LIVE TV
ഇംഗ്ലണ്ടിനെതിരായ ഒന്നാം ഏകദിനത്തില് ഇന്ത്യന് സ്റ്റാര് ബാറ്റ്സ്മാന്മാരായ രോഹിത് ശര്മയ്ക്കും വിരാട് കോഹ്ലിക്കും നിരാശ. ഇരുവരും പ്രതീക്ഷിച്ച രീതിയില് തിളങ്ങിയില്ല. എഡ്ജ്ബാസ്റ്റണില് നടക്കുന്ന മത്സരത്തില് ഇരുവരും കുറഞ്ഞ റണ്സിന് പുറത്താവുകയായിരുന്നു. 259 റണ്സ് വിജയലക്ഷ്യം പിന്തുടര്ന്ന് ബാറ്റിങ്ങിനിറങ്ങിയ ഇന്ത്യക്ക് പവര്പ്ലേയില് തന്നെ ഇരുവരുടെയും വിക്കറ്റുകള് നഷ്ടമായി. തുടക്കത്തില് താളം കണ്ടെത്താന് ബുദ്ധിമുട്ടിയ രോഹിത് ശര്മ, സാം കറന്റെ പന്തില് അനാവശ്യ ഷോട്ടിന് ശ്രമിച്ച് ബ്രൂക്കിന് ക്യാച്ച് നല്കി പുറത്താവുകയായിരുന്നു. 21 പന്തില് 11 റണ്സാണ് താരം എടുത്തത്. ഇന്നിങ്സില് ഒരു ഫോര് നേടി.
തന്റെ 300-ാം ഏകദിന ഇന്നിങ്സിനിറങ്ങിയ വിരാട് കോഹ്ലി, ജോഫ്ര ആര്ച്ചറുടെ ഇന്-സ്വിങ്ങറില് വിക്കറ്റിന് മുന്നില് കുടുങ്ങി പുറത്തായി. 6 പന്തില് ഒരു ഫോര് അടക്കം 5 റണ്സാണ് സമ്പാദ്യം. ഇരുവരെയും തുടക്കത്തില് നഷ്ടമായത് ഇന്ത്യക്ക് തിരിച്ചടിയായി. ടി20 ക്രിക്കറ്റില് നാണക്കേടോടെ പരമ്പര നഷ്ടമായ ഇന്ത്യ പ്രതീക്ഷയോടെയാണ് ഏകദിന ക്രിക്കറ്റ് കളിക്കാനിറങ്ങിയത്.
കഴിഞ്ഞ ജൂണില് അഫ്ഗാനിസ്താനെതിരെ കളിച്ച രോഹിത് ശര്മ, രണ്ടുമത്സരങ്ങളില് നിരാശപ്പെടുത്തുന്ന സ്കോറാണ് എടുത്തതെങ്കിലും ഒരു മത്സരത്തില് 96 റണ്സെടുത്ത് തിളങ്ങിയിരുന്നു. വിരാട് കോഹ്ലി ന്യൂസീലന്ഡ് പരമ്പരയില് അവസാനമായി കളിച്ചപ്പോള് സെഞ്ചുറി നേടിയിരുന്നു. അവര്ക്കെതിരെ 93 റണ്സും അദ്ദേഹം നേടിയിരുന്നു. ഇംഗ്ലണ്ടിനെതിരെ മൂന്ന് മത്സരങ്ങളാണ് പരമ്പരയിലുള്ളത്. ശേഷിക്കുന്ന മത്സരങ്ങളില് തിരിച്ചുവരവ് നടത്തി ലോകകപ്പിലേക്കുള്ള ഒരുക്കം തുടങ്ങാനാകും ഇരു താരങ്ങളുടെയും ശ്രമം.
content highlights: Ro-Ko Out! Former captains fail to click in England
