Get the latest news at
your fingertips!
Download our app now
LIVE TV
Search
കോട്ടയം: പുതുപ്പള്ളി ഉപതിരഞ്ഞെടുപ്പില് യുഡിഎഫ് സ്ഥാനാര്ത്ഥി ചാണ്ടി ഉമ്മന് വിജയിക്കുമെന്ന ശുഭ പ്രതീക്ഷയുണ്ടെന്ന് സഹോദരി മറിയ ഉമ്മന്. ഏറ്റവും മികച്ച ഭൂരിപക്ഷത്തില് വിജയിക്കുമെന്നാണ് പാര്ട്ടിയുടേയും കുടുംബത്തിന്റേയും വിശ്വാസം. ഉമ്മന്ചാണ്ടിയെ പോലെ തന്നെ ചാണ്ടി ഉമ്മനേയും പുതുപ്പള്ളിയിലെ ജനങ്ങള് സ്വീകരിച്ചു കഴിഞ്ഞുവെന്നും മറിയ ഉമ്മന് പ്രതികരിച്ചു.
ചാണ്ടി ഉമ്മന്റെ വിജയം പ്രതീക്ഷിച്ചത് തന്നെയെന്ന് കോണ്ഗ്രസ് നേതാവ് രമേശ് ചെന്നിത്തല പ്രതികരിച്ചു. ചരിത്ര വിജയമായി മാറും. ഇടത് സര്ക്കാരിന്റെ ആണിക്കല്ല് ഇളക്കും. സര്ക്കാരിനെതിരെയുള്ള അതിശക്തമായ താക്കീത് ആയിരിക്കും ജനവിധിയെന്നും ചെന്നിത്തല പറഞ്ഞു.
സിപിഐഎമ്മും പുതുപ്പള്ളിയില് പരാജയം സമ്മതിച്ചു. എല് ഡി എഫ് പുതുപ്പള്ളിയില് ജയിച്ചാല് അത് ലോകാത്ഭുതം. ഇപ്പോള് അത്ഭുതമൊന്നും സംഭവിക്കുന്നില്ലല്ലോ. കേരളത്തിലെ ഏറ്റവും വലിയ ഭൂരിപക്ഷം എന്നല്ലേ യുഡിഎഫ് പറഞ്ഞത്, അത് വരുമോന്ന് നോക്കാമെന്നായിരുന്നു എ കെ ബാലന്റെ പ്രതികരണം.
പുതുപ്പള്ളിയില് വോട്ടെണ്ണല് പുരോഗമിക്കുമ്പോള് 16,000 വോട്ടിന്റെ ഭൂരിപക്ഷത്തില് യുഡിഎഫ് സ്ഥാനാര്ത്ഥി ചാണ്ടി ഉമ്മന് മുന്നിലാണ്. ഏറ്റവും പുതിയ കണക്ക് പ്രകാരം ചാണ്ടി ഉമ്മന് 33,432 വോട്ട്, എല്ഡിഎഫ് സ്ഥാനാര്ത്ഥി ജെയ്ക് സി തോമസ് 17,302 വോട്ട്, എന്ഡിഎ സ്ഥാനാര്ത്ഥി ലിജിന് 1,100 വോട്ടും നേടി.
