LIVE TV
ഫുട്ബോള് ലോകകപ്പിലെ കിരീടനേട്ടം മാത്രമല്ല, ഇനി ക്രിക്കറ്റിലും പെരുമ നേടുകയാണ് സ്പെയിന്. ക്രിക്കറ്റില് ഇപ്പോഴിതാ പുതിയ റെക്കോഡ് നേട്ടമിട്ടാണ് സ്പെയിന് തിളങ്ങിനില്ക്കുന്നത്. കഴിഞ്ഞദിവസം ഫിന്ലന്ഡിനെ 8 വിക്കറ്റിന് തകര്ത്ത് സ്പെയിന് തുടര്ച്ചയായ 21-ാം അന്താരാഷ്ട്ര വിജയം സ്വന്തമാക്കുകയും 2028-ലെ ട്വന്റി20 ലോകകപ്പ് യോഗ്യതാ പ്രതീക്ഷകള് സജീവമാക്കുകയും ചെയ്തു. ഇതിലൂടെ അന്താരാഷ്ട്ര ക്രിക്കറ്റില് ഓസ്ട്രേലിയ സ്ഥാപിച്ച ഒരു ലോക റെക്കോര്ഡ് തകര്ക്കാനും സ്പെയിന് സാധിച്ചു.
യൂറോപ്പ് സബ്-റീജിയണല് ക്വാളിഫയര് സി മത്സരത്തില് ഫിന്ലന്ഡിനെ നേരിട്ട സ്പെയിന് 132 റണ്സിന്റെ കൂറ്റന് വിജയമാണ് നേടിയത്. ഐ.സി.സി ട്വന്റി20 റാങ്കിംഗില് 28-ാം സ്ഥാനത്തുള്ള സ്പെയിന്, കഴിഞ്ഞ മൂന്ന് വര്ഷമായി അന്താരാഷ്ട്ര ട്വന്റി20യില് ഒരു മത്സരത്തില് പോലും തോറ്റിട്ടില്ല. ഐല് ഓഫ് മാനെതിരായ വിജയത്തോടെയാണ് അവരുടെ വിജയക്കുതിപ്പ് ആരംഭിച്ചത്. ഈ കാലയളവില് ജേഴ്സി, ക്രൊയേഷ്യ, ചെക്ക് റിപ്പബ്ലിക്, ഗ്രീസ്, ഫിന്ലന്ഡ് എന്നീ ടീമുകളെ സ്പെയിന് കീഴടക്കി. 21-ാം വിജയത്തോടെ, റിക്കി പോണ്ടിംഗിന്റെ നേതൃത്വത്തിലുള്ള ഓസ്ട്രേലിയന് ടീം സ്ഥാപിച്ച റെക്കോര്ഡാണ് ഇപ്പോള് സ്പെയിന് മറികടന്നത്. പോണ്ടിംഗിന് കീഴില്, 2003-ലെ ഏകദിന ലോകകപ്പ് ഫൈനലില് ഇന്ത്യക്കെതിരായ വിജയം അടക്കം തുടര്ച്ചയായ 17 ഏകദിനങ്ങളില് ഓസ്ട്രേലിയ തോല്വിയറിയാതെ മുന്നേറിയിരുന്നു. തുടര്ന്ന് വെസ്റ്റ് ഇന്ഡീസിനെതിരായ മൂന്ന് ടെസ്റ്റ് മത്സരങ്ങളും ജയിച്ചതോടെ അന്താരാഷ്ട്ര ക്രിക്കറ്റില് തുടര്ച്ചയായി 20 വിജയങ്ങള് എന്ന റെക്കോര്ഡ് ഓസീസ് സ്വന്തമാക്കി.
2024-ല് തുടര്ച്ചയായ 14 വിജയങ്ങള് നേടി ട്വന്റി20 അന്താരാഷ്ട്ര ക്രിക്കറ്റിലെ ഏറ്റവും കൂടുതല് തുടര്ച്ചയായ വിജയങ്ങളുടെ റെക്കോര്ഡ് സ്പെയിന് സ്വന്തമാക്കിയിരുന്നു. 2025 അവസാനത്തോടെ 6 വിജയങ്ങള് കൂടി സ്വന്തമാക്കിയ അവര്, അന്താരാഷ്ട്ര ക്രിക്കറ്റില് ഏറ്റവും കൂടുതല് തുടര്ച്ചയായ വിജയങ്ങള് നേടിയ ഓസ്ട്രേലിയയുടെ റെക്കോര്ഡിനൊപ്പമെത്തി (20 വിജയങ്ങള്). തുടര്ന്ന് 2026-ലെ തങ്ങളുടെ ആദ്യ മത്സരത്തില് ഫിന്ലന്ഡിനെ തോല്പ്പിച്ചതോടെ സ്പെയിന് ഓസ്ട്രേലിയയുടെ എക്കാലത്തെയും മികച്ച റെക്കോര്ഡ് പഴങ്കഥയാക്കി. 2019 ജനുവരി മുതല് ഇതുവരെ സ്പെയിന് 50 അന്താരാഷ്ട്ര ട്വന്റി20 മത്സരങ്ങളില് കളിച്ചിട്ടുണ്ടെന്നതും ശ്രദ്ധേയമാണ്. ഇതില് 41 മത്സരങ്ങളില് ജയം നേടിയപ്പോള് 8 മത്സരങ്ങളില് മാത്രമാണ് തോല്വി വഴങ്ങിയത്.
content highlights: Spanish Revolution! Spain Wins 21 Consecutive Cricket Matches to Set World Record
