പശ്ചിമേഷ്യ പുകയുന്നു: കുവൈത്തിലും ബഹ്‌റൈനിലും ഡ്രോൺ ആക്രമണവുമായി ഇറാൻ; സമാധാന ചർച്ച വഴിമുട്ടി?

ഇറാനുമായി ചേർന്ന് ഗൂഢാലോചന നടത്തിയെന്ന പേരിൽ ബഹ്‌റൈനിലെ 64 ഷിയാ പുരോഹിതർക്ക് ജീവപര്യന്തം തടവുശിക്ഷ വിധിച്ചതിന് പിന്നാലെയാണ് ആക്രമണങ്ങൾ ശക്തമായത്

പശ്ചിമേഷ്യ പുകയുന്നു: കുവൈത്തിലും ബഹ്‌റൈനിലും ഡ്രോൺ ആക്രമണവുമായി ഇറാൻ; സമാധാന ചർച്ച വഴിമുട്ടി?
dot image

കുവൈത്ത്: ഒൻപത് മാസത്തോളം പിന്നിട്ട യുഎസ്-ഇറാൻ യുദ്ധം പശ്ചിമേഷ്യയെ വീണ്ടും കടുത്ത ആശങ്കയിലാഴ്ത്തുന്നു. സമാധാന ചർച്ചകൾ എങ്ങുമെത്താതെ വഴിമുട്ടി നിൽക്കുന്നതിനിടെ കുവൈത്തിലും ബഹ്‌റൈനിലും വീണ്ടും ഡ്രോൺ ആക്രമണങ്ങളുണ്ടായി. ഇതിനു തിരിച്ചടിയായി ഇറാൻ്റെ തെക്കൻ ദ്വീപായ ഖ്വേഷമിലെ മിസൈൽ വിക്ഷേപണ കേന്ദ്രത്തിന് നേരെ അമേരിക്ക വ്യോമാക്രമണം നടത്തി. ഇതിനു തിരിച്ചടിയായി കുവൈത്തിലെ അലി അൽ-സലേം വ്യോമതാവളത്തിന് നേരെ ഡ്രോൺ ആക്രമണം നടത്തിയതായി ഇറാൻ ഔദ്യോഗിക മാധ്യമങ്ങൾ റിപ്പോർട്ട് ചെയ്തു. അതേസമയം ഒമാൻ തീരത്ത് ചരക്കുകപ്പലിന് നേരെയുണ്ടായ ആക്രമണത്തിൽ ഒരു ഇന്ത്യൻ നാവികനെ കാണാതായി. ഇതിനിടെ ഇറാഖിലെ ആഭ്യന്തര സംഘർഷങ്ങൾ ലഘൂകരിക്കാൻ ഇറാൻ ഖുദ്‌സ് ഫോഴ്‌സ് കമാൻഡർ എസ്മായിൽ ഖാനി ബാഗ്ദാദിലെത്തിയിട്ടുണ്ട്.

