LIVE TV
ഏഷ്യന് ഗെയിംസ് 2026-ല് ഇന്ത്യയുടെ മികച്ച ഷൂട്ടിങ് പ്രകടനം തുടരുന്നു. ശനിയാഴ്ച നടന്ന വനിതകളുടെ 50 മീറ്റര് റൈഫിള് 3 പൊസിഷന് ടീം ഇനത്തില് ഇന്ത്യ വെള്ളി മെഡല് സ്വന്തമാക്കി. തിലോത്തമ സെന്, വിദര്ശ വിനോദ്, നിഷാ കന്വാര് എന്നിവരടങ്ങുന്ന ഇന്ത്യന് സംഘം മികച്ച പ്രകടനം പുറത്തെടുത്താണ് രണ്ടാമതായി ഫിനിഷ് ചെയ്തത്. മത്സരത്തിലുടനീളം സ്ഥിരതയാര്ന്ന പ്രകടനം കാഴ്ചവെച്ച ഇന്ത്യന് നിര ആകെ 1765 പോയിന്റുകള് നേടിയാണ് വെള്ളി മെഡല് ഉറപ്പിച്ചത്. ഈ ഇനത്തില് ചൈന സ്വര്ണ്ണ മെഡല് നേടിയപ്പോള്, ആതിഥേയരായ ജപ്പാന് വെങ്കല മെഡല് സ്വന്തമാക്കി.
ടീം ഇനത്തിലെ മെഡല് നേട്ടത്തിന് പുറമെ, വ്യക്തിഗത വിഭാഗത്തിലും ഇന്ത്യക്ക് മികച്ച വാര്ത്തയാണെത്തിയത്. യോഗ്യതാ റൗണ്ടില് മികച്ച പ്രകടനം പുറത്തെടുത്ത ഇന്ത്യന് ഷൂട്ടര്മാരായ തിലോത്തമ സെന്നും വിദര്ശ വിനോദും വനിതകളുടെ 50 മീറ്റര് റൈഫിള് 3 പൊസിഷന് വ്യക്തിഗത ഫൈനലിലേക്ക് യോഗ്യത നേടി. യോഗ്യതാ റൗണ്ടില് തിലോത്തമ സെന് 590 പോയിന്റുകളോടെ മൂന്നാം സ്ഥാനക്കാരായാണ് ഫൈനലിലേക്ക് മുന്നേറിയത്. മികച്ച ഫോം തുടര്ന്ന വിദര്ശ വിനോദ് 588 പോയിന്റുകള് നേടി ആറാം സ്ഥാനക്കാരായി ഫൈനലില് ഇടംപിടിച്ചു. എന്നാല്, ഈ ഇനത്തില് മത്സരിച്ച മറ്റൊരു ഇന്ത്യന് താരമായ നിഷാ കന്വാറിന് 587 പോയിന്റുകളോടെ ഒമ്പതാം സ്ഥാനത്ത് ഫിനിഷ് ചെയ്യാനേ സാധിച്ചുള്ളൂ. എട്ട് പേര് മാത്രം മാറ്റുരയ്ക്കുന്ന വ്യക്തിഗത ഫൈനല് റൗണ്ടിലേക്ക് യോഗ്യത നേടാന് നിഷയ്ക്ക് തലനാരിഴയ്ക്കാണ് അവസരം നഷ്ടമായത്. നിലവില് ഏഷ്യന് ഗെയിംസ് 2026-ല് ഇന്ത്യയുടെ മെഡല് വേട്ടയില് ഷൂട്ടിംഗ് ടീം വന് പങ്കാണ് വഹിക്കുന്നത്. ഷൂട്ടിംഗില് നിന്ന് മാത്രം ഇന്ത്യ ഇതുവരെ നിരവധി മെഡലുകള് സ്വന്തമാക്കിക്കഴിഞ്ഞു.
