LIVE TV
ബെയ്ജിങ്: വായുവിൽ നിന്ന് വായുവിലേയ്ക്ക് തൊടുക്കാവുന്ന അത്യന്തം പ്രഹരശേഷിയുള്ള ആയുധങ്ങൾ വിക്ഷേപിക്കാൻ സഹായിക്കുന്ന ഹൈപ്പർസോണിക് ഗ്ലൈഡ് വെഹിക്കിളുകൾ (HGV) ചൈന വികസിപ്പിച്ചതായി റിപ്പോർട്ട്. കമാൻഡ് ആൻഡ് കൺട്രോൾ വിമാനങ്ങൾ, ആകാശത്ത് ഇന്ധനം നിറയ്ക്കുന്ന ടാങ്കർ വിമാനങ്ങൾ, എയർബോൺ ഏർളി വാർണിംഗ് ആൻഡ് കൺട്രോൾ ജെറ്റുകൾ തുടങ്ങി അതീവ നിർണായക സൈനിക വിമാനങ്ങളെ ആയിരക്കണക്കിന് കിലോമീറ്റർ അകലെവെച്ച് തന്നെ ആക്രമിക്കാൻ കഴിയുന്ന വായുവിൽ നിന്ന് വായുവിലേയ്ക്ക് തൊടുക്കാവുന്ന അത്യന്തം പ്രഹരശേഷിയുള്ള ആയുധങ്ങൾ വിക്ഷേപിക്കാൻ സഹായിക്കുന്ന ഹൈപ്പർസോണിക് ഗ്ലൈഡ് വെഹിക്കിളുകൾ ചൈന വികസിപ്പിച്ചതായാണ് ബ്ലൂംബെർഗ് റിപ്പോർട്ട് ചെയ്യുന്നത്. ഇത് സംബന്ധിച്ച വിവരങ്ങൾ നേരിട്ട് അറിവുള്ള വ്യക്തിയെ ഉദ്ധരിച്ചാണ് ബ്ലൂംബെർഗ് റിപ്പോർട്ട്.
ചൈന വികസിപ്പിച്ചിരിക്കുന്ന പുതിയ സാങ്കേതികവിദ്യ അമേരിക്കൻ വ്യോമസേനയുടെ E-4B നൈറ്റ്വാച്ച് പോലുള്ള പറക്കും കമാൻഡ് പോസ്റ്റുകൾക്കും ആകാശത്ത് ഇന്ധനം നിറയ്ക്കുന്ന ടാങ്കർ വിമാനങ്ങൾക്കും എയർബോൺ എർളി വാർണിംഗ് ആൻഡ് കൺട്രോൾ വിമാനങ്ങൾക്കും വലിയ ഭീഷണിയാകുമെന്നാണ് വിലയിരുത്തൽ. ചൈനീസ് സൈന്യം ചില ഹൈപ്പർസോണിക് ക്രൂസ് മിസൈലുകളിൽ വായുവിൽ നിന്ന് വായുവിലേയ്ക്ക് തൊടുക്കാവുന്ന ആക്രമണ ശേഷിയും വിവിധ മിസൈൽ സംവിധാനങ്ങളിൽ ആൻ്റി-ഷിപ്പ് ശേഷിയും ഉൾപ്പെടുത്തിയിട്ടുണ്ടെന്നും റിപ്പോർട്ടിൽ പറയുന്നു.
