാണിക്കണമെന്നും മന്ത്രി വി ശിവന്‍കുട്ടി അഭ്യര്‍ത്ഥിച്ചു.
Content Highlights: The process of demolishing old school buildings in the state will be expedited says V Sivankutty
