LIVE TV
ഐപിഎല്ലിന്റെ പരമ്പരാഗത കലണ്ടറായ മാർച്ച്-മെയ് മാസങ്ങളിൽ മാറ്റം വരുത്തിയേക്കുമെന്ന് സൂചന. ടൂർണമെന്റ് സെപ്തംബർ-ഒക്ടോബർ മാസങ്ങളിലേക്ക് മാറ്റുന്നതിനെക്കുറിച്ച് ബിസിസിഐ ആലോചിക്കുന്നുണ്ടെന്ന് ഐപിഎൽ ചെയർമാൻ അരുൺ ധുമൽ വെളിപ്പെടുത്തി.
നിലവിൽ ഒരു തീരുമാനമെടുത്തിട്ടില്ലെങ്കിലും, 2027ന് ശേഷമുള്ള ഐപിഎൽ വികസന പദ്ധതികളുടെ പശ്ചാത്തലത്തിലാണ് ഈ ചർച്ചകൾ. 2008ലെ അരങ്ങേറ്റം മുതൽ ഇന്ത്യൻ വേനൽ മാസങ്ങളായ മാർച്ച്, ഏപ്രിൽ, മെയ് മാസങ്ങളിലാണ് ഐപിഎൽ നടക്കാറുള്ളത്.
എന്നാൽ, ആതിഥേയ നഗരങ്ങളിലെ വർദ്ധിച്ചു വരുന്ന ചൂട് കളിക്കാർക്കും സപ്പോർട്ട് സ്റ്റാഫിനും കാണികൾക്കും ഒരുപോലെ വെല്ലുവിളിയായി മാറിയിട്ടുണ്ട്. ഐപിഎൽ 2026 സീസണിൽ പല വേദികളിലും ഉച്ചകഴിഞ്ഞുള്ള പരിശീലന സെഷനുകളിലും സായാഹ്ന മത്സരങ്ങളിലും കഠിനമായ ചൂട് അനുഭവപ്പെട്ടതോടെ ഈ വിഷയം കൂടുതൽ ഗൗരവമായി.
ഭാവിയിലെ ഐപിഎൽ മത്സരക്രമം ബിസിസിഐ വിലയിരുത്തുമ്പോൾ കാലാവസ്ഥാപരമായ ആശങ്കകൾ ഒരു പ്രധാന ഘടകമായേക്കുമെന്ന് അരുൺ ധുമൽ സമ്മതിച്ചു. 'മത്സരം മറ്റൊരു സമയത്തേക്ക് മാറ്റാൻ കഴിയുമോ എന്നതിനെക്കുറിച്ച് ബ്രോഡ്കാസ്റ്റേഴ്സുമായി ഞങ്ങൾ ചർച്ച ചെയ്യേണ്ടതുണ്ട്', ധുമൽ പറഞ്ഞു.
സാധ്യമായ ബദലുകളിൽ, സെപ്റ്റംബറും ഒക്ടോബറുമാണ് ഏറ്റവും ശക്തമായ വിൻഡോ സാധ്യതകളായി ഉയർന്നുവന്നിരിക്കുന്നത്. വേനൽക്കാലത്തെ അപേക്ഷിച്ച് ഈ കാലയളവിൽ കൂടുതൽ അനുകൂലമായ കാലാവസ്ഥയാണ് ലഭിക്കുന്നത്.
'സെപ്റ്റംബർ-ഒക്ടോബർ മാസങ്ങളിലെ ഒരു സമയമാറ്റമാണ് ഒരു നിർദ്ദേശം. പരസ്യം ചെയ്യുന്നവരെ സംബന്ധിച്ചിടത്തോളം ദീപാവലിക്ക് തൊട്ടുമുമ്പുള്ള സമയമായതിനാൽ ഇത് ഏറ്റവും മികച്ചതാണ്' ധൂമൽ വിശദീകരിച്ചു.
content highlights: ipl schedule big-change tournament to be held in september october months