ഹൈപ്പർസോണിക് ഗ്ലൈഡ് വെഹിക്കിളുകളിൽ നിന്ന് വായുവിൽ നിന്ന് വായുവിലേയ്ക്ക് മിസൈലുകൾ വിക്ഷേപിക്കാൻ കഴിയുന്ന സംവിധാനങ്ങൾ വികസിപ്പിക്കുകയും പ്രവർത്തിപ്പിക്കുകയും ചെയ്യുന്ന ഏക രാജ്യം നിലവിൽ ചൈനയാണെന്നാണ് പൊതുവായി വിലയിരുത്തപ്പെടുന്നത്. ലോകത്തിലെ ഏറ്റവും വലിയ ബാലിസ്റ്റിക് മിസൈൽ ശേഖരമായ 3,150-ലധികം മിസൈലുകൾ വിവിധ സൈനിക ദൗത്യങ്ങൾക്കായി പ്രയോജനപ്പെടുത്താനുള്ള ചൈനയുടെ നീക്കത്തിന്റെ ഭാഗമായാണ് ഈ വികസനമെന്നും വിദഗ്ധർ ചൂണ്ടിക്കാണിക്കുന്നത്.
ചൈനയുടെ DF-17 മിസൈലിൽ ഘടിപ്പിക്കുന്ന HGV-യ്ക്ക് ഏകദേശം 2,414 കിലോമീറ്റർ വരെ സഞ്ചരിക്കാനാകും. ഇത് ചൈനയിൽ നിന്ന് അമേരിക്കയുടെ പസഫിക് മേഖലയിലെ പ്രധാന സൈനിക താവളമായ ഗുവാമിലേക്കുള്ള ദൂരത്തേക്കാൾ അല്പം കുറവാണ്. അതേസമയം, കൂടുതൽ ആധുനികമായ DF-27 മിസൈലിന് ഏകദേശം 8,000 കിലോമീറ്റർ വരെ പരമാവധി ആക്രമണപരിധിയുണ്ടെന്നാണ് കണക്കാക്കുന്നത്. ഇതുവഴി ഹവായി വരെയുള്ള ലക്ഷ്യങ്ങൾ പോലും ആക്രമണപരിധിയിൽ വരുമെന്നും ചൂണ്ടിക്കാണിക്കപ്പെടുന്നു.
ചൈനയുടെ മിസൈൽ നവീകരണ പദ്ധതികൾ എതിരാളിയുടെ സൈനിക സംവിധാനങ്ങളെ ഏകോപിതമായി തകർക്കാനുള്ള ശേഷി വർധിപ്പിക്കുന്നതിലേക്കാണ് കൂടുതൽ ശ്രദ്ധ കേന്ദ്രീകരിക്കുന്നതെന്ന് 2026-ൽ അമേരിക്കൻ വ്യോമസേനയുടെ ചൈന ഏറോസ്പേസ് സ്റ്റഡീസ് ഇൻസ്റ്റിറ്റ്യൂട്ട് പുറത്തിറക്കിയ റിപ്പോർട്ടിൽ വ്യക്തമാക്കിയിരുന്നു. പ്രസിഡന്റ് ഷി ജിൻപിങ് അധികാരത്തിലെത്തിയ 2013-നുശേഷമുള്ള ഏറ്റവും വേഗത്തിലുള്ള വളർച്ചയാണ് 2025-ൽ ചൈനയുടെ മിസൈൽ ഉൽപ്പാദനത്തിൽ രേഖപ്പെടുത്തിയതെന്നാണ് ബ്ലൂംബെർഗ് റിപ്പോർട്ട് ചെയ്യുന്നത്. ചൈനയ്ക്ക് നിലവിൽ കുറഞ്ഞത് 3,150 ബാലിസ്റ്റിക് മിസൈലുകളും 300 കരയിൽ നിന്ന് വിക്ഷേപിക്കുന്ന ക്രൂസ് മിസൈലുകളും ഉണ്ടെന്നാണ് പെന്റഗണിന്റെ 2024-ലെ കണക്കുകൾ വ്യക്തമാക്കുന്നത്. 2015-നെ അപേക്ഷിച്ച് ഇത് യഥാക്രമം 147 ശതമാനവും 50 ശതമാനവും വർധനവാണ്.
Content Highlights: China is reportedly developing a new hypersonic weapon capable of targeting high-value military aircraft thousands of kilometres away. The advanced weapon could pose a major threat to airborne early-warning and control aircraft, aerial refueling tankers and other critical assets.