ചൊവ്വാഴ്ച രാത്രി കുവൈത്തിന് നേരെ ഡ്രോൺ ആക്രമണമുണ്ടായതായി കുവൈത്ത് സൈന്യം സ്ഥിരീകരിച്ചു. വ്യോമ പ്രതിരോധ സംവിധാനങ്ങൾ ഡ്രോണുകളെ തകർക്കുന്നതിനിടെ രാജ്യത്ത് വലിയ സ്ഫോടന ശബ്ദങ്ങൾ കേട്ടതായും ജനങ്ങൾ ജാഗ്രത പാലിക്കണമെന്നും സൈന്യം അറിയിച്ചു. കുവൈത്തിലെ യുഎസ് സൈനിക താവളത്തെയാണ് തങ്ങൾ ലക്ഷ്യമിട്ടതെന്ന് ഇറാൻ വ്യക്തമാക്കിയിട്ടുണ്ട്. യുഎസ് നാവികസേനയുടെ ബഹ്‌റൈനിലെ ഷെയ്ഖ് ഇസ വ്യോമതാവളത്തിലെ റഡാർ സംവിധാനത്തിന് നേരെയും ഇറാൻ്റെ ഡ്രോൺ ആക്രമണമുണ്ടായി. അഞ്ചു ദിവസത്തിനിടെ ബഹ്‌റൈന് നേരെയുണ്ടാകുന്ന മൂന്നാമത്തെ ആക്രമണമാണിത്. ഇറാനുമായി ചേർന്ന് ഗൂഢാലോചന നടത്തിയെന്ന പേരിൽ ബഹ്‌റൈനിലെ 64 ഷിയാ പുരോഹിതർക്ക് ജീവപര്യന്തം തടവുശിക്ഷ വിധിച്ചതിന് പിന്നാലെയാണ് ആക്രമണങ്ങൾ ശക്തമായത്. ബഹ്‌റൈനിലെ ആക്രമണത്തിന് മണിക്കൂറുകൾക്കുള്ളിലാണ് ഹോർമുസ് കടലിടുക്കിലെ ഇറാൻ്റെ ഖ്വേഷം ദ്വീപിൽ യുഎസ് പ്രത്യാക്രമണം നടത്തിയത്. ആക്രമണത്തിൽ ജനവാസ മേഖലകൾക്കോ അടിസ്ഥാന സൗകര്യങ്ങൾക്കോ നാശനഷ്ടങ്ങളില്ലെന്ന് ഇറാൻ അറിയിച്ചു. തുടർന്ന് കുവൈത്തിലെ അലി അൽ-സലേം വ്യോമതാവളത്തിന് നേരെ ഇറാൻ ഡ്രോൺ ആക്രമണം നടത്തിയതായി ഇറാൻ ഔദ്യോഗിക മാധ്യമങ്ങൾ റിപ്പോർട്ട് ചെയ്തു. താവളത്തിലെ യുഎസ് ഡ്രോണുകളും മിസൈൽ സംവിധാനങ്ങളും ലക്ഷ്യമിട്ടാണ് തങ്ങൾ ആക്രമണം നടത്തിയതെന്ന് സൈന്യം പ്രസ്താവനയിൽ പറഞ്ഞു. തങ്ങളുടെ വ്യോമ പ്രതിരോധം ഡ്രോൺ ആക്രമണങ്ങളെ ചെറുക്കുന്നുണ്ടെന്ന് കുവൈറ്റ് സൈന്യം നേരത്തെ പറഞ്ഞിരുന്നു.

അതേസമയം ഹോർമുസ് കടലിടുക്കിലും ഒമാൻ തീരത്തും ചരക്കുകപ്പലുകൾക്ക് നേരെയുള്ള ആക്രമണവും തുടരുകയാണ്. തിങ്കളാഴ്ച ഒമാനിലെ ഖസബിന് സമീപം പനാമ പതാകയേന്തിയ 'താര ഗ്യാസ്' എന്ന ടാങ്കറിന് നേരെ രണ്ട് തവണ ആക്രമണമുണ്ടായി. കപ്പലിലുണ്ടായിരുന്ന 24 ഇന്ത്യക്കാർ ഉൾപ്പെടെ 25 ജീവനക്കാരും സുരക്ഷിതരാണെന്നായിരുന്നു ആദ്യ വിവരമെങ്കിലും, രണ്ടാമത്തെ ആക്രമണത്തിന് ശേഷം ഒരു ഇന്ത്യൻ നാവികനെ കാണാതായതായി കേന്ദ്ര തുറമുഖ മന്ത്രി സ്ഥിരീകരിച്ചു. ഒമാൻ തീരത്ത് 'ഓൺ ഫീനിക്സ്' എന്ന മറ്റൊരു കപ്പലിന് നേരെയും ആക്രമണമുണ്ടായി. ചൊവ്വാഴ്ച ഹോർമുസ് കടലിടുക്ക് മുറിച്ചുകടക്കാൻ ശ്രമിച്ച മൂന്ന് എണ്ണ ടാങ്കറുകൾ കടൽ മൈനുകളിൽ ഇടിച്ച് അപകടത്തിൽപ്പെട്ടതായി ഇറാൻ സൈന്യവും അറിയിച്ചു.

