LIVE TV
ലോക ഫുട്ബോളിലെ ഏറ്റവും ഉയർന്ന ബഹുമതികളിൽ ഒന്നായ ബലോൻ ദ് ഓർ അവാർഡ് ചാംപ്യൻസ് ലീഗ് ഫുട്ബോൾ വിജയിക്കുന്ന ടീമിലെ താരത്തിനാണ് ലഭിക്കേണ്ടതെന്ന് സൂപ്പർതാരം ക്രിസ്റ്റ്യാനോ റൊണാൾഡോ. എന്നാൽ ഇത്തവണ ആരാണ് ബലോൻ ദ് ഓർ വിജയിക്കേണ്ടതെന്ന് പറയാൻ കഴിയില്ലെന്നും റൊണാൾഡോ കൂട്ടിച്ചേർത്തു. യുവേഫ നേഷൻസ് ലീഗ് ഫൈനലിനോട് അനുബന്ധിച്ച് മാധ്യമങ്ങളോട് സംസാരിക്കുകയായിരുന്നു ക്രിസ്റ്റ്യാനോ റൊണാൾഡോ.
തന്റെ വിരമിക്കലിനെക്കുറിച്ചും റൊണാൾഡോ പ്രതികരിച്ചു. 'എൻ്റെ മനോഭാവം ഓരോ ദിവസവും മുന്നോട്ടുപോകുക എന്നതാണ്. ഒരുപക്ഷേ എനിക്ക് ഇനി ഒരുപാട് വർഷങ്ങൾ കളിക്കാൻ സാധിച്ചേക്കില്ല. എങ്കിലും ഈ സമയം ഞാൻ ആസ്വദിക്കുന്നു. വിരമിക്കലിനായി ഒരു പ്രത്യേക ദിവസം ഞാൻ തീരുമാനിച്ചിട്ടില്ല. ഞാൻ സന്തോഷത്തിലാണ്. ഇതുപോലെ സന്തോഷത്തിൽ പോകാനാണ് ഞാൻ ആഗ്രഹിക്കുന്നത്.' റൊണാൾഡോ വ്യക്തമാക്കി.
ജൂൺ ഒമ്പതിനാണ് യുവേഫ നേഷൻസ് ലീഗ് ഫൈനൽ നടക്കുക. ക്രിസ്റ്റ്യാനോ റൊണാൾഡോയുടെ പോർച്ചുഗലിന് യൂറോ കപ്പ് ചാംപ്യന്മാരായ സ്പെയ്നാണ് എതിരാളികൾ. 40കാരനായ ക്രിസ്റ്റ്യാനോയും 17കാരനായ ലമീൻ യമാലും നേർക്കുനേർ വരുന്ന മത്സരത്തിന്റെ ആവേശത്തിലാണ് ആരാധകർ. രണ്ട് തലമുറകളുടെ പോരാട്ടമായും ഈ മത്സരത്തെ ആരാധകർ വിശേഷിപ്പിക്കുന്നുണ്ട്.
Content Highlights: Ronaldo Makes Big Claim: 'Ballon D'Or Winner Should Win Champions League'
