LIVE TV
ഇംഗ്ലീഷ് പ്രീമിയര് ലീഗ് ഫുട്ബോളില് നിലവിലെ ചാമ്പ്യന്മാരായ ആഴ്സനല്, ബ്രസീലിന്റെയും റയല് മഡ്രിഡിന്റെയും സൂപ്പര് താരം വിനീഷ്യസ് ജൂനിയറിനെ സ്വന്തമാക്കാന് താല്പര്യപ്പെടുന്നതായി റിപ്പോര്ട്ട്. അടുത്ത വേനല്ക്കാലത്തോടെ വിനീഷ്യസിന്റെ സ്പാനിഷ് വമ്പന്മാരുമായുള്ള കരാര് അവസാനിക്കും. മുന്നേറ്റനിരയ്ക്ക് കൂടുതല് കരുത്ത് പകരാന് ലക്ഷ്യമിടുന്ന ആഴ്സനലിന്റെ മുന്ഗണനകളില് 26-കാരനായ വിനീഷ്യസ് ജൂനിയറുണ്ട്. എന്നാല് ഇതുവരെ ചര്ച്ചകളൊന്നും നടന്നിട്ടില്ല. ബ്രസീലിയന് താരത്തെ ഇംഗ്ലണ്ടിലേക്ക് എത്തിക്കാനുള്ള നീക്കത്തിന് ആഴ്സനല് ക്യാമ്പിനുള്ളില് വലിയ പിന്തുണയുണ്ട്.
റയല് മഡ്രിഡിലെ നിലവിലെ കരാര് സാഹചര്യത്തെ ആശ്രയിച്ചായിരിക്കും വിനീഷ്യസിന്റെ ഭാവി. കരാര് പുതുക്കുന്നതുമായി ബന്ധപ്പെട്ട ചര്ച്ചകളില് ഇതുവരെ തീരുമാനമായിട്ടില്ല. സ്ഥിതിഗതികള് പരിഹരിക്കപ്പെടാതെ തുടരുകയാണെങ്കില്, കരാര് കാലാവധി പൂര്ത്തിയാകുമ്പോള് താരത്തെ സൗജന്യമായി നഷ്ടപ്പെടുന്നതിന് പകരം വില്ക്കുന്നതിനെക്കുറിച്ച് ചിന്തിക്കാന് സ്പാനിഷ് വമ്പന്മാര് നിര്ബന്ധിതരായേക്കും. എന്നാല് ബ്രസീലിയന് താരത്തെ ടീമില് നിലനിര്ത്താനും കരാര് നീട്ടുന്ന കാര്യത്തില് ധാരണയിലെത്താനുമാണ് റയല് മഡ്രിഡ് ആഗ്രഹിക്കുന്നത്. അടുത്തിടെ സമാപിച്ച ഫുട്ബോള് ലോകകപ്പില് ബ്രസീലിനായി അഞ്ച് മത്സരങ്ങളില് നിന്ന് നാല് ഗോളുകള് നേടിയത് ഉള്പ്പെടെ മറ്റൊരു മികച്ച സീസണിന് ശേഷം വിനീഷ്യസിന്റെ മൂല്യം ഉയര്ന്ന നിലയിലാണ്.
കഴിഞ്ഞ സീസണില് എല്ലാ ടൂര്ണമെന്റുകളിലുമായി റയല് മഡ്രിഡിനായി വിനീഷ്യസ് 22 ഗോളുകള് നേടുകയും ക്ലബ്ബിലെ തന്റെ പ്രാധാന്യം തെളിയിക്കുകയും ചെയ്തിരുന്നു. എന്നാല് ക്ലബ്ബിന് തുടര്ച്ചയായ രണ്ടാംവര്ഷവും പ്രധാന ട്രോഫികളൊന്നും നേടാനായില്ലെന്ന് മാത്രമല്ല, ലാ ലിഗയില് ചിരവൈരികളായ ബാഴ്സലോണയ്ക്ക് പിന്നില് രണ്ടാം സ്ഥാനക്കാരാവുകയും ചെയ്തു. ഇത് വലിയ തിരിച്ചടിയായിരുന്നു. 2018-ല് ഫ്ലെമിംഗോയില് നിന്ന് റയല് മഡ്രിഡിലേക്ക് എത്തിയ ശേഷം വിനീഷ്യസ് ക്ലബ്ബിന്റെ ഏറ്റവും വലിയ താരങ്ങളിലൊരാളായി മാറി. ക്ലബ്ബിനായി 375 മത്സരങ്ങളില് നിന്ന് 128 ഗോളുകള് നേടുകയും എല്ലാ മത്സരങ്ങളിലുമായി 100 അസിസ്റ്റുകള് നല്കുകയും ചെയ്തിട്ടുണ്ട്.
content highlights: Arsenal Eyeing Vinícius Júnior; Will Real Madrid Let Their Superstar Go?