അതിനിടെ, ഇറാഖിൽ ഇറാൻ അനുകൂല സായുധ വിഭാഗമായ കതായിബ് ഹിസ്ബുല്ലയും സർക്കാരും തമ്മിലുള്ള തർക്കം രൂക്ഷമായി. ബാഗ്ദാദിന് സമീപമുള്ള തന്ത്രപ്രധാനമായ രണ്ട് എണ്ണ പൈപ്പ്‌ലൈനുകൾ തുരന്ന് കതായിബ് ഹിസ്ബുല്ല അനധികൃതമായി എണ്ണ ചോർത്തുന്നുവെന്ന ഇൻ്റലിജൻസ് റിപ്പോർട്ടുണ്ടായിരുന്നു. തുടർന്ന് പ്രധാനമന്ത്രി അലി അൽ സെയ്ദി പ്രദേശത്തേക്ക് സൈന്യത്തെ അയക്കാൻ ഉത്തരവിട്ടിരുന്നു. വെള്ളിയാഴ്ചയ്ക്കകം പ്രദേശം ഒഴിയണമെന്നാണ് സായുധ സംഘത്തിന് നൽകിയ അന്ത്യശാസനം. എന്നാൽ ആരോപണം നിഷേധിച്ച കതായിബ് ഹിസ്ബുല്ല, തങ്ങളുടെ സാമ്പത്തിക സ്രോതസ്സുകൾ തകർക്കാനും ആയുധം താഴെവെപ്പിക്കാനുമുള്ള സർക്കാരിൻ്റെ ബ്ലാക്ക്‌മെയിലിങ് തന്ത്രമാണിതെന്ന് കുറ്റപ്പെടുത്തി. ജീവൻ പോയാലും പിന്മാറില്ലെന്ന് സംഘടന പ്രഖ്യാപിച്ചു. ഇതോടെ നേരിട്ടുള്ള സൈനിക ഏറ്റുമുട്ടൽ ഒഴിവാക്കാൻ ഇറാൻ ഖുദ്‌സ് ഫോഴ്‌സ് കമാൻഡർ എസ്മായിൽ ഖാനി ഇറാഖിലെത്തി പ്രധാനമന്ത്രിയുമായും ഷിയാ നേതാക്കളുമായും ചർച്ച നടത്തിവരികയാണ്.

Commander of the Quds Force of Iran's Islamic Revolutionary Guard Corps (IRGC), Esmail Qaani
ഇറാൻ ഖുദ്‌സ് ഫോഴ്‌സ് കമാൻഡർ എസ്മായിൽ ഖാനി

യുദ്ധം ഒൻപത് മാസം പിന്നിട്ടിട്ടും അമേരിക്കയും ഇറാനും വിട്ടുവീഴ്ചയ്ക്ക് തയ്യാറാകാത്തത് സമാധാന ശ്രമങ്ങളെ പ്രതിസന്ധിയിലാക്കുന്നുണ്ട്. ഇറാനുമേൽ വീണ്ടും വലിയ ബോംബാക്രമണം നടത്തിയാൽ ഗൾഫ് രാജ്യങ്ങളിലെ എണ്ണക്കമ്പനികൾക്കും അടിസ്ഥാന സൗകര്യങ്ങൾക്കും നേരെ ഇറാൻ തിരിച്ചടിക്കുമെന്ന് ഗൾഫ് രാഷ്ട്രങ്ങൾ യുഎസ് പ്രസിഡന്‍റ് ഡൊണാൾഡ് ട്രംപിന് മുന്നറിയിപ്പ് നൽകിയിട്ടുണ്ട്. യുദ്ധം തുടങ്ങിയ ശേഷം ഗൾഫ് രാജ്യങ്ങൾക്ക് നേരെ ഇറാൻ്റെ എഴുപതിനായിരത്തോളം മിസൈൽ-ഡ്രോൺ ആക്രമണങ്ങളുണ്ടായതായി ജിസിസി സെക്രട്ടറി ജനറൽ ജാസിം അൽ ബുദൈവി വ്യക്തമാക്കിയിരുന്നു. ഈ സാഹചര്യത്തിൽ നേരിട്ടുള്ള ആക്രമണത്തിന് പകരം നാവിക ഉപരോധത്തിലൂടെയും സാമ്പത്തിക സമ്മർദ്ദത്തിലൂടെയും ഇറാനെ വരിഞ്ഞുമുറുക്കാനാണ് ട്രംപിൻ്റെയും യുഎസ് സ്റ്റേറ്റ് സെക്രട്ടറി മാർക്കോ റൂബിയോയുടെയും നീക്കം.

