LIVE TV
ഏഷ്യന് ഗെയിംസ് 2026-ലെ 10 മീറ്റര് എയര് റൈഫിള് മിക്സഡ് ടീം ഫൈനലില് ഇന്ത്യയുടെ ഇളവേനില് വാളറിവാനും പാര്ത്ഥ് മാനെയും നാലാം സ്ഥാനത്ത് ഫിനിഷ് ചെയ്തു. ചൊവ്വാഴ്ച നടന്ന ഫൈനലില് 376.3 പോയിന്റുകളോടെ പുറത്തായതോടെ ഇവര്ക്ക് മെഡല് നഷ്ടമായി. ആദ്യ സീരിസിന് ശേഷം 103.6 പോയിന്റുകള് നേടി നാലാം സ്ഥാനത്താണ് ഇന്ത്യന് സഖ്യം ഫൈനല് ആരംഭിച്ചത്. 107.2 പോയിന്റോടെ ചൈന മുന്നിലെത്തിയപ്പോള് ദക്ഷിണ കൊറിയയും (104.9) ജപ്പാനും (103.9) തൊട്ടുപിന്നാലെ എത്തി.
20 ഷോട്ടുകള്ക്ക് ശേഷം, ഇളവേനിലും പാര്ത്ഥും 207.9 പോയിന്റോടെ നാലാം സ്ഥാനത്ത് തുടര്ന്നു. മൂന്നാം സ്ഥാനത്തുള്ള ദക്ഷിണ കൊറിയയേക്കാള് 1.3 പോയിന്റ് പിന്നിലായിരുന്നു ഇവര്. 211.9 പോയിന്റോടെ ചൈന മുന്നേറ്റം തുടര്ന്നു. മൂന്നാം സീരീസിന് ശേഷവും ഇന്ത്യയുടെ സ്ഥാനത്തില് മാറ്റമുണ്ടായില്ല; 312.3 പോയിന്റോടെ ഇന്ത്യന് സഖ്യം നാലാമതായി. 315.7 പോയിന്റോടെ ചൈന ഒന്നാമതും, ജപ്പാന് (314.9), ദക്ഷിണ കൊറിയ (314.3) എന്നിവര് അടുത്ത സ്ഥാനങ്ങളിലുമെത്തി. തുടര്ന്ന് 376.3 പോയിന്റോടെ നാലാം സ്ഥാനത്ത് ഫിനിഷ് ചെയ്ത ഇളവേനിലും പാര്ത്ഥും മത്സരത്തില് നിന്ന് പുറത്തായി. നേരത്തെ നടന്ന യോഗ്യതാ റൗണ്ടില് 634.9 പോയിന്റോടെ രണ്ടാം സ്ഥാനത്തെത്തിയാണ് ഇന്ത്യന് ജോഡി ഫൈനലിലേക്ക് മുന്നേറിയത്. 638.9 എന്ന ലോക റെക്കോര്ഡ് സ്കോറോടെയാണ് ചൈന യോഗ്യതാ റൗണ്ടില് ഒന്നാമതെത്തിയത്.
അതേസമയം, സെപക് തക്രയിലെ പുരുഷ ടീം റെഗു ഗ്രൂപ്പ് ബി മത്സരത്തില് ഇന്ത്യ മലേഷ്യയോട് 0-3 ന് തോല്വി വഴങ്ങി. മലേഷ്യയ്ക്കെതിരായ അവസാന മത്സരത്തില് ഇന്ത്യ 0-2 ന് പരാജയപ്പെട്ടു (11-15, 5-15). ഇതോടെ മൂന്ന് മത്സരങ്ങളടങ്ങിയ പോരാട്ടം മലേഷ്യ 3-0 ന് സ്വന്തമാക്കി. നേരത്തെ ജപ്പാനോടും പരാജയപ്പെട്ട ഇന്ത്യയ്ക്ക് ഇനി ഗ്രൂപ്പ് ഘട്ടത്തില് ഫിലിപ്പീന്സിനെതിരെ ഒരു മത്സരം കൂടിയുണ്ട്. ഈ തോല്വികളോടെ ഗ്രൂപ്പ് ബിയില് നിന്ന് മുന്നേറുക എന്നത് ഇന്ത്യയ്ക്ക് പ്രയാസകരമായി.
നീന്തലില്, ഋഷഭ് ദാസ്, ആകാശ് മണി, ബെനഡിക്ഷന് ബെനിസ്റ്റണ്, ധനുഷ് സുരേഷ് എന്നിവരടങ്ങിയ ഇന്ത്യയുടെ പുരുഷന്മാരുടെ 4x100 മീറ്റര് മെഡ്ലെ റിലേ ടീം ഹീറ്റ്സില് നാലാമതായി ഫിനിഷ് ചെയ്ത് ഫൈനലിന് യോഗ്യത നേടി. മൊത്തത്തില് ഏഴാമത്തെ മികച്ച ടീമായി ഫിനിഷ് ചെയ്ത ഇന്ത്യന് സംഘം ചൊവ്വാഴ്ച വൈകിട്ട് നടക്കുന്ന ഫൈനലില് മത്സരിക്കും. കബഡിയില്, ഗ്രൂപ്പ് എ മത്സരത്തില് ഇന്ത്യ ദക്ഷിണ കൊറിയയെ 63-31 ന് പരാജയപ്പെടുത്തി. സോഫ്റ്റ് ടെന്നീസ് പുരുഷ സിംഗിള്സില് ജയ് മീന പാകിസ്ഥാന്റെ ഹുസൈന് അറൈനെ 4-0 ന് തോല്പ്പിച്ചു. വനിതാ സിംഗിള്സില് ആധ്യ തിവാരി തായ്ലന്ഡിന്റെ അലീഷ സിഗ്ലറോട് 1-4 ന് പരാജയപ്പെട്ടു.
വൂഷുവില്, വനിതകളുടെ നാങ്കുവാന് ഫൈനലില് ലാംഗ്ലെന്റോംബി ദേവി ഹഞ്ചബാം ഒന്പതാം സ്ഥാനത്ത് ഫിനിഷ് ചെയ്തു. പുരുഷന്മാരുടെ ഇന്ഡിവിജ്വല് ഫോയില് വിഭാഗത്തില് ഫെന്സര്മാരായ സചിനും ഹേമാഷ് സിംഗും തങ്ങളുടെ പൂളുകളില് നാലാമതായി ഫിനിഷ് ചെയ്തു. പുരുഷന്മാരുടെ 1500 മീറ്റര് ഫ്രീസ്റ്റൈല് ബി ഫൈനലില് ആര്യന് നെഹ്റ നാലാമതായി ഫിനിഷ് ചെയ്തു. പുരുഷന്മാരുടെ 84 കിലോഗ്രാം കുമിറ്റെ വെങ്കല മെഡല് പോരാട്ടത്തില് ചേതന് ഭട്ട് പരാജയപ്പെട്ടു. സെപക് തക്ര പുരുഷ ടീം റെഗു ഗ്രൂപ്പ് ബിയില് മലേഷ്യയോട് ഇന്ത്യ 0-3 ന് തോല്വി വഴങ്ങി.
content highlights: Asian Games 2026: Elavenil-Parth Pair Misses Out on Mixed Team Rifle Bronze