സ്ക്വാഷ് മിക്സഡ് ഡബിള്സില് ജോഷ്ന ചിന്നപ്പ-വേലവന് സെന്തില്കുമാര് സഖ്യത്തിന് വെങ്കലം
ഏഷ്യന് ഗെയിംസ് 2026-ലെ സ്ക്വാഷ് മിക്സഡ് ഡബിള്സ് സെമിഫൈനലില് കടുത്ത പോരാട്ടത്തിനൊടുവില് പരാജയപ്പെട്ട ഇന്ത്യന് ജോഡികളായ ജോഷ്ന ചിന്നപ്പയും വേലവന് സെന്തില്കുമാറും വെങ്കല മെഡല് കൊണ്ട് തൃപ്തിപ്പെട്ടു. സെമിഫൈനല് പോരാട്ടത്തില് ഹോങ്കോങ്ങിന്റെ ടാങ് മിംഗ് ഹോങ് - ലീ കാ യീ സഖ്യത്തോട് 1-2 എന്ന സ്കോറിനാണ് (10-11, 11-2, 10-11) ഇന്ത്യന് സഖ്യം പരാജയപ്പെട്ടത്. അത്യന്തം വാശിയേറിയ മത്സരത്തില് നേരിയ വ്യത്യാസത്തിലാണ് ഇന്ത്യക്ക് ഫൈനല് അവസരം നഷ്ടമായത്. ആദ്യ ഗെയിമില് ഇരു ടീമുകളും ഒപ്പത്തിനൊപ്പം പോരാടിയെങ്കിലും അവസാന ഘട്ടത്തില് മുന്തൂക്കം നേടിയ ഹോങ്കോങ് സഖ്യം 11-10 ന് ഗെയിം സ്വന്തമാക്കി.
എന്നാല് രണ്ടാം ഗെയിമില് ശക്തമായി തിരിച്ചുവന്ന ഇന്ത്യന് സഖ്യം ആക്രമണാത്മക പ്രകടനത്തിലൂടെ മത്സരത്തില് മേധാവിത്വം നേടി. തുടക്കത്തില് തന്നെ 3-0 ത്തിന് മുന്നിലെത്തിയ ജോഷ്നയും വേലവനും ലീഡ് 7-2 ആക്കി ഉയര്ത്തുകയും, ഒടുവില് 11-2 ന് ഗെയിം സ്വന്തമാക്കി മത്സരം നിര്ണ്ണായകമായ മൂന്നാം ഗെയിമിലേക്ക് നീട്ടുകയും ചെയ്തു.
അവസാന ഗെയിമില് ലീ-ടാങ് സഖ്യം തുടക്കത്തില് 5-2 ന് മുന്നിലെത്തിയെങ്കിലും, പോരാട്ടവീര്യം പുറത്തെടുത്ത ജോഷ്നയും വേലവനും സ്കോര് 6-6 ന് സമനിലയിലാക്കി. തുടര്ന്ന് മികച്ച ഫോം തുടര്ന്ന ഇന്ത്യന് സഖ്യം 10-7 ന് മുന്നിലെത്തുകയും വിജയിക്കാന് ഒരു പോയിന്റ് മാത്രം അകലെ നില്ക്കുകയും ചെയ്തു. എന്നാല്, മത്സരം കൈവിട്ടുപോയെന്ന് കരുതിയ ഘട്ടത്തില് നിന്ന് തുടര്ച്ചയായി നാല് പോയിന്റുകള് നേടി തിരിച്ചുവന്ന ഹോങ്കോങ് സഖ്യം അവസാന ഗെയിം 11-10 ന് പിടിച്ചെടുക്കുകയും ഫൈനല് ടിക്കറ്റ് ഉറപ്പാക്കുകയും ചെയ്തു. സെമിയില് പരാജയപ്പെട്ടതോടെ ജോഷ്ന ചിന്നപ്പയ്ക്കും വേലവന് സെന്തില്കുമാറിനും വെങ്കല മെഡല് കൊണ്ട് തൃപ്തിപ്പെടേണ്ടി വന്നു. അതേസമയം, മറ്റ് അത്ലറ്റിക്സ് മത്സരങ്ങളില്, പുരുഷന്മാരുടെ മാരത്തണില് 2:11:37 എന്ന ദേശീയ റെക്കോര്ഡ് സമയത്തോടെ ഓടിയെത്തി ഇന്ത്യന് താരം സാവന് ബര്വാള് വെള്ളി മെഡല് നേടി ചരിത്രം കുറിച്ചു.
content highlights: Asian Games 2026: India Wins Silver in Women's 50m Rifle 3 Positions Team Event