US President Donald Trump salutes while members of the US army carry a transfer case containing the remains of a US soldier
യുദ്ധത്തിൽ കൊല്ലപ്പെട്ട യുഎസ് സൈനികന്റെ മൃതദേഹത്തിന് സല്യൂട്ട് അർപ്പിക്കുന്ന പ്രസിഡന്റ് ഡോണൾഡ് ട്രംപ്.

എന്നാൽ യുഎസ് ഇടക്കാല തിരഞ്ഞെടുപ്പിൽ റിപ്പബ്ലിക്കൻ പാർട്ടിക്കേറ്റ തിരിച്ചടിയും ഇസ്രയേലിൽ നെതന്യാഹുവിനുണ്ടായ രാഷ്ട്രീയ ക്ഷീണവും തങ്ങൾക്ക് അനുകൂലമാണെന്നാണ് ഇറാൻ്റെ കണക്കുകൂട്ടൽ. നാവിക ഉപരോധം നീക്കുകയും മരവിപ്പിച്ച സ്വത്തുക്കൾ വിട്ടുനൽകുകയും ചെയ്താൽ മാത്രമേ ആണവ വിഷയത്തിൽ ചർച്ചയ്ക്ക് തയ്യാറാകൂ എന്നാണ് ഇറാൻ്റെ നിലപാട്. അതേസമയം, യുഎസ് ആക്രമണം ഇറാനിലെ തീവ്ര നിലപാടുകാരെ കൂടുതൽ ശക്തരാക്കിയെന്നും, പിക്കാക്സ് മൗണ്ടനിൽ ഇറാൻ വൻതോതിൽ സമ്പുഷ്ടീകരിച്ച യുറേനിയം ഒളിപ്പിച്ചിട്ടുണ്ടെന്നും യൂറോപ്യൻ ഇൻ്റലിജൻസ് വൃത്തങ്ങൾ മുന്നറിയിപ്പ് നൽകുന്നു.

വ്യാഴാഴ്ച ചൈനയിൽ വെച്ച് നടക്കുന്ന ഉച്ചകോടിയിൽ ഡൊണാൾഡ് ട്രംപ് ചൈനീസ് പ്രസിഡന്‍റ് ഷി ജിൻപിങ്, റഷ്യൻ പ്രസിഡന്‍റ് വ്ളാഡിമിർ പുടിൻ എന്നിവരുമായി ഇറാൻ യുദ്ധം ചർച്ച ചെയ്യും. ഒമാനും ഖത്തറും നടത്തുന്ന മധ്യസ്ഥ ശ്രമങ്ങൾ പരാജയപ്പെട്ടാൽ ജനുവരിയിൽ ഡെമോക്രാറ്റുകൾ യുഎസ് കോൺഗ്രസിൻ്റെ നിയന്ത്രണം ഏറ്റെടുക്കുന്നതിന് മുൻപ് ട്രംപ് വീണ്ടും സൈനിക നടപടിയിലേക്ക് നീങ്ങിയേക്കുമെന്ന ആശങ്കയും ശക്തമാണ്.

Content Highlights: Fresh drone attacks in Kuwait and Bahrain intensify the US-Iran conflict as peace talks stall. An Indian sailor is missing after a cargo vessel was attacked off Oman's coast, while US and Iranian strikes continue.

dot image
To advertise here,contact us
dot image